Henri Schwery

en Schwizer Geistlige, römisch-katholische Bischof und Kardinal

Dr Henri Kardinal Schwery (* 14. Juni 1932 z Saint-Léonard VS; † 7. Jänner 2021 ebe dert[1]) isch e Schwyzer Gaischtlige un remisch-kadolische Bischof vu Sittu gsii.

em Schwery sy Kardinalswoobe

Lääbe

Dr Henri Schwery het z Sittu, z Rom un z Fryburg d Fächer Mathematik, theoretischi Fisik, kadolischi Theology un Filosofy studiert. Am 7. Juli 1957 het er s Sakramänt vu dr Prieschterwei empfange. Är het syni Studie wytergfiert un derno vu 1961 bis 1977 as Uushilfs-Seelsorger in dr Diezese Sittu gschafft. Vu 1958 bis 1966 isch er Studäntekaplan fir d Studänte vu dr Kadolische Aktion gsii, vu 1961 bis 1977 Profässer an dr kantonale Mittelschuel z Sittu, wun er vu 1972 bis 1977 au as Räkter glaitet het.

Dr Papscht Paul VI. het dr Henri Schwery am 22. Juli 1977 zum Bischof vu Sittu ernännt. D Bischofswei et em am 17. Septämber vum nämlige Johr sy Vorgänger im Amt gee, dr François-Nestor Adam. Mitkonsekratore sin dr Bischof vu Lausanne, Gämf un Fryburg, Pierre Mamie, un dr Bischof vu St. Galle, Otmar Mäder, gsii. Vu Aafang aa het er mit em Probläm vu dr Traditionalischte um dr Marcel Lefebvre z due ghaa. Däre ire Prieschterseminar un Zäntrum z Ecône lyt nume 15 Kilometer vu Sittu ewäg. Au im Stryt zwisch em Bischdum Kuur un däm sy Bischof Wolfgang Haas het dr Schwery versuecht z vermittle. Ass dr Haas ins neigschaffe Erzbischdum Vadoz versetzt woren isch, het er mnit fir e gueti Lesig ghalte.[2]

Vu 1983 bis 1988 isch er Vorsitzer vu dr Schwyzer Bischofskumferänz gsii. Dr Papscht Johannes Paul II. het en am 28. Juni 1991 as Kardinalprieschter mit dr Titelchilche Santi Protomartiri a Via Aurelia Antica in s Kardinalskollegium ufgnuu. D Laitig vum Bischdum Sittu het er am 1. April 1995 us Gsundhaitsgrind niderglait. Dr Schwery isch bim Konklave 2005 derby gsii, wu dr Benedikt XVI. drus as Papscht firigangen isch. Dr Henri Schwery isch Mitglid vu dr Kongregation fir d Selig- un Hailigsprächigsprozäss un vum Päpschtlige Rot fir di soziale Kommunikationsmittel gsii, bis er an d Altersgränze vu 75 Johr chuu isch. Bim Konklave 2013 isch dr Kardinal Schwery ninimi derby gsii., wel er scho iber d Altersgränze vu 80 Johr driber gsii isch.

Anne 1990 isch er vum Kardinal-Großmaischter Giuseppe Kardinal Caprio zum Großchryzritter vum Ritterorde vum Hailige Grab z Jerusalem ernännt un dur dr Eugenio Corecco, Bischof vu Lugano un Großprior vu dr Schwyzerische Statthalterei, inveschtiert wore. Är isch vu 1996 bis 2007 Großprior vu dr Schwyzerische Statthalterei vum Päpschtlige Ritterorde gsii. Anne 2015 isch er vum Fouad Twal, em Latynische Patriarch vu Jerusalem, fir sy Engaschmänt im Hailige Land mit dr Palme vu Jerusalem in Gold uuszaichnet wore. 2018 isch er vum Jean-Pierre de Glutz, em Statthalter vu dr Schwyzerische Statthalterei, mit em Titel vun eme Ehregroßprior uuszaichnet wore.[3]

Weblink

  • Yytrag zue Henri Schwery uf catholic-hierarchy.org (englisch)
  • Yydrag zue Henri Schwery uf gcatholic.org (englisch)
  • Henri Schwery im Munzinger-Archiv (Artikelaafang frei abruefbar)

Fueßnote

VorgängerAmtNachfolger
François-Nestor AdamBischof vu Sittu
1977–1995
Norbert Brunner
Eugenio Corecco Grossprior vu dr Schwyzer Statthalterei vum Ritterorde vum Hailige Grab z Jerusalem
1996–2007
Pier Giacomo Grampa


Dä Artikel basiert uff ere fräie Übersetzig vu dere Version vum Artikel „Henri_Schwery“ vu de dütsche Wikipedia. E Liste vu de Autore un Versione isch do z finde.