Breda functioneert es verzörgingscentrum veur Wes-Braobant. 't Karakter is minder industrieel es dat van Tilburg. Breda hoesvès de Keuninklike Militair Academie (KMA) en 'n arrondissemintstribunaal. 't CSM-sókkerfebrik is in dees stad gevesteg.
Breda heet 'n good bewoerd historisch centrum, mèt es veurnaomste bouwwèrk de Groete Kèrk. Aon de Merret stoon inkel markante gebouwe, wie 't stadhoes. 't Begijnhof geneet ouch bekindheid.
Breda, Brei A, ligk aon de samevleujing vaan Mark en Aa, boedeur de stroum (Aa) hei inderdaod väöl breier weurt. Op dees plek oontstoont in de twelfde iew 'n nederzetting, die in 1125 veur 't iers geneump weurt. In 1252 kraog 't stadsrechte, en in de volgende iewe bleef 't greuje. In 1403 woort de Baronie van Breda gestiech, e gebeed mèt Breda es centrum, geïnspireerd op de Meierij van de Bosj. Tijens d'n Tachtegjaoregen Oorlog woort de stad neet minder es drei kier door de Staotse legers vereuverd: in 1572 bij 't begin vaan d'n Opstand, in 1591 (door de lis mèt 't Törfsjip vaan Breda) en in 1637. De bevölking bleef evels gooddeils katheliek.
