Unruhen in Belize (2005)

Mitti Jänner 2005 sin z'Belize Unruehe i dr Hauptschtadt Belmopan usbrôche. D'Unruehe sin usglösst wôre durch d'Veröffentlichig vomene nöji Budget, wo ä massivi Schtüürerhöig vorgsehe hät. Usserdem hät d'Wuet uf d'regierendi Partei ä Roll gschpilt.

Ufenandertreffe vo Demonschtrante un Sicherheitskräft z'Belmopan am 21. Jänner
Menschemasse vor dr Nationalversammlig vo Belize mit Transparente, wo dä Rucktritt vum Premierminischter Said Musa fordere

Am 13. Jänner 2005 hät d'Regierig vo Said Musa s'Budget für 2005-2005 verchündet. S'Budget hät ä deftigi Schtüürerhöig für verschideni Gschäft un Ware beinhaltet: ä 11% Erhöig vu dr Grunderwerbschtüür, ä 5% Erhöig für finanzieli Inschtitutione, ä 8% Erhöig vu dr Tabakschtüür un ä 100% Erhöig uf Rum. D'Regierig hät gsait, dass sälli Erhöige mit denne verglychbar sin, wo 1998 vur letschti Regierig bschlosse wôre sin. Nôch Jôhre vo angeblichem Missmanagement un Korruption hät s'Budget aber Protescht usglösst. Am 15. Jänner sin d'Demonschtrante un d'Polizei vorem Parlament annenandergrote.

Am 20. Jänner hän d'Wirtschaft un d Gwerkschafte zuemene Schtreik für zwee Tag ufgruefe. D'Regierig hät als Gegemassnahm s'Wasser abgschtällt. Am 21. Jänner hän di lokale Medie über vereinzelnti Demonschtratione z'Belmopan berichtet, unter anderm au über Brandschtiftig an manche Regieriggebäud un Barikade. Minischter sin mit Fläsche un Schtei beworfe wôre, d'Polizei un s'Militär sin wege dem gege d Demonschtrante vorgange.

Ä grössri Demonschtration hät am 21. Jänner schtattgfunde. D'Demonschtration vorem Parlament isch gwaltätig usgange. D'Demonschtrante hän d'Polizei mit Schtei beworfe un d'Polizei hät mit Gummigschoss un Gas reagiert. Ä grössrer Chlepf isch au ghört wôre un mehreri Demonschtrante sin verhaftet wôre. Nôchdem d'Demonschtrante de gnehmigt Ablauf vu dr Demonschtration ignoriert gha hän, hät d'Polizei d'Demonschtration ufglösst. D'Polizei isch dä ganz Tag lang relativ ruehig blibe, manchi Kadete solle aber Gwalt ygsetzt ha. S'wird behauptet, dass d'Demonschtrante erscht Schtei gwôrfe hän, nôchdem ä Demonschtrant vomene Kadet am Grind troffe wôre isch.

S'isch erscht s'dritti Môl, dass sonigi Unruehe z'Belize usbräche, zum letschti Môl 1980, wo ä Teil vum Land an Guatemala hät solle abträte wäre.