Vietnam

D Bevölkerigszahl vo Vietnam wird uf öbbe 85,5 Millione Mensche gschetzt. D Bevölkerig isch im Schnitt sehr jung: Landeswiit si öbbe 30 % vo de Mensche under 14 Johr alt, und nume öbbe 5 % si über 65. S Bevölkerigswachstum wird uf 1,3 % bis 1,4 % gschetzt. Tendenziell sinkt d Geburteroote, währed wäge de verbesserete medizinische Bedingige d Dodesroote au sinkt. D Läbenserwartig lit momentan bi 64 Johr für d Manne und 68 Johr für d Fraue.

D Mehrheit vo der Bevölkerig läbt in de dicht besiidlete Gebiet vo de Mündigsdelta vom Rote Fluss und vom Mekong, in wele d Landwirtschaft vorherrscht. Trotz dr agrarische Brägig läbe scho rund 25 % vo de Vietnamese in de urbane Regione vo de groosse Schdedt, und d Zuewanderig us de wirtschaftlig wenig entwicklete ländlige Gebiet nimmt schdändig zue.

Öbbe 88 % vo dr Bevölkerig si ethnischi Vietnamese (Việt oder Kinh). Drnäbe si 53 ethnischi Minderheitegruppe anerkennt. Die gröschte drvo si d „Uslandschinese“ (vietnam.: Hoa), ihri Zahl wird uf öbbe 1,2 Millione gschetzt. D Mehrzahl vonenä si Nachfahre vo Iiwanderer, wo 1644, noch em Zsämmebruch vo der Ming-Dynaschdii, ins Land cho si. Wiiteri Volksgruppe si d Thai, Khmer (vor allem im Süde, dr Region vom Mekong-Delta, wo über Johrhundert zu Kambodscha ghört het) und d „Bärgvölker“ (Montagnards), ä Sammelbezeichnig für d Bewohner vo de Bärgregione. D Montagnards gälte as die ursprünglige Bewohner vom kontinentale Südoschtasie. Si si im Lauf vo dr Gschicht z Vietnam, Thailand, Myanmar und Laos vo de zuegewanderete Mehrheitsvölker us de fruchtbarere Regione vo de Flussebene und Küschte in die unzuegänglige Bärgregione verdrängt worde. Die Völker si bis hüt vo dr wirtschaftlige Entwicklig vo dene Länder wiitgehend abgschnitte und läbe in relativer Armuet. Kultur und Schbrooche vo de Minderheite unterscheide sich meischtens sehr schtark vo dene vo de Vietnamese.

Wil Aghörigi vo de „Bärgvölker“ im Indochinachrieg uf dr Siite vo Frankriich und im Vietnamchrieg uf dere vo der USA kämpft hai, het s noch dr Wiidervereinigung vo Vietnam Repressione gege die Völker ge und si si in der Gsellschaft deils nit guet aagseh; aber au Minderheitevölker, wo uf dr kommunistische Siite kämpft hai, finde kuum positivi Beachtig.