Sumatera Barat

Artikel utamo untuak bagian ko adolah: Sajarah Sumatera Barat

Asa mulo namo Provinsi Sumatera Barat bamulokan pado zaman Vereenigde Oostindische Compagnie (VOC), pagunonyo untuak sabutan wilayah administratifnyo yakni Hoofdcomptoir van Sumatra's westkust. Kamudian sairiang makin mangueknyo pangaruah politik jo ekonomi VOC, sampai abaik ka 18 wilayah administratif iko alah mancakuik kawasan pantai barat Sumatera muloi dari Barus sampai Indrapura.^[8]

Sairiang jo kajatuahan Karajaan Pagaruyuang, jo talibeknyo Balando dalam Parang Padri, pamarintah Hindia Balando mulai manjadikan kawasan padalaman Minangkabau sabagai bagian dari Pax Nederlandica, kawasan nan barado dalam pangawasan Balando, sarato wilayah Minangkabau iko dibagi ateh Residentie Padangsche Benedenlanden jo Residentie Padangsche Bovenlanden.^[9]

Salanjuiknyo dalam pakambangan administrasi pamarintahan kolonial Hindia Balando, daerah iko tagabuang dalam Gouvernement Sumatra's Westkust tamasuak wilayah Residentie Bengkulu nan baru disarahkan Inggirih bakeh Balando. Kamudian dipalaweh lai jo mamasuakan Tapanuli, jo Singkil. Tapi pado taun 1905, wilayah Tapanuli ditingkekkan statuihnyo manjadi Residentie Tapanuli, sadangkan wilayah Singkil diagiahkan kapado Residentie Atjeh. Kamudian pado taun 1914, Gouvernement Sumatra's Westkust, diturunkan statuihnyo manjadi Residentie Sumatra's Westkust, jo manambahkan wilayah Kapulauan Mentawai di Samudera Hindia ka dalam Residentie Sumatra's Westkust, sarato pado taun 1935 wilayah Kerinci digabuangkan juo ka dalam Residentie Sumatra's Westkust. Samantaro wilayah Rokan Hulu jo Kuantan Singingi diagiahkan kapado Residentie Riouw pasca pamacahan Gouvernement Sumatra's Oostkust, sarato juo mambantuak Residentie Djambi pado periode nan ampiang basamoan.^[8]

Pado maso panduduakan tentara Japang, Residentie Sumatra's Westkust barubah namo manjadi Sumatora Nishi Kaigan Shu. Ateh dasa geostrategis militer, daerah Kampar/ Bangkinang dikaluakan dari Sumatora Nishi Kaigan Shu jo dimasuakkan ka dalam wilayah Rhio Shu.^[8]

Pado awal kemerdekaan Indonesia pado taun 1945, wilayah Sumatera Barat tagabuang dalam provinsi Sumatera nan bapusaik di Bukittinggi. Pado taun 1949, Provinsi Sumatera kamudian dipacah manjadi tigo provinsi, yakni Sumatera Utara, Sumatera Tangah, jo Sumatera Selatan. Sumatera Barat sarato Riau jo Jambi marupoan bagian dari karesidenan di dalam Provinsi Sumatera Tengah. Pado maso PRRI di Sumatera, Pamarintah Pusaik badasakan Undang-undang darurat nomor 19 taun 1957, Provinsi Sumatera Tengah dipacah baliak manjadi tigo provinsi yakni Provinsi Sumatera Barat, Provinsi Riau, dan Provinsi Jambi. Wilayah Kerinci nan sabalunnyo tagabuang dalam Kabupaten Pesisir Selatan Kerinci, digabuangkan ka dalam Provinsi Jambi sabagai kabupaten tasandiri. Baitu pulo wilayah Kampar, Rokan Hulu, jo Kuantan Singingi ditetapkan masuak ka dalam wilayah Provinsi Riau. Salanjuiknyo ibu kota provinsi Sumatera Barat nan baru iko adolah masih tatok di Kota Bukittinggi. Namun badasakan Suraik Kaputusan Gubernur Sumatera Barat No. 1/g/PD/1958, tanggal 29 Mei 1958 sacaro de facto manetapkan Kota Padang manjadi ibu kota Provinsi Sumatera Barat.^[8]

