Minecraft
Minecraft é un videoxogo de mundo aberto tipo sandbox creado orixinalmente polo deseñador e programador sueco Markus "Notch" Persson e desenvolvido e publicado posteriormente pola empresa fundada por el, Mojang.
| Minecraft | |
|---|---|
| Desenvolvedor(es) | Mojang Studios e Microsoft |
| Distribuidora(s) | Mojang (PC, móbil, Wii U), Microsoft Studios (XBOX360, XBOXONE, Windows Phone, Windows 10), Sony Computer Entertainment (PS3, PS4, PS Vita) |
| Deseñador(es) | Markus Persson (2009-2011) Jens Bergensten (2011-) |
| Artista(s) | Markus Toivonen |
| Compositor(es) | Daniel Rosenfeld |
| Lanzamento | Lista
|
| Xénero | Sandbox, mundo aberto, supervivencia |
| Modos de xogo | Un xogador, multixogador |
| Clasificación | PEGI .svg){kind=small} CERO  USK  |
| Plataforma(s) | Microsoft Windows, OS X, Linux, Android, iOS, Windows Phone, Xbox 360, Xbox One, PlayStation 3, PlayStation 4, PlayStation Vita, Raspberry Pi, Universal Windows Platform, Wii U |
| Lingua/s | Multilingüe |
| Na rede | |
| http://www.minecraft.net | |
        | |
| [ editar datos en Wikidata ] | |
Os aspectos creativos e de construción de Minecraft permítenlles ós xogadores construír elementos a partir de cubos con diversas texturas nun mundo en 3D xerado por procedementos. Outras actividades do xogo inclúen a exploración, a recolección de recursos, a confección de obxectos e o combate. Dispón de varios modos de xogo, incluíndo un modo de supervivencia no que o xogador debe conseguir recursos para construír o mundo de xogo e manter a súa saúde, un modo creativo no que os recursos son ilimitados e o xogador ten a capacidade de voar, un modo de aventuras que permite xogar niveis e mapas creados por outros xogadores e un modo espectador no que os xogadores poden voar e observar o mundo pero sen interactuar con el. A versión para PC do xogo destaca pola súa comunidade de modding.
Minecraft recibiu boas críticas dos medios trala súa publicación, e recibiu varios nomeamentos e premios. A data de xuño de 2016 vendéranse máis de 106 millón de copias no conxunto de tódalas plataformas, e tiña máis de 40 millóns de xogadores únicos ó mes, converténdose no videoxogo de PC máis vendido ata esa data e o segundo videoxogo máis vendido de tódolos tempos. En setembro de 2014 Microsoft anunciou un acordo para adquirir Mojang e a propiedade intelectual de Minecraft por unha cantidade de 2 500 millóns de dólares, completando a adquisición dous meses despois.
Mecánica de xogo
Minecraft é un videoxogo de mundo aberto de tipo sandbox nun espazo tridimensional sen obxectivos definidos para o xogador, permitindo un amplo grao de liberdade no modo de xogo.[12] Porén, o xogo contén un sistema de logros.[13] A mecánica de xogo por defecto é en primeira persoa, coa opción de xogar en modo de terceira persoa ou mesmo en segunda persoa.[14] O núcleo do xogo desenvólvese ó redor da escavación e colocación de bloques. O xogo componse de obxectos en tres dimensións, principalmente cubos, situados dentro dun padrón fixo de grella e representando distintos materiais, como terra, pedra, minerais, auga, lava, árbores etc. Mentres que os xogadores poden moverse libremente polo mundo de xogo, os obxectos só poden colocarse nunha posición fixa da grella. Os xogadores poden colectar estes bloques de materiais e colocalos noutros lugares, permitíndolles desta forma elaborar diversas construcións.[15]
Ó comezo do xogo o xogador sitúase na superficie dun mundo de xogo xerado por procedementos e case infinito (xa que conta cun límite duns 32 000 000 de bloques nos eixos x e y).[16] O mundo divídese en varios biomas que van dende desertos ata xunglas ou campos de neve.[17][18] Os xogadores poden moverse por diversos terreos como chairas, montañas, bosques, covas e varios corpos de auga.[16] O sistema temporal do xogo segue un ciclo de día e noite, cunha duración para un ciclo completo de 20 minutos de tempo real. Durante o curso do xogo os xogadores poden atoparse con varios personaxes non xogador coñecidos como mobs (ou 'criaturas' na versión oficial en galego) incluíndo animais, aldeáns e criaturas hostís.[19] O xogador pode cazar ós animais non hostís, como por exemplo vacas, porcos e galiñas, para conseguir comida e materiais. Os mobs hostís, como por exemplo arañas xigantes, esqueletos e zombis, aparecen durante a noite ou en lugares escuros como covas.[16] Algunhas das criaturas notables únicas de Minecraft son os chamados Creepers, criaturas que se achegan con sixilo ó xogador e estoupan preto del, e o chamado Enderman, unha criatura que pode teletransportarse e recoller bloques do xogo.[20]
