Software
Software [ˈsɒf(t)wɛː] isch e Sammelbegriff für d Gsamtheit vo usfüehrbare Dateverarbeitigs-Programm vom ene Computer und d Date wo drzue ghöre.[1] Es isch ihri Ufgob, d Arbeitswiis vo softwaregstüürte Grät, won e Deil vo dr Hardware bilde, z beiiflusse.
In däm Sinn isch dr Begriff zum erste Mol 1958 vom John W. Tukey bruucht worde.[2]
Überblick
Im allgemeine Sproochgebruuch und in dr Literatur zur Softwaretechnik wird d Definition iigschränggt uf Computerprogramm und uf d Ressource, wo mit ene äng verbunde si, wie z. B. Konfigurationsdate näbe Icons und Schriftarte, wo zum Bedriib notwändig si.[3] Date, wo sötte verarbeitet wärde (z. B. digitalisierti Musigstück), wärde meistens nit as Software verstande.[4] Die Definition wird au as Softwaresystem oder Softwareprodukt agluegt, wo zuesätzligi Bestanddeil wie z. B. d Softwaredokumentation in ere digitale oder druggte Form vom ene Handbuech cha enthalte.[5][6]
Die allgemeini Definition beschriibt Software as Gegestück zur Hardware, wobii Software do jedi Art vo digitale Date umfasst, wo uf Hardware cha gspiicheret si,[7] vo dr Firmware und eme (mögliche) BIOS (BIOS heisst sowohl e Hardware-Bauschtei wie es Programmteil dört drin[8]), em Betriebssystem, de I/O-Date, Awändigsprogramm wie s MS-Office-Paket bis zu alle (mögliche) Dateie vom ene softwaregstüürte Apparat. Dere Definition nooch ghöre zur Software au z. B. Musigdate uf ere CD, wobii d CD sälber dr Datedräger (d Hardware) isch, wo d Software, wo für e softwaregstüürte Apparat, em CD-Spiiler, bestimmt isch, druf gspiicheret isch.
Computerprogramm sind immer dur Programmier-Fachlüt programmiert. Dodrzue gits diversi sog. Programmier-Sproche, z. B. Visual Basic und C oder Fortran (für technischi Programmierig) .
Nowiis
 | Dä Artikel basiert uff ere fräie Übersetzig vu dere Version vum Artikel „Software“ vu de dütsche Wikipedia. E Liste vu de Autore un Versione isch do z finde. |