Summa Iniuria: Ein Pitaval der Justizirrtümer

Ds Pitaval basiert uf de n Erfaarige vom Sutermeister, wo n er im Schwiizer Büro gäg Amts u Verbandswiuchür (wo n er sich für Revisiòone vo verschidne Mordprozäss iigsedzt hed) gschaffed hed^[3]; drinne wird s Fählurtéil kulturgschichdlech basierend uf em Max Hirschbärg sine Houptfählerkwälle vor Rächtsfindig behandled.^[4] Dr Sutermeister hed welle dass siis Buech en Aart „Fortsedzig u Ergänzig“ vom Deutschland-Report vom Bernt Engelmann isch.^[5]

Dr gröschd Déil (S. 124–707) vom Buech nimmt s Kapitel Zur Genealogie des Justizirrtums: Der Hirschbergtest ii. Dr Sutermeister glidered s nach de sächs wichdigschde „Uursache vo Fählurtéile n ir Schdraafjustiz“ wome n im Buech Das Fehlurteil im Strafprozess vom Max Hirschberg (vo 1960) findet, aber chléi ire n angere Réiefolg, u de duet er no drü wiiteri „Uursache vo Fählurtéil“ ergänze: Éigléisigi Vooruntersuechige, Sugscheschdibilidäät u Gfüelslógik vo de Gschworene / psycholòogischi Fähler vo de Richter, u Fählentscheid im Beréich vor „öffendleche Moraal“. Nach däm Houptdéil, em „Hirschbergtest“, chöme no Rächtsfilosòofischi Schlussfolgerige u braktischi Reformvorschlèg mit bsundriger Berücksichtigung vom Dütsche u vom Schwiizerische Rächtswäse (S. 707–726). Ir Zämefassig (S. 727–747) schlaat dr Sutermeister vor, dess me n ir Schwiiz es sogenannts Bundeskriminalamt (nach em Vorbild vom Dütsche Bundeskriminalamt) séd uufmache (ds Schwiizerische Bundeskriminalamt gits bis hüt need).

Em Sutermeister si Aktivismus as „Fählurtéilsjèger“ isch sowou globt^[6] as o tadled^[7] worde. Im Summa Iniuria isch bsungers dr Déil Fehlentscheide im Bereich der „öffentlichen Moral“ vo de dütsche Jurischde Klaus Volk^[8], Wolfgang Lorenz^[9] u vom ööschdriicher Otto Scrinzi^[10] wäg sim verworrene boliitische n Inhalt kritisiert worde. Für ds Buech sig charakterischdisch, dess dr Sutermeister o über Fäll schriibt, wo n er méint dess si falsch beúurdéilt woorde sige, òoni dass es zure grichdliche n Änderig vom Urteil chòo wäri^[11] u wäg däm i mängne Fäll „geziilt dr subjèktivi Schdandpunkd vom Verdéidiger iinimmt“^[9].

Für e Schdrafrächdsexpärt Karl Peters nimmt Summa Iniuria „e wichdige Blatz“ ir Réie vo de Wärch über Juschdizirrtümer vom Erich Sello, vom Max Alsberg, vom Albert Hellwig, vom Max Hirschberg, vom Heinrich Jagusch (ò Judex gnennt) u vom Peters sälber ii.^[11] Dr Karl Peters schduunt, wi dr Sutermeister i sim Summa Iniuria „des im internazionale Schrifdduum behandlete Materiaal beherrschd u wi n ers dür éignigs Materiaal us dr Schwiiz u us Dütschland überzügend ergänzd. Wichdigi Schdraafverfaare wärde uf schbannendi Art verzellt. Drbii géits em Sutermeister wèniger um Sensaziòon as um e sachlechi Erörterig.“^[11] Unger angerem wäg Summa Iniuria hed dr Karl Peters dr Sutermeister, zäme mid em Frank Arnau u mid em Günter Weigand, en „erbidderete Kämpfer für ds Rächd“ gnennt.^[12]

• Summa Iniuria – Ein Pitaval der Justizirrtümer: fünfhundert Fälle menschlichen Versagens im Bereich der Rechtsprechung in kriminal- und sozialpsychologischer Sicht. Basel: Elfenau, 1976 (810 Siitä); u Bärn: Schweizerische Nationalbibliothek, 2011. ISBN 978-3226000962