Alfred Krawc

Alfred Krawc (tež Krawc-Dźěwinski, němsce Alfred Krautz; * 7. februara 1934 w Dźěwinje, † 15. decembra 2018 w Berlinje) bě serbski filmowc, filmowy stawiznar a awtor.

Narodźi so jako syn hórnika a domjacneje a wopytowaše za wójnski čas Dźěwinsku ludowu šulu. Po spočatnym wukubłanju na škleńcoweho dźěłaćerja bu nawabjeny na „Dźěłaćersku a bursku fakultu“ do Lipska, hdźež přińdźe přez Sorabiju do kruhow serbskich studentow. Wot 1954 studowaše stawizny wuměłstwa při Humboldtowej uniwersiće w Berlinje a bu tam w lěće 1963 promowowany.

Wot 1962 dźěłaše Krawc jako docent při wysokej šuli za film w Podstupimje-Babelsbergu. Jako filmowy stawiznar a wot 1974 wotrjadnik w Statnym filmowym archiwje NDR bě z wudawaćelom zwjazka International Directory of Cinematographers, Set- and Costume Designers in Film (12 zwjazkow, 1986–92) kaž tež Encyclopedia of film directors in the United States of America and Europe (1993). Jako čłonej mjezynarodneje federacije filmowych archiwow FIAF poradźi so jemu, hłownu zhromadźiznu tuteho zhromadźenstwa 1974 přewjesć w Budyšinje.

Krawc kmótřeše w lěće 1971 załoženju „Koła serbskich filmowcow“ a podpěraše serbske filmowe produkcije, za kotrež pisaše zdźěla tež sam scenarije. Jedyn z jeho studentow bě młody Konrad Herrmann, kiž wozjewješe w lěće 1972 Struga – wobrazy krajiny jako prěni dlěši serbski film.

Nimo toho napisa Krawc wjacore filmowe scenarije a tež knihi, kaž na přikład wo serbskim molerju Hendrichu Božidarje Wjeli.