Mužakowski zahork

Mužakowski zahork (němsce Muskauer Hügel a Muskauer Faltenbogen, pólsce Wał Mużakowski a Łuk Mużakowa) je kónčna morena we Łužicy na hranicy mjez Pólskej a Němskej, dźělena přez doł Łužiskeje Nysy. Wona je dźěl Łužiskeje wuhrody.

Teritorij Mužakowskeho zahorka je jako mjezynarodny geopark škitany. Němski geopark bu 2003 załoženy a 2006 za narodny geopark deklarowany. Pólska strona je wot 2001 jako krajinowy park škitana. Wobě škitanej pasmje buštej 2011 zhromadnje jako Europski geopark certifikowanej, a wot 2016 jako globalny geopark UNESCO připóznatej. Hromadźe matej 580 km². Na teritoriju parka namaka so Park wjercha Pücklera w Mužakowje, kotryž bu wot UNESCO do lisćiny swětoweho kulturneho herbstwa přiwzaty.