Preisend mit viel schönen Reden

Preisend mit viel schönen Reden isch di alt Landeshymne vu Wirttebärg. Dr Text isch e Gedicht vum Justinus Kerner (1786-1862).

Entstehig

Eberhard im Bart, 1492

Dr Justinus Kerner het dr Text im Johr 1818 verfasst as Ballad mit em Titel Der reichste Fürst zue Ehre vum Grof Eberhard im Bart. Gsungen wird dr Text mit dr Melodii vum Volkslied In des Waldes tiefsten Gründen, wu vun eme nit bekannte Komponischt gschaffe un anne 1801 s erscht Mol in eme Liederbuech vereffentligt woren isch. Uffällig sin di Gmeinsamkeite in dr Melodii mit dr Marseillaise. Dr friescht Abdruck vum Text zämme mit dr Melodii isch anne 1823 erschine.

Dr Kerner het dr Stoff zue syyre Ballad us dr historische Sag iber dr Ryychsdag z Worms anne 1495 gnuu, wu Eberhard as Anerkännig vu syyne Leischtige vum Chenig Maximilian I. zum erschte Herzog vu Wirttebärg erhobe woren isch. Noch eme Humanischt un Reformator Philipp Melanchthon soll s bim Gaschtmohl zuen ere Stryt chuu syy zwische dr Firschte, wu derby gsi sin, iber d Ryychtimer vu ihre Länder. Dr Eberhard sej us däm Stryt as Siger fiirigange. Syy Land Wirttebärg sej villicht arm, aber är as Firscht chennt syyne Untertane ruckhaltlos verdröue, wel sälbscht im diefschte Wald chennt er syy Chopf e jedem bliebige Främde zum Schlofe in dr Schoß lege, ohni ass er mießt Angscht haa, asss er umbrocht wird.

S Lied der Württemberger, wu speter zue dr Wirttebärgische Landeshymne gmacht woren isch, zeigt, ass dr Grof im Bart bi, Volk seli beliebt gsi isch un bi dr Ryychsfirschte großes Aasäh gnosse het. No Johrhunderti speter isch dr Eberhard as Ideal vun eme volksnoche un grächte Landesvater in eme fridlige Staat aagsähne wore.

Villicht het dr Melanchthon aber dr speter Herzog Eberhard mit däm syy Vorfahr Eberhard dem Greiner verwägslet. Vu däm git s d Sag, ass er bi me Ufenthalt im Wildbad (hite Bad Wildbad oder villicht au Bad Teinach) vum Grof Wolf von Eberstein hätt solle iberfalle wäre. Des isch aber vun eme Hirt verhinderet wore, wu dr Eberhard zerscht gwarnt gha het un e derno iber d Bärg vum Schwarzwald in d Burg Zavelstein soll drait haa, wel dr Eberhard ufd syre Flucht z erschepft gsi sej.

D Verbreitig vum Loblied in Liederbiecher un Liedflugschrifte isch in dr 1840er-Johr zimli aagstige. Bis in d Mitti vum 20. Johrhundert isch s vilmol in Schuel- un andre Liederbiecher abdruckt wore. Hite wird des historisch Landeslied nume no sälte offiziäll vordrait.

Text

Literatur

  • Susanne Dieterich: Württembergische Landesgeschichte für neugierige Leute. 2 Bände. DRW-Verlag Weinbrenner, Leinfelden-Echterdingen 2002–2003, ISBN 3-87181-468-7. Zum Lied: Teil 1, Seite 89ff.
  • Gerhard Raff: Hie gut Wirtemberg allewege. Das Haus Württemberg. Band 1. DVA, Stuttgart 1988, ISBN 3-89850-110-8, S. 348

Weblink

Dä Artikel basiert uff ere fräie Übersetzig vu dere Version vum Artikel „Preisend_mit_viel_schönen_Reden“ vu de dütsche Wikipedia. E Liste vu de Autore un Versione isch do z finde.