Michał Wjesela

serbski duchowny, přełožowar a basnik

Michał Wjesela (* 17. septembra 1863 w Kulowje, † 4. meje 1927 w Klóštrje Marijineho doła) bě serbski katolski duchowny, přełožowar a basnik.

Žiwjenje

Michał Wjesela narodźi so jako syn ratarja w Kulowje, přežiwi pak swoje dźěćace lěta w Lišej Horje pola Njeswačidła, hdźež běše jeho nan kubło kupił. Jako chowanc Serbskeho seminara w Praze 1877 do 1887 kubłaše so wón na němskim Małostronskim gymnaziju a studowaše wot lěta 1883 na Praskej uniwersiće teologiju. Jako čłon Serbowki běše Wjesela po Jurju Libšu 1885 a 1886 jeje starši a zdobom hłowny starši serbskeje studowaceje młodźiny. Wón bu 1889 na měšnika wuswjećeny a skutkowaše po tym jako kapłan w Seitendorfje a Wostrowcu. Po tym běše 1895 do 1896 farski administrator w Radworju, powoła 13. septembra 1896 za fararja do Reichenaua pola Žitawy a skutkowaše wot 1900 jako farar w Königshainje pola Wostrowca. W oktobru lěta 1926 poda so Wjesela chorowatosće dla na wuměnk do Klóštra Marijineho Doła, hdźež 1927 zemrě.

W jeho Praskim času poda Wjesela rjad stawizniskich a nabožnych nastawkow, powědančkow a basnjow do Kwětkow, časopisa Praskeje Serbowki. Na nalětnjej Schadźowance 1885 staji wón namjet za załoženje časopisa Łužiski Serb, do kotrehož podawaše někotre swójske basniske pospyty a přełožki powědančkow („Čerwjeny dwór“, 1885) a basnjow z čěšćiny kaž tež baseń „Próstwa“ (1885) francoskeho spisowaćela Sullya Prudhommea. Po studiju wzda so Wjesela wšeje spisowaćelskeje dźěławosće.

Wot lěta 1895 bě Michał Wjesela čłon Maćicy Serbskeje.

Žórle

  • Rudolf Jenč: Stawizny serbskeho pismowstwa: 2. dźěl Ludowe nakładnistwo Domowina. Budyšin 1960. str. 82–83. (hsb.)
  • Alfons Frencl: Wjesela, Michał. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 627sl.
Z Wikipedije, swobodneje encyklopedije