Kito Šwjela

delnjoserbski wučer a přełožowar

Kito Šwjela (němsce Christian Schwele; * 21. februara 1836 w Zaspach, † 26. januara 1922 w Choćebuzu) bě delnjoserbski wučer, přełožowar a redaktor Bramborskeho Casnika.

Wón bu jako syn bura w delnjołužiskich Zaspach narodźeny a wopytowaše mjez 1853 a 1856 wučerski seminar w Nowej Cali. Wot 1856 hač 1861 bě Šwjela pomocny wučer pola Mjertyna Lejnika w Žargonju. Wot 1861 hač 1866 dźěłaše jako wučer we Wjelikim Wóseńku a wot 1866 w Skjarbošcu pola Drjowka. W lěće 1910 poda so na wuměnk a přesydli so do Choćebuza.

Narowny kamjeń na Sewjernym kěrchowje w Choćebuzu

Šwjela bě wjace hač 50 lět (wot 1864 hač 1915[1]) redaktor Bramborskeho Casnika (resp. Bramborskeho Serbskeho Casnika a Bramborskich Nowin) a z tym najwažniši delnjoserbski nowinar swojeje doby.

W lěće 1880 słušeše wón do sobuzałožerjow Maśicy Serbskeje. Jeho syn Bogumił Šwjela bě pozdźišo mjez sobuzałožerjemi Domowiny. Šwjelowy row nadeńdźe so na Choćebuskim Sewjernym kěrchowje.

Nóžki

Žórło

  • Gerat Hančka: Šwjela, Kito. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 558

Wotkazaj

Z Wikipedije, swobodneje encyklopedije