O mundo de xogo xérase seguindo un método por procedementos segundo o xogador vai explorándoo, empregando unha semente de mapa que se obtén do reloxo do sistema no momento da creación do mundo, que tamén se pode especificar manualmente.[21][22] Malia que o xogo presenta límites no movemento vertical, permite xerar un mundo infinito no plano horizontal, só limitado polos posibles problemas técnicos que poden darse cando se acada unha distancia moi distante do punto orixinal.[21] O sistema de físicas do xogo foi descrito en varias ocasións como pouco realista.[23] A maioría dos bloques sólidos non se ven afectados pola gravidade. Os líquidos flúen dende un bloque de orixe, que pode eliminarse colocando outro bloque sólido no seu lugar ou recolléndoos cun cubo. O xogo permite construír sistemas complexos empregando dispositivos mecánicos primitivos, circuítos electrónicos e portas lóxicas por medio dun material do xogo coñecido como "redstone" (pedra vermella).[24]
Minecraft presenta dúas dimensións alternativas ó mundo de xogo principal: o Nether (Inframundo) e o End (Fin).[20] O Nether é unha dimensión semellante ó inferno á que o xogador accede construíndo portais con recursos únicos e que permiten atravesar grandes distancias no mundo principal do xogo.[25] O End é unha terra estéril na que habita un dragón coñecido como Ender Dragon.[26] Cando o xogador mata ó dragón amósanse os créditos finais do xogo, escritos polo autor irlandés Julian Gough.[27]
O xogo ten catro modos de xogo principais: supervivencia, creativo, aventuras e espectador. Tamén posúe un sistema de dificultade modificable con catro niveis. No nivel máis doado (peaceful) as criaturas hostís non aparecen no mundo de xogo.[28]
Modo de supervivencia
.jpg)
Neste modo de xogo os xogadores teñen que colectar recursos naturais (como por exemplo pedra, madeira ou ferro) atopados no mundo para elaborar diversos bloques e obxectos.[16] Segundo o nivel de dificultade escollido, os inimigos aparecen nas zonas escuras fóra dun determinado rango de distancia do xogador, requirindo que este constrúa un refuxio para sobrevivir ó ciclo da noite.[16] Este modo inclúe tamén un sistema de saúde, que se reduce polos ataques de monstros, caídas, fame e outros eventos. O xogador ten tamén unha barra de fame, que debe encher inxerindo comida no xogo, agás no nivel de dificultade máis doado. Cando esta barra de fame está baleira o xogador deixa de recuperar saúde de forma automática e comeza a perder saúde. A saúde recupérase de forma automática cando a barra de fame está case completa, así como independentemente desta no modo de dificultade máis doado.
O xogador pode elaborar unha ampla variedade de obxectos.[29] As armaduras e armas permiten reducir o dano recibido dos ataques dos monstros e facilítanlle ó xogador loitar con eles. O xogador pode adquirir recursos para elaborar ferramentas como machadas, pas ou picos para cortar árbores, escavar o solo e conseguir minerais. As ferramentas de certos materiais permiten realizar estas tarefas de forma máis rápida que as elaboradas con outros materiais, ademais de ter unha duración maior. O xogador pode comerciar cos recursos obtidos con outros personaxes non xogador por medio dun sistema de intercambio de esmeraldas por outros bens.[19][30][30]
O xogo ten un sistema de inventario, no que o xogador pode levar consigo un número limitado de obxectos. Cando o xogador falece, os obxectos do seu inventario persoal caen ó chan, e o xogador reaparece no punto inicial do xogo ou nun punto de gardado definido por medio dunha cama.[31] O xogador pode recuperar estes obxectos durante un determinado período de tempo ata que desaparecen por completo. O xogador pode conseguir tamén puntos de experiencia matando mobs e a outros xogadores, por medio da minaría e recolección de recursos, coidando de animais e cociñando. Esta experiencia pode empregarse posteriormente en ferramentas de encantamentos, armaduras e armas.[28] Os obxectos encantados desta forma son xeralmente máis poderosos, teñen unha duración maior ou presentan outros efectos especiais.[28]
Outros modos de xogo
O xogo presenta tamén un modo "hardcore" como variante do modo de supervivencia, que se diferenza deste principalmente en que o xogo está bloqueado no modo de maior dificultade e no que a morte do xogador é permanente, borrándose o mundo cando isto sucede.[32]
No modo creativo o xogador ten acceso a tódolos recursos e obxectos do xogo a través do menú de inventario, e pode colocalos ou eliminalos do mundo de forma instantánea.[33] Neste modo de xogo os xogadores poden voar libremente polo mundo de xogo, non sofren danos e non lles afecta a fame.[34][35] Este modo de xogo permite que o xogador se centre na construción e creación de estruturas e proxectos a grande escala.[33]
O modo de aventuras engadiuse ó xogo na versión 1.3, deseñado especificamente para que os xogadores puidesen experimentar mapas e aventuras creados e personalizados por outros xogadores.[36][37][38] A mecánica de xogo neste modo é semellante á do modo de supervivencia, pero introduce varias restrición aplicadas ó mundo de xogo polo creador do mapa.[38] Outro engadido deseñado para os mapas personalizados é o bloque de ordes, que permite expandir as interaccións cos xogadores a través de varios comandos de servidor.[39]
