Fritz Liebrich

en Schwizer Lehrer und Mundartschriftsteller

Dr Fritz Liebrich isch am 7. Dezämber 1879 z Basel uf d Wält cho und am 30. Merz 1936 au dört gstorbe. Er isch e Schwiizer Lehrer und Mundartschriftsteller gsi. Me känt en au als eine vo de Biograafe vom Johann Peter Hebel.

s Läbe

Dr Liebrich isch als Soon vom Gschäftsmaa Johann Friedrich Liebrich und der Lina Liebrich-Rusch z Basel uf d Wält cho. Er het i synere Stadt s Humanistische Gymnasium und denn s Lehrerseminaar psuecht. Anne 1903 het er d Lehrerin und Bibliotekaarin Gertrud Laur ghürootet. Vo 1901 bis 1934 het er als Lehrer am Sevogelschuelhuus z Basel gschaffet.

Und er het e baar Sache im Basler Tieläkt gschribe, es sin Theaterstück, Prosategscht und Gedicht. Deil Wärch vom Liebrich und bsunders d Gedicht, wo für die träffende Sproochbilder grüemt wärde, sind i de Mundartbänd wie öppen em “Schwyzer Meie” wider abtrukt worde.

1918 isch em Liebrich syni Biografy vom alemannische Autor Johann Peter Hebel usecho. I synere Schrift Johann Peter Hebel und Basel vo 1926 het er zeigt, i welem Huus z Basel der berüempt Dichter uf d Wält cho isch: es isch s Huus zum Kopf an dr Santihannsvorstadt. Dr Liebrich isch Mitgliid vo der Basler Hebelstiftig gsi. Sini Änkelin Liselotte Reber-Liebrich het spöter au vil mit em Adänke an Hebel z tue gha und isch d Presidäntin vo dere Stiftig worde.

Dr Nachlass vom Fritz Liebrich wird i der Unibiblioteek Basel ghüetet.

Literatur