Mündig

As Mündig bezäichnet mä d Zueflussstell vom ene Fliessgwässer in en anders Gwässer.

Mündig vom Bach Schwarz in d Jona bi Rüti

Merkmol

E Hufe Mündige, wo no in iirem natürlige Zuestand si, si äinzigartigi Biotop (z. B. d Rhônemündig in Südfrankriich), wil sich die ökologische Bedingige rasch ändere, wemm mä nume e chli flussuf oder flussab goot. D Tämpratuur in ere Mündigsregion in unsere Bräite lit mäistens bi 20 °C oder mee. Bin ere Mündig ins Meer mische sich Salz- und Süesswasser, was nume weenig Lääbewääse guet verdrääge.

S markannte Maggia-Delta

Mündig mit Flussdelta

Es isch mööglig, ass e Fluss e Flussdelta bildet; mä underschäidet die Deltaforme oder Arte:

  • Die (ändgültigi) Mündig vom ene Fluss in s Wältmeer nennt mä Mündigsdelta.
  • Es cha au si, ass e Fluss im Binneland in e See, in en andere Fluss oder in en abflusslosi Landschaftsform (e Becki (über em Meeresspiegel) oder e Depressioon (under em Meeresspiegel) mündet; denn redet mä von eme Binnedelta. Zu deere Delta-Art ghööre au Verzwiigige vom ene Fluss uf em so genannte „Inland“ in ere Niiderig.
De Rhii mündet in Bodesee und wird dodebii künstlig abglänkt.

Mündig ooni Flussdelta

Wenn e Fluss in en anders Gwässer mündet, ooni ass er e Delta bildet, chann er diräkt iimünde oder en Estuar (e Mündigsdrichder) bilde.

Künstlige Mündig, a Abwasserkanal in d kanalisiert Alb

Bischbil vo de verschiidene Mündigsforme

Weblingg

 Commons: Mündige – Sammlig vo Multimediadateie