O modo espectador permite que os xogadores voen libremente polo mundo observando o xogo sen interactuar con el. Neste modo de xogo hai un menú que permite que os xogadores se teletransporten ós lugares onde se atopan outros xogadores, ademais de permitir compartir o seu punto de vista ou ó doutras criaturas.[40]
Multixogador
O modo multixogador de Minecraft está dispoñible por medio de servidores, nos que o anfitrión pode ser un dos propios xogadores ou unha terceira parte, permitindo que os xogadores interactúen e se comuniquen entre eles dentro dun único mundo de xogo.[41] Os mundos de xogo dun só xogador teñen soporte de rede local, permitindo que outros xogadores se unan a eles dende outras computadoras conectadas na rede local sen precisar unha configuración de servidor.[42] Os servidores multixogador de Minecraft están guiados por operadores de servidor, que teñen acceso a comandos de servidor que lles permiten, por exemplo, configurar a hora do día no xogo e teletransportar ós xogadores a outros lugares do mundo de xogo. Os operadores poden configurar tamén restricións para permitir só determinados nomes de usuario limitar o acceso de determinados enderezos IP ó servidor.[41] Os servidores multixogador ofrecen diversas actividades dentro do xogo, e algúns deles teñen regras únicas e personalizadas. Tamén poden habilitar o modo xogador contra xogador (PvP) permitindo que os xogadores loiten entre eles.[43] No ano 2013 Mojang anunciou Minecraft Realms, un servizo de hospedaxe de servidores coa intención de que os xogadores puidesen configurar partidas multixogador de forma máis doada e sen precisar un servidor propio.[44] Nun anuncio da Electronic Entertainment Expo de 2016, Mojang confirmou que Realms incluiría soporte de xogo multiplataforma entre as versións de Windows 10, iOS e Android a partir de xuño de 2016, con soporte adicional para Xbox One máis tarde ese mesmo ano e eventualmente soporte para dispositivos de realidade virtual.[45]
Desenvolvemento
Markus "Notch" Persson comezou o desenvolvemento do xogo como un proxecto persoal.[46] A inspiración para crear Minecraft veulle doutros xogos como Dwarf Fortress, Dungeon Keeper e Infiniminer. Naquel momento visualizou un xogo de construción isométrico en 3D que sería unha mestura entre as súas inspiracións e levou a cabo varios prototipos iniciais.[46] Infiniminer foi unha grande influencia para o estilo da mecánica de xogo, incluíndo o aspecto en primeira persoa, o estilo visual de bloques e os fundamentos de construción de bloques. Porén, a diferenza de Infiniminer Persson procurou que Minecraft incluíse elementos de rol.[47]
Minecraft publicouse por primeira vez o 17 de maio de 2009 en forma de versión en desenvolvemento nos foros TIGSource,[48] que posteriormente pasou a coñecerse como a versión Classic. Varias das versións posteriores, denominadas Survival Test, Indev e Infdev, publicáronse entre setembro de 2009 e febreiro de 2010, co xogo recibindo outras actualizacións adicionais entre cada unha delas. A primeira actualización maior, denominada versión alfa, publicouse o 28 de xuño de 2010. Malia que nos comezos Persson mantiña un traballo na empresa Jalbum.net, deixou este traballo para pasar a desenvolver Minecraft a tempo completo en canto as vendas da versión alfa foron en aumento.[49] Persson continuou actualizando o xogo con novas actualizacións distribuídas de forma automática ós usuarios, que incluían características como novos obxectos, inimigos, o modo de supervivencia e cambios no comportamento e mecánicas do xogo.[49] Para apoiar o desenvolvemento de Minecraft, Persson comezou unha compañía de videoxogos, Mojang, cos ingresos das vendas do xogo.[50][51][52] O 11 de decembro de 2010 Persson anunciou que Minecraft ía entrar na súa fase de probas beta o 20 de decembro de 2010.[53]
Mojang publicou unha versión rematada do xogo o 18 de novembro de 2011.[54] O xogo continuou recibindo actualizacións trala súa publicación, con varios cambios, novo contido para o xogo e novos anfitrións de servidores.[55] O 1 de decembro de 2011, Jens "Jeb" Bergensten tomou o control creativo completo de Minecraft, substituíndo a Persson como desenvolvedor en xefe.[56] O 28 de febreiro de 2012 Mojang anunciou a contratación dos desenvolvedores da plataforma de servidores "CraftBukkit"[43] para mellorar o soporte de modificacións de servidor de Minecraft.[57] Esta adquisición incluíu tamén os dereitos da modificación CraftBukkit,[58] aínda que a validez desta reclamación estivo cuestionada por mor da súa condición de proxecto de código aberto con moitos contribuidores, baixo as licenzas GNU General Public License e Lesser General Public License.[59] O 15 de setembro de 2014 Microsoft anunciou un acordo de 2 500 millóns de dólares para mercar Mojang, xunto coa propiedade intelectual de Minecraft. O acordo completouse o 6 de novembro de 2014 e converteu a Persson nun dos "Millonarios do Mundo" para Forbes.[60][61][62][63]
Música e son
