Sarah Höfflin

D Sarah Höfflin (* 8. Jänner 1991 z Gämf) isch e Freestyle-Schyfahrerin us dr Schwiiz.

D Höfflin isch d Dochter vomene Schwiizer und von ere Australierin. Si läbt mit dr Muetter z Ängland. Si het gärn Yshockey gspiilt und Neurowüsseschafte an dr Uni vo Cardiff studiert.

Es Joor lang het si i dr Schwiiz und z Savoye ganz intensyv chönne Schyfahre, und sid 2014 isch si an Wettkämpf vo dr AFP World Tour ggange. D Organisatoore vom Schiizer Schyverband hend se ane 2015 is Nazionaalteam vo de Freestyle-Schyfahrerinne uufgnoo. Iry Disziplyne sind Slopestyle und Big Air.

In dr Wintersaison 2016/2017 isch si zwäimol uf dr dritt Platz bi Wettkämpf in dr Disziplyn Slopestyle choo. S Wältcuprönne im Slopestyle vom 28. Jänner 2017 uf dr Seiser Alm i de Dolomite het si gwunne. Bi andere Rönne z Kanada und a dr Freestyle-Wätmäischterschaft z Spanie isch si au wider uf die vordere Plätz choo. Und si isch Schwiizer Mäischteri 2017 im Slopestyle und im Big Air.

Im Jänner 2018 isch d Sarah Höfflin bi de ”Winter-X-Games 2018“ z Aspen in de USA im Big Air-Wettkampf so guet gsi, ass si au do dr erscht Platz gholt het.

Und a de Olympische Winterschpiili im Februar 2018 z Südkorea het si im Slopestyle-Wettkampf d Guldmedalie gwunne und isch Olympiasygerin worde.[1][2][3] D Friburgerin Mathilde Gremaud vo Bulle het dezue ane grad no d Silbermedalie gwunne.[4]

Weblink

Fuessnoote