Sumatera Barat talatak di pasisia barat bagian tangah pulau Sumatera nan tadiri dari dataran randah di pantai barat jo dataran tinggi vulkanik nan tabantuak dek Bukik Barisan. Provinsi iko mamiliaki daratan salaweh 42.297,30 km² nan sarupo jo 2,17% laweh Indonesia. Dari laweh tasabuik, labiah dari 45,17% marupoan kawasan nan masih tatutuik dek hutan linduang. Garih pantai provinsi ko sadoalahnyo basantuahan jo Samudera Hindia sapanjang 2.420.357 km jo laweh parairan lauik 186.580 km².^[10] Kapulauan Mentawai nan talatak di Samudera Hindia tamasuak ka dalam provinsi iko.

Co daerah lainnyo di Indonesia, iklim Sumatera Barat sacaro umum basipaik tropis jo suhu udaro nan cukuik tinggi, iyolah antaro 22,6 °C sampai 31,5 °C. Garih khatulistiwa tapek malalui provinsi iko di kecamatan Bonjol, kabupaten Pasaman. Di provinsi iko bahulu sajumlah sungai gadang nan bamuaro di pantai timur Sumatera cando Batang Hari (baulu di Gunuang Rasan), Siak, Inderagiri (disebut sabagai Batang Kuantan di bagian hulunyo), Rokan, jo Kampar.^[11] Samantaro sungai-sungai nan bamuaro di provinsi ko surang umumnyo pendek-pendek, co Batang Anai, Batang Arau, jo Batang Tarusan.^[11]

Danau di Sumatra Barat di antaronyo: Maninjau (99.5 km²), Singkarak (130.1 km²), Diateh (31.5 km²), Dibawah (14.0 km²), Talang (5.0 km²).^[11] Gunuang jo gunuang api nan ado di provinsi ko antaro lain: Kurinci (3.805 m; satangahnyo dalam wilayah Jambi^[12]), Marapi (2.891 m), Sago (2.261 m), Singgalang (2.877 m), Talamau (2.913 m), Talang (2,572 m), Tandikek (2,438 m).^[13]

Barikuik daftar gunuang nan ado di Sumatera Barat:^[11]

Sumatera Barat marupolan salah satu daerah rawan gampo di Indonesia dek sabab lataknyo ado di jalur patahan Semangko tapek di antaro patamuan duo lempeng banua gadang, iyolah Eurasia jo Indo-Australia.^[14] Gampo bumi gadang nan tajadi akhia-akhia iko di Sumatera Barat di antaronyo adolah Gampo bumi 30 September 2009 jo Gampo bumi Kapulauan Mentawai 2010.

Karagaman hayati

• Flora Fauna Sumatera Barat
• 
  Kuau Rajo
• 
  Batang kayu andaleh
• 
  Karubuik (Rafflesia arnoldii) di Palupuah
• 
  Harimau sumatra
• 
  Karubuik Amorphophallus titanum

Sumatera Barat marupoan salah satu provinsi di Indonesia nan kayo jo sumber kaanekaragaman hayati. Sabagian gadang wilayahnyo masih marupoan hutan tropis alami jo dilinduangi. Babagai spesies langka masih dapek dijumpoi, misalnyo Rafflesia arnoldii (bungo tagadang di dunia), harimau sumatera, siamang, tanuak, ruso, baribeh, jo babagai jinih buruang jo ramo-ramo.^[15]

