Wikidata

Wikidata isch es Wikimedia-Projäkt für e fry bearbeitbari Datebank zur Underschtützig vo de Wikipedia und de andere Schwöschterprojäkt. S Projäkt isch vom Verein Wikimedia Deutschland is Läbe grüeft worde. Es isch die gmeinsami Quälle für Date, wo i allne Wikimedia-Projäkt i allne Schprache verwändet wärde chönd.

Wikidata
S Logo vo Wikidata
URLwikidata.org
KommerziällNei
BschryybigWikiprojekt zur Zentralisierig vo Date
Regischtrierigoptional
Sprochemehrschprachig
EigetimerWikimedia Foundation
Erschine29. Oktober 2012

D Datesätz im Wikidata schtönd under de Creative-Commons-Lizänz CC0 1.0 Universal (CC0 1.0) Public Domain Dedication. Mit ihre chönd die Date ohni Aagab vomene Urheber fry verwändet wärde. Alli andere Namensrüüm schtönd under de Creative-Commons-Attribution/Share-Alike-Lizänz (CC BY-SA 3.0).[1]

Uufbuu

De Uufbuu vonere Wikidata-Uussag am Byspil «Berlin»

Wikidata isch e Samlig vo Objäkt (bezeichnet mit em Präfix Q, z. B. Q64). Die Objäkt hend beliebig vieli Uussage und Bhauptige (bezeichnet mit em Präfix P für property, z. B. P1082). Die Eigeschafte chönd mit Qualifikatore (z. B. P585) wyter präzisiert wärde. Dur Quälle beläiti Bhauptige wärdid Uussage gnännt.[2]

Gschicht

Wikidata isch s erschte nüüe Projäkt vo de Wikimedia-Foundation syt 2006 gsii.[3] Im Septämber 2004 het de Erik Möller z erscht Mal es Wikidata-Projäkt vorgschlage.[4] De Magnus Manske het churz drufabe en erschte Prototyp usprobiert, wo die grundsätzlichi Machbarkeit vo dem Projäkt ufzeigt het. Die eigetlichi Umsetzung het im April 2012 z Berlin aagfange. Sie isch dur Schpände vom Allen Institute for Artificial Intelligence, vo de Gordon and Betty Moore Foundation und vo Google Inc. mit insgsamt 1,3 Millione Euro finanziert worde.[5][6] D Finanzierig dur Schpände isch offiziell bis zum Früehlig 2013 gloffe; nachhär het Wikimedia Düütschland für en Aaschlussfinanzierig gluegt.[7]

Nach em offizielle Start am 30. Oktober 2012 het Wikidata fry bearbeitet wärde chönne. I de erschte Phase sind Schprachlinks us de einzelne Wikipedias zue Datenobjäkt (änglisch items) vo Wikidata zämegfüert und mit Bezeichnige und Beschrybige verseh worde. Am 15. Dezämber 2012 isch s eimillionschti Datenobjäkt yträit worde. 2016 hets scho meh als 20 Millionen Objäkt gää.[8] De Prozäss isch mit automatische Computerskript (au bekannt als «Bots») vereifacht worde. Syt em 6. März 2013 sind die Schprachlinks i allne Schprachversione verfügbar, drunder au i de Alemannische Wikipedia.[9]

Am 4. Februar 2013 isch die zweiti Phase mit no limitiertem Funktionsumfang i Betrieb gange. Uussage sind zue Datenobjäkt dezuegfüegt worde (Byschpil Marie Curie: Geburtsort → Warschau). Die Informatione sind zum Teil automatisiert us Wikipedia-Infoboxe und -Kategoriie überträit worde. S Ziel isch gsii, dass Infoboxe i de Wikipedia-Uusgabe mit Date zäntral us Wikidata gfüllt wärdid. Am 27. März 2013 isch i de erschte 11 Wikipedia-Schprachversione die Understützig für Phase 2 aktiviert worde. Am 23. April sind die reschtliche Wikipedias nachezoge.[10]

I de Phase 3 söll’s möglich wärde, automatisiert Lischtene z erschtelle. Bishär wärdid sönigi Lischtene i jedere Wikipedia äxtra gschribe und gwartet. I Zuekumft müessted denn nur no eimal nüüi oder gänderti Informatione im Wikidata yträit wärde. Au innerhalb vo Artikel git’s Lischtene.

Wyteri Funktione sölled schrittwys dezuechoo.

Suschtigs

I de Aafangszyt vo Wikidata isch kritisiert worde, dass e Lizänz ohni Copyleft verwändet wird.[11]

Im Jahr 2013 het d IBM s Prysgäld vom Feigenbaum-Prys 2013 a d Wikimedia Foundation und namentlich für Wikidata gschpändet, wil d Wikipedia e grosse Bytrag zum Erfolg vo de Projäkt gleischtet heb und Wikidata es sich zum Ziel gsetzt heb, Mänsche wie Maschine liechtere Zuegang zu Wüsse z verschaffe.[12]

Ändi 2014 het Google bekannt gää, dass sie ihri eigeti Faktedatebank «Freebase» vo 2015 aa zugunschte vo Wikidata ufgäh welid. Um Datene eifacher nach Wikidata übernäh z chönne, het Google bis zum März 2015 es Importtool bereitgstellt.[13]

Literatur

Weblink

 Commons: Wikidata – Sammlig vo Multimediadateie

Fuessnoote



Dä Artikel basiert uff ere fräie Übersetzig vum Artikel „Wikidata“ vu de dütsche Wikipedia. E Liste vu de Autore un Versione isch do z finde.