A música e son de Minecraft foron producidos polo deseñador de son alemán Daniel "C418" Rosenfeld.[64] A música de fondo de Minecraft é unha música ambiental sen letras. O 4 de marzo de 2011 Rosenfeld publicou unha banda sonora baixo o título Minecraft – Volume Alpha, na que se incluíron gran parte das pistas de música do videoxogo así como outras non incluídas nel.[65] Kotaku cualificou a música de Minecraft como unha das mellores bandas sonoras de videoxogos do ano 2011.[66] O 9 de novembro de 2013 Rosenfeld publicou a segunda banda sonora oficial, titulada Minecraft – Volume Beta, incluíndo música que fora engadida en versións posteriores do xogo.[67][68] O selo independente Ghostly International publicou o 21 de agosto de 2015 unha edición física de Volume Alpha, en CD e vinilo.[69][70]
Lanzamento e versións
Versións para PC
O xogo funciona en varios sistemas operativos, incluíndo Microsoft Windows, OS X e Linux.[41][71] A maiores da versión principal do xogo, hai outras versións de Minecraft dispoñibles para PC, incluíndo Minecraft Classic e Minecraft 4k. Minecraft Classic é unha versión máis antiga de Minecraft, dispoñible en liña. A diferenza das versións posteriores, esta é gratuíta, aínda que non recibe actualizacións. Funciona de forma semellante ó modo creativo, permitindo construír e destruír calquera parte do mundo de forma individual ou nun servidor multixogador. Non hai criaturas ou personaxes non xogador neste modo, e o xogador non recibe danos. Algúns dos bloques funcionan de forma diferente xa que o seu comportamento na versión final do xogo sufriu modificacións en fases posteriores do desenvolvemento. Minecraft 4k é unha versión simplificada semellante á versión Classic desenvolvida para o Java 4K Game Programming Contest.[72] Nesta versión o mapa é finito, nunha grella de 64×64×64 bloques, sempre se xera o mesmo mundo e os xogadores só poden colocar ou destruír bloques de herba, terra, madeira, pedra, follas e ladrillo.[73]
Minecraft: Windows 10 Edition é unha versión exclusiva para o sistema operativo Windows 10 de Microsoft. A beta desta versión publicouse na Windows Store o 29 de xullo de 2015.[74] Inclúe a capacidade de xogar con amigos de Xbox Live (aínda que non cos que teñen a versión para Xbox One), e xogar en modo multixogador local con aqueles que teñen a versión Pocket Edition. Outras características desta versión inclúen a capacidade de usar esquemas de control múltiples, como controlador, teclado ou pantalla táctil, así como gravar vídeos e tomar capturas de pantalla no xogo mediante o sistema interno GameDVR.[75]
Versións para consolas
A versión de Xbox 360 do xogo, desenvolvida por 4J Studios, publicouse o 9 de maio de 2012.[76][77] O 22 de marzo de 2012 anunciouse que Minecraft sería o xogo insignia nunha nova promoción de Xbox Live chamada Arcade NEXT.[77] Esta versión diferénciase da versión para PC en varias características, incluíndo un sistema de elaboración de obxectos e bloques novo, unha interface de control diferente, titoriais dentro do propio xogo, un modo multixogador a pantalla dividida e a capacidade de xogar xunto con amigos a través do servizo Xbox Live.[78] Os mundos nesta versión non son infinitos, e conteñen muros invisibles que os delimitan.[79] Na súa orixe esta versión era semellante en contido a versións anteriores de PC, recibindo actualizacións graduais para achegala á versión máis recente de PC.[76][80][81]
Durante a Gamescom de 2013, Sony anunciou que Minecraft publicaríase como título de lanzamento da PlayStation 4, para publicarse posteriormente tamén nas plataformas PlayStation Vita e PlayStation 3.[82] Porén, esta versión sufriu un atraso posterior que impediu que se publicase na mesma data que a consola.[83] A versión para PlayStation 3 publicouse o 17 de decembro de 2013, a de PlayStation 4 o 4 de setembro de 2014,[6] e a de PlayStation Vita o 14 de outubro de 2014 en Norteamérica e ó día seguinte en Europa.[84] Da mesma forma que as versións de Xbox, as versións de PlayStation foron desenvolvidas por 4J Studios, sendo case idénticas á versión de Xbox 360.[85]
Na súa conferencia de prensa na E3 de 2013, Microsoft amosou un avance de Minecraft: Xbox One Edition.[86] Esta versión sería semellante á versión de Xbox 360, pero incluíndo mundos meirandes, capacidades multixogador adicionais e outras melloras, e publicouse o 5 de setembro de 2014.[87] A versión Minecraft: Wii U Edition publicouse o 17 de decembro de 2015. Esta versión tivo un lanzamento en formato físico o 17 de xuño de 2016 en Norteamérica,[88] o 23 de xuño de 2016 no Xapón,[89] e o 30 de xuño en Europa.[90]
Finalmente, estas versións para consolas chegaron ao seu fin de desenvolvemento coa actualización 1.13: Aquatic Update. Este final do desenvolvemento foi causado porque as consolas da antigüa xeración (PS3, Wii U, Xbox 360...) non tiñan a capacidade tecnolóxica de seguir correndo o xogo, quedándose todas elas nunha agrupación de versións bautizada polo propio Mojang coma Legacy Edition (Edición de Legado).