Kaanekaragaman hayati di Sumatera Barat dijago dalam Kawasan Suaka Alam (KSA) jo Kawasan Palestarian Alam (KPA) nan tasebar di babagai kabupaten dan kota. KSA jo KPA nan ado mampunyoi fungsi jo caro panjagoan kaanekaragaman hayati nan babeda-beda. KSA/KPA dalam bantuak taman nasional ado duo di provinsi iko, yaitu Taman Nasional Siberut nan talatak di Pulau Siberut, Mentawai jo Taman Nasional Kerinci Seblat nan mambantang di ampek provinsi (Sumatera Barat, Jambi, Bengkulu, jo Sumatera Selatan).^[16][17] Salain kaduo taman nasional tasabuik ado juo KSA/KPA lain, di antaronyo:^[15]

Sumber dayo alam

Sumber dayo alam nan ado di Sumatera Barat adolah barupo batu baro, batu basi, batu galena, timah hitam, seng, mangan, ameh, batu kapua (simin), kelapa sawit, kakao, gambir, hasia tani jo parikanan.

Pasisia barat jo Kapulauan Mentawai mampunyoi banyak hasia lauik nan banilai ekonomi tinggi. Nalayan dapek manangkok baragam jinih ikan di kawasan ko. Ikan kerapu, udang, rumpuik lauik, kepiting, jo mutiara marupokan hasia lauik andalan. Daerah pasisia pantai, utamonyo kawasan kapulauan, mahasilkan banyak karambia. Di daerah darek ado banyak parak gatah, cangkiah, jo merica. Kawasan darek nan tatutuik dek utan mahasilkan kayu. Tantangan barek dari pengambangan patanian jo parak di kawasan ko iyolah medan nan balereang jo babukik-bukik.

Bahan galian banyak juo ado di daerah ko. Salah satunyo iyolah batuan kapua nan manjadi bahan pokok untuak industri simin. PT Semen Padang alah mamanfaatan kakayoan alam ko salamo puluahan taun. Batu kapua ado banyak di sakitar Padang, Danau Singkarak, jo Padangpanjang. Di Padangpanjang, deposit batu kapua dapek mancapai 43 juta ton. Bahan galian lainnyo adolah batu baro di Sawahlunto sarato obsidian jo batu andesit di Padang Pariaman. Mato aia nan malimpah juo alah maagiah banyak manfaaik untuak pambangunan daerah ko. Parairan Danau Singkarak jo Maninjau alah lama dipakai sabagai pambangkik listrik tanago aia. Mato aia ko juo mampunyoi potensi gadang untuak diolah sarato dikamehan manjadi aia mineral.

Populasi panduduak Sumatera Barat tiok taunnyo maalami paningkatan. Baturuik-turuik manuruik Sensus Panduduak, panduduak Sumatera Barat mancapai 2,8 juta urang pado 1971, 3,4 juta urang pado 1981, 4 juta urang pado 1990, 4,25 juta urang pado 2000, lalu 4,85 juta urang pado 2010.^[18] dan pado tun 2020 mancapai 5,53 juta urang. Pado Sensus Panduduak 2020, ado 5,53 juta urang jo 2.786.360 urang laki-laki sarato 2.748.112 urang padusi.^[19]

Pado taun 2015, ado 44,2% panduduak Sumatera Barat nan tingga di daerah urban.^[20] Populasi urban di Sumatera Barat tapusek di pasisia barat-tangah provinsi jo dataran tinggi. Ado tigo kota jo populasi labiah dari 100.000 urang. Padang marupokan area metropolitan utamo jo populasi mancapai 909.040 urang pado taun 2020. Samantaro duo kota lainnyo talatak di Dataran Tinggi Minangkabau, yaitu Payokumbuah jo Bukiktinggi, jo populasi tiok kotanyo 139.576 jo 121.028 manuruik Sensus Panduduak taun 2020.

Etnik

Artikel utamo untuak bagian ko adolah: Urang Minangkabau dan Urang Mentawai

Mayoritas panduduak Sumatera Barat marupoan urang Minangkabau, nan manuruik data Badan Pusat Stastiktaun 2014 mancapai 88% panduduak. Samantaro di Kapulauan Mentawai diuni dek Urang Mentawai nan mancapai 1% populasi Sumatera Barat. Di daerah Pasaman jo Pasaman Barat, salