Irak (hamtsce Irakska republika) je njewotwisny stat w juhozapadnej Aziji abo na Bliskim wuchodźe w starej Mezopotamiskej. Jeho susodźa su na juhu Kuwait a Sawdi-Arabska, na zapadźe Jordaniska, na sewjerozapadźe Syriska, na sewjeru Turkowska a na wuchodźe Iran. Na samym juhu ma Irak přistup k Persiskemu golfej. Na sewjeru Iraka nadeńdźe so Awtonomny region Kurdistan, kotryž ma swójski parlament a kurdišćinu jako hamtsku rěč. Stolica je Bagdad.
Dźensniši Irak nasta w lěće 1920 z třoch osmaniskich prowincow Bagdad, Basra a Mossul. Wot 1921 do 1958 bě z kralestwom a po wojerskim puču wot 1958 z republiku. Mjez 1979 a 2003 knježeše Saddam Husein jako diktator. Pod jeho knježerstwom wjedźeše Irak wójnu přećiwo Iranej (1980–88, z podpěru Sowjetskeho zwjazka a Zjednoćenych statow), Kuwaitej (1991) kaž tež dwójce přećiwo mjezynarodnej koaliciji pod wjednistwom Zjednoćenych statow (1991 a 2003). Wot kónca Huseinoweho knježerstwo knježi w někotrych kónčinach Iraka byrgarska wójna. Wot 2014 su kónčiny na sewjerozapadźe kraja pod kontrolu tak mjenowaneho „Islamskeho stata“.