As consolas da nova xeración (Xbox One, PlayStation 4, Nintendo Switch...) pasaron á versión Bedrock Edition, a sucesora da versión Pocket Edition que nun principio só estaba dispoñíbel para dispositivo móbiles.[91]
Pocket Edition
O 16 de agosto de 2011 publicouse a versión Minecraft: Pocket Edition para a Xperia Play no Android Market, en forma de versión alfa. Para outros dispositivos compatibles publicouse posteriormente o 8 de outubro de 2011,[92][93] e unha versión para iOS foi publicada o 17 de novembro de 2011.[94] Pouco despois de que Microsoft adquirise Mojang publicouse unha adaptación do xogo para Windows Phone.[95] Esta adaptación concentrouse no aspecto da construción creativa e o aspecto de supervivencia primitivo do xogo, sen conter tódalas características da versión para PC. Jens Bergensten indicou no seu Twitter que a versión Pocket Edition de Minecraft estaba escrita en C++ e non en Java, xa que iOS non podía dar soporte a esta última.[96] Esta versión recibiu actualizacións graduais de contido,[97] e o 10 de decembro de 2014 publicouse unha adaptación de Pocket Edition para as plataformas Windows Phone 8.1.[98] O 2 de abril de 2014 publicouse unha versión de Minecraft baseada na Pocket Edition para a plataforma Amazon Fire,[99] e o 29 de xullo de 2015 publicouse unha versión do xogo baseada tamén na Pocket Edition para Windows 10.[100]
Raspberry Pi
Na MineCon de 2012 revelouse unha versión de Minecraft para a Raspberry Pi. Mojang afirmou que esta edición sería semellante á Pocket Edition, nunha das súas versións anteriores, e coa capacidade engadida de usar comandos de texto para editar o mundo do xogo. Nesta versión os xogadores poden abrir o código do xogo e usar linguaxe de programación para manipular obxectos do xogo.[101] Esta versión filtrouse o 20 de decembro de 2012 aínda que a versión filtrada foi retirada ó pouco tempo,[102] e publicouse de forma oficial o 11 de febreiro de 2013.[103]
Realidade virtual
A modificación coñecida como Minecraft VR desenvolveuse para fornecer soporte de realidade virtual á versión orixinal en Java de Minecraft, orientada ó hardware Oculus Rift. Un fork do xogo coñecido como Vivecraft adaptou esta modificación á OpenVR, orientada para dar soporte ó sistema HTC Vive.[104] O 15 de agosto de 2016 Microsoft lanzou soporte oficial para o Oculus Rift na versión Windows 10 Edition do xogo.[104] Trala súa publicación, a modificación Minecraft VR detivo o seu desenvolvemento por mor de avisos de infracción de marca rexistrada por parte de Microsoft, mentres que a versión Vivecraft foi apoiada por mor do seu soporte para Oculus Rift e por considerarse superior á modificación orixinal.[104]
Education Edition
En xaneiro de 2016 Microsoft anunciou unha ferramenta educativa chamada Minecraft: Education Edition ou MinecraftEDU, baseada no xogo e cunha data de publicación planeada para ese mesmo ano.[105] Minecraft xa fora usado nalgunhas escolas do mundo para a ensinanza de varias materias, incluíndo ciencias, tecnoloxía, enxeñaría, matemáticas e arte.[106] Esta versión presenta varias diferenzas coa versión principal de Minecraft. O concepto principal é o mesmo, pero os personaxes dos estudantes poden reter as súas características en MinecraftEDU. Os estudantes poden descargar o xogo na súa propia casa sen precisar adquirir unha licenza propia, e poden tomar fotografías dentro do xogo, que se almacenan nun caderno en liña no que poden incluír anotacións e que poden compartir con outros estudantes.[107]
Contido xerado por usuarios
Existe unha gran variedade de contido xerado por usuarios dispoñible en Internet para Minecraft. As modificacións do código do xogo engaden unha variedade de cambios na mecánica do xogo, dende a inclusión de novos bloques, obxectos e inimigos ata conxuntos completos de mecanismos para elaborar.[108][109] Para facilitar a creación e instalación destas modificacións, Mojang anunciou en novembro de 2012 que tiña planeado engadir unha API oficial ó xogo.[43]
Tamén hai dispoñibles paquetes de texturas creados pola comunidade que alteran as texturas e o HUD do xogo.[110] En xullo de 2013 estes paquetes de texturas foron substituídos por "paquetes de recursos", mantendo o mesmo papel pero permitindo incluír sons personalizados a maiores.[111] A comunidade de modding creou tamén diversos mapas, habitualmente con regras específicas, desafíos, crebacabezas e misións personalizadas, compartindo estes mapas con outros xogadores.[36] Na versión 1.3 do xogo de agosto de 2012, Mojang engadiu o modo de aventura[37] para os mapas personalizados, e na versión 1.4 de outubro Mojang engadiu os bloques de comandos,[39] creados especificamente para este tipo de mapas. Na versión 1.9 de 2015 Mojang engadiu dúas novas versións destes bloques de comandos, de novo creados especificamente para os mapas personalizados.[112]
A versión Xbox 360 Edition engadiu soporte para contido de descarga, dispoñible para a súa compra na Xbox Games Store. Os paquetes de contido para esta versión inclúen habitualmente visualizacións personalizadas para os personaxes.[113] Esta versión recibiu soporte para paquetes de textura posteriormente, ademais doutros paquetes que incluían cambios para os sons, música e interface do xogo.[114]
Recepción
Comercial
O 12 de xaneiro de 2011 Minecraft superou o millón de copias vendidas, menos dun mes despois de entrar na súa fase beta.[115][116] Naquel momento o xogo non tiña unha compañía encargada da súa publicación e non tivera publicidade comercial agás o boca a boca dos xogadores,[117] e varias referencias en medios populares como a tira cómica de Penny Arcade.[118] En abril de 2011 Persson estimou que conseguira uns ingresos de 23 millóns de euros con Minecraft, cunhas 800 000 vendas da versión alfa e máis dun millón de vendas da versión beta.[119] En novembro de 2011, antes da publicación do xogo completo, a beta de Minecraft superou os 16 millóns de usuarios rexistrados e uns 4 millóns de vendas.[120] En marzo de 2012 o xogo converteuse no sexto videoxogo de PC máis vendido de tódolos tempos.[121] A data de 10 de outubro de 2014 o xogo levaba 17 millóns de copias vendidas en PC, converténdose no videoxogo máis vendido de tódolos tempos nesta plataforma.[122] Nesa mesma data o xogo vendera máis de 60 millóns de copias no conxunto de tódalas plataformas nas que foi publicado, converténdose nun dos videoxogos máis vendidos de tódolos tempos.[122][123] O 25 de febreiro de 2014 o xogo acadou os 100 millóns de usuarios rexistrados,[124] e a data de xuño de 2016 o número de vendas superou os 106 millóns de copias,[125] converténdose desta forma no videoxogo de PC máis vendido ata esa data e o segundo videoxogo máis vendido de tódolos tempos só por detrás do Tetris.[126]
A versión de Minecraft para a Xbox 360 comezou a dar beneficios nas primeiras 24 horas trala súa publicación en 2012, superando o récord de vendas da plataforma Xbox Live cuns 400 000 xogadores en liña.[127] Tras unha semana no Xbox Live Marketplace, Minecraft vendeu máis dun millón de copias nesta plataforma.[128] GameSpot anunciou en decembro de 2012 que Minecraft vendera 4,48 millóns de copias dende a súa estrea no Xbox Live Arcade en maio de 2012.[129] En 2012 Minecraft foi o título con maior número de vendas no Xbox Live Arcade, e o cuarto título con máis xogadores únicos por día.[130] A data de abril de 2014 a versión para Xbox 360 vendera uns 12 millóns de copias.[131] A maiores, Minecraft: Pocket Edition chegou ese mesmo mes ó número de 21 millóns de copias vendidas.[132] A versión para PlayStation 3 vendeu máis dun millón de copias en cinco semanas,[133] e a publicación da versión para PlayStation Vita aumentou as vendas totais de Minecraft nun 79%, vendendo máis copias que as versións de PS3 e PS4 e converténdose na maior publicación de Minecraft nunha consola de Sony.[134] En total, Minecraft supuxo un aumento dos beneficios internos de Microsoft duns 63 millóns de dólares no segundo cuarto do ano fiscal de 2015.[135]
Crítica
| Recepción | ||||||||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|
| ||||||||||||||||||||||||||
Minecraft recibiu eloxios da crítica pola liberdade creativa que fornece ós xogadores, así como pola súa capacidade de facilitar as mecánicas de xogo emerxentes.[156][157][158] A crítica valorou positivamente o complexo sistema de elaboración de Minecraft, indicando que é un aspecto importante da mecánica de xogo de final aberto do xogo.[147] A maioría de publicacións destacaron os gráficos "de bloque" do xogo, con IGN describíndoos como "instantaneamente memorables".[12] Os críticos loaron tamén os elementos de aventura, indicando que o xogo crea un bo balance entre a exploración e a construción.[147] O modo multixogador recibiu críticas xeralmente positivas, con IGN comentando que "a aventura é sempre mellor con amigos".[12] Jaz McDougall de PC Gamer recomendou Minecraft, cualificándoo como "intuitivamente interesante e dunha diversión contaxiosa, cun alcance sen igual para a creatividade e as experiencias memorables".[155] O xornal The New York Times considerouno o introdutor de millóns de nenos ó mundo dixital, afirmando que as súas mecánicas de xogo básicas son loxicamente análogas ós comandos de computadora.[159]
As críticas negativas centráronse na falta de titoriais e instrucións do xogo, dificultando que novos xogadores aprendesen as mecánicas do mesmo, e IGN destacou negativamente a complexidade da configuración dos servidores multixogador.[12] Os críticos tamén resaltaron problemas de gráficos que teñen lugar de forma periódica,[147] e GameSpot afirmou no 2009 que o xogo tiña unha "aparencia de non terminado", engadindo que "algúns elementos semellan incompletos ou postos xuntos ás presas".[147]
Unha crítica da versión alfa por parte de Scott Munro do xornal Daily Record dixo dela que era "xa algo especial" e instou ós seus lectores a mercala.[160] Jim Rossignol de Rock, Paper, Shotgun tamén recomendou a versión alfa do xogo, cualificándoa de "unha especie de Stalker xerativo de LEGO en 8-bits".[161] O 17 de setembro de 2010 a tira cómica en liña Penny Arcade comezou unha serie de cómics e novas sobre a adicción que xeraba o xogo.[162]
A versión para Xbox 360 recibiu críticas positivas en xeral, aínda que a súa valoración final non foi tan boa como a da versión para PC. Os críticos amosaron descontento pola falta de características como o soporte para mods e parte do contido presente na versión para PC, pero eloxiaron o engadido dun titorial, das suxestións durante o xogo e das receitas de elaboración, indicando que facían que o xogo resultase máis doado de usar.[150]
Minecraft: Pocket Edition recibiu críticas mixtas. Malia que a crítica apreciou os controis intuitivos nesta versión do xogo, amosou descontento pola falta súa de contido. A incapacidade no xogo de colectar recursos e elaborar obxectos, así como a súa falta de inimigos hostís e limitación no tipo de bloques foron especialmente criticados.[149][163][164] As críticas posteriores foron mellores grazas ás consecutivas actualizacións que foi recibindo esta versión.[149][165]
Premios e nomeamentos
En xullo de 2010 PC Gamer incluíu a Minecraft na cuarta posición da súa lista de "mellores videoxogos para xogar no traballo".[166] En decembro dese mesmo ano Good Game seleccionou a Minecraft como "Mellor Xogo de Descarga" de 2010,[167] Gamasutra nomeouno o oitavo mellor xogo do ano e o oitavo mellor xogo independente do ano,[168][169] e Rock, Paper, Shotgun nomeouno o seu "xogo do ano".[170] Indie DB outorgoulle o premio de Xogo Independente do Ano 2010 segundo o escollido polos seus votantes, ademais de dous de cinco premios de Escolla dos Editores ó xogo máis innovador e o mellor xogo independente dun só xogador.[171] PC Gamer UK outorgoulle tamén o seu premio de "Mellor Xogo do Ano".[172] O xogo foi nomeado ó Gran Premio Seumas McNally no Independent Games Festival de 2011, gañando o premio a maiores de ser o máis votado tamén no Premio da Audiencia.[173][174] Nos Game Developers Choice Awards de 2011 Minecraft gañou premios nas categorías de "Mellor Xogo de Estrea", "Mellor Xogo de Descarga" e o "Premio á Innovación".[175][176] Ese mesmo ano gañou tamén "Premio das Artes dos Videoxogos" de GameCity.[177]
O 5 de maio de 2011 Minecraft foi seleccionado como un dos 80 xogos que estarían no Smithsonian American Art Museum como parte da exhibición The Art of Video Games que se abriu o 16 de marzo de 2012.[178][179] Na edición de 2011 dos Spike Video Game Awards, Minecraft gañou o premio de "Mellor Xogo Independente" e foi nomeado na categoría de "Mellor Xogo de PC".[180][181] No 2012, na edición dos British Academy Video Games Awards, Minecraft foi nomeado e Notch recibiu o "Premio Especial".[182] Tamén no 2012 a edición para o XBOX Live Arcade recibiu o Golden Joystick Award na categoría de "Mellor Xogo de Descarga",[183] e un premio TIGA na categoría de "Mellor Xogo Arcade".[184] No 2013 foi nomeado na categoría de "Xogo Familiar do Ano" na edición dese ano dos British Academy Video Games Awards.[185] A edición para consolas gañou o premio TIGA ó "Xogo do Ano" en 2014.[186] No 2015 o xogo acadou a 6ª posición na lista de "15 Mellores Xogos dende 2000" de USgamer,[187] e no 2016 Minecraft acadou o 6º posto na lista da revista Time dos "50 Mellores Videoxogos de Tódolos Tempos".[188]
Minecraft: Story Mode
- Artigo principal: Minecraft: Story Mode.
Minecraft: Story Mode, un xogo episódico derivado desenvolvido por Telltale Games en colaboración con Mojang, anunciouse en decembro de 2014. É un xogo narrativo e guiado polas escollas do xogador, con cinco episodios máis outros tres en formato de descarga dixital, publicado para Microsoft Windows, OS X, iOS, PlayStation 3, PlayStation 4, Xbox 360 e Xbox One o 13 de outubro de 2015.[189][190][191] Un disco físico con tódolos episodios foi publicado para as consolas o 27 de outubro dese mesmo ano.[191] En agosto de 2015 nunha entrevista con The Verge confirmouse unha versión para a Wii U.[192]
Impacto cultural
As redes sociais como YouTube, Facebook e Reddit xogaron un papel importante no aumento da popularidade de Minecraft.[193] Nunha investigación da Escola Annenberg de Comunicación da Universidade de Pensilvania concluíu que un terzo dos xogadores de Minecraft coñeceran o xogo a través de vídeos en Internet.[194] En 2010 os vídeos relacionados con Minecraft comezaron a gañar visitas en YouTube. Estes vídeos adoitan conter gravacións do xogo e narracións sobre elas.[195] A data de maio de 2012, máis de 4 millóns de vídeos relacionados con Minecraft foran subidos a YouTube.[196] Algúns dos comentaristas máis populares destes vídeos foron contratados por Machinima.[195] The Yogscast é unha organización británica que produce vídeos sobre Minecraft de forma regular, con miles de millóns de visitas.[195][197]
Hai varias referencias a Minecraft noutros videoxogos, como por exemplo nos xogos RuneScape, Torchlight II, Borderlands 2, Choplifter HD, Super Meat Boy, The Elder Scrolls V: Skyrim, The Binding of Isaac, Team Fortress 2 e FTL: Faster Than Light.[198] O músico electrónico deadmau5 incluíu tamén referencias ó xogo nas súas actuacións.[199] O vídeo musical de Lady Gaga para o tema "G.U.Y." inclúe a representación dunha simulación do xogo.[200] Trala publicación de Minecraft houbo outros videoxogos publicados con diversas semellanzas con el, algúns deles cualificados de "clons". Algúns exemplos destes inclúen os videoxogos Ace of Spades, CastleMiner, CraftWorld, FortressCraft, Terraria e Total Miner.[201]
Adaptacións
No ano 2012 Mojang recibiu ofertas de varios produtores de Hollywood para producir programas de televisión relacionados con Minecraft. Porén, Mojang afirmou que só se involucraría nese tipo de proxectos cando "a idea correcta aparecese".[196] En decembro dese ano publicouse un documental sobre o desenvolvemento de Mojang e Minecraft. Titulado Minecraft: The Story of Mojang, o filme foi producido por 2 Player Productions.[202] O segundo episodio da 17ª tempada da serie de animación South Park titulado "Informative Murder Porn" representa ós nenos da serie distraendo ós seus pais con Minecraft para que non pelexen entre eles.[203][204] O 27 de febreiro de 2014 Notch revelou que Mojang estaba en proceso de conversas con Warner Bros. para un filme de Minecraft que sería producido por Roy Lee e Jill Messick.[205][206] O 8 de outubro de 2014, o directivo de Mojang Vu Bui afirmou que o filme estaba "nos seus primeiros días de desenvolvemento", afirmando que era unha produción de grande orzamento e que probablemente non se publicaría ata 2018.[207][208] Finalmente a data planeada de publicación do filme é o 24 de maio de 2019, estando codirixido por Shawn Levy e Rob McElhenney e escrito por Jason Fuchs.[209][210][211]
Produtos promocionais
O 6 de xuño de 2012 lanzouse unha colección de LEGO baseada en Minecraft baixo o nome de LEGO Minecraft.[212] Esta colección céntrase ó redor do personaxe xogador por defecto e os Creepers.[213] Mojang colabora coa empresa Jinx, unha tenda de produtos en liña, para vender produtos relacionados con Minecraft, como roupa, picos de escuma e xoguetes das criaturas do xogo.[50] A data de maio de 2012 as vendas de produtos sobre Minecraft superaron o millón de dólares en ingresos, sendo as camisetas e calcetíns os produtos máis populares.[196] En marzo de 2013 Mojang asinou un contrato coa editorial de libros infantís Egmont Group para crear libros e revistas sobre Minecraft.[214][215][216]
MineCon (Minecraft Live)
- Artigo principal: MineCon.
As MineCon eran unhas convención presenciais (e, nalgúns casos, online) oficiais adicadas a Minecraft. A primeira edición tivo lugar en novembro de 2011 no hotel e casino Mandalay Bay de Las Vegas.[217][218] A edición de 2012 tivo lugar en Disneyland París en novembro dese ano.[219][220] MineCon 2013 tivo lugar en Orlando en novembro dese ano,[221] a edición de 2015 tivo lugar en Londres no mes de xullo,[222] e a de 2016 en Anaheim (California) no mes de setembro.[223]
As MineCon deixaron de producirse de maneira presencial a partir do 2020 debido a crise da COVID-19, aínda que había planeada unha para o mesmo ano, e o mesmo ocorreu en 2021.[224]
Dende aquel 2020 as MineCon presenciais foron completamente substituídas polas Minecraft Live, directos en YouTube que duraban unhas horas e nas que se anunciaban as novas que estaban por vir para as novas actualización, a modo de repaso. Con estas, tamén veu a mob vote, unha votación aberta a todas as persoas que compraran Minecraft nas que podían elixir de entre tres criaturas (mobs, en inglés, coma se lle soe chamar) para que fora introducida no xogo. Pola división que isto causaba, a día de hoxe causan moita polémica.[225]
Notas
Todas as referencias en inglés agás cando se indique o contrario
Véxase tamén
Bibliografía
- Gallagher, Colin (2014). Minecraft in the Classroom: Ideas, inspiration, and student projects for teachers (en inglés). Peachpit. ISBN 978-0-13-385801-3.
- Garrelts, Nate (2014). Understanding Minecraft: Essays on Play, Community and Possibilities (en inglés). McFarland. ISBN 978-0-7864-7974-0.
- Goldberg, Daniel (2013). Minecraft: The Unlikely Tale of Markus "Notch" Persson and the Game that Changed Everything (en inglés). Nova York: Seven Stories. ISBN 1-60980-537-2.
Ligazóns externas
- Páxina web oficial (en inglés)