Pius VII.

Papst Pius VII.
S päbstlige Wappen vom Pius VII.	Papst Pius VII. Porträt vom Jacques-Louis David, 1805
Latiinische Name	Pius PP. VII
Aafang vom Pontifikat	14. Merz 1800
Ändi vom Pontifikat	20. August 1823
Lengi vom Pontifikat	23 Johr und 159 Däg
Vorgänger	Pius VI.
Nochfolger	Leo XII.
Enzyklike	4
Bürgerlige Name	Barnaba Chiaramonti
Geburtsdatum	14. August 1742
Geburtsort	Cesena, Kirchenstaat
Dodesdatum	20. August 1823
Dodesort	Rom

Dr Pius VII. (uf d Wält cho as Graf Luigi Barnaba Niccolò Maria Chiaramonti am 14. August 1742 z Cesena, Chillestaat; gstorbe am 20. August 1823 z Rom) isch vo 1800 bis zu siim Dod Pabst gsi.

Em Pius VII. si Vorgänger, dr Pius VI. isch in französischer Gfangeschaft gstorbe und dr Chiaramonti isch vo de Östriicher und vo de Franzoose akzeptiert und zum Pabst gwehlt worde. Am Aafang vo siim Pontifikat isch si Hauptufgoob gsi, die französischi Chille wider zum Läbe z erwecke. Er het mit em Napoleon Bonaparte s Konkordat vo 1801 abgschlosse, wo s Verheltnis vo dr katholische Chille zum französische Staat für die neggste hundert Johr festgleit het. In ihm het dr Pabst müesse anerkenne, ass die katholischi Chille nümme d Staatschille gsi isch, au wenn die meiste Franzoose katholisch gsi si. Er het ohni Erfolg brobiert, ass dr Chillestaat widerhärgstellt wurd, het sich aber gweigeret, am Chrieg vom Napoleon mitzmache. Dr Napoleon het schliesslig dr Chillestaat annektiert. Dr Pabst het druf dr Napoleon exkommuniziert und dä het en zerst z Savona in Ligurie und denn z Fontainebleau iiglocht. 1814 hai die Alliierte dr Pius befreit und uf em Wiener Kongräss het er 1815 dr Chillestaat zruggüberchoo. Im gliiche Johr het er dr Jesuiteorde restauriert, won er as Wärkzüüg gege d Ufklärig het welle iisetze.