Erección

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Una erección ye un fenomeno fisiolochico en o cual o pene se torna firme, embotau y agrandiu. A erección d'o pene ye o resultau d'una interacción complexa de factors psicolochicos, neurals, vasculars y endocrinos y, a ormino, s'asocia con a excitación sexual u l'atracción sexual, encara que as ereccions tamién pueden estar espontanias. A forma, l'anglo y l'adreza d'una erección vareyan considerablement en os humans.

Fisiolochicament, a erección se desencadena per a división parasimpatica d'o sistema nervioso autonomo, lo que fa que aumenten os livels d'oxido nitrico (un vasodilatador) en as arterias trabeculars y lo musclo liso d'o pene.^[1] As arterias se dilatan fendo que os cuerpos cavernosos d'o pene (y en menor medida o cuerpo molsudo) s'implan de sangre; de vez os musclos isquiocavernoso y bulbomolsudo comprimen as venas d'os cuerpos cavernosos restrinchindo a salida y circulación d'ista sangre. A erección rebla cuan l'actividat parasimpatica se reduz a la linea de base.^[2]

Como respuesta d'o sistema nervioso autonomo, una erección puede resultar d'una variedat d'estimulos, incluyida a estimulación sexual y a excitación sexual y, per lo tanto, no ye de tot baixo control conscient. As ereccions mientres o suenio u en dispertar se conoixen como tumescencia peneana nocturna (en anglés NPT).^[3] L'ausencia d'erección nocturna se fa servir comunament pa distinguir entre as causas fisicas y psicolochicas d'a disfunción eréctil y l'impotencia.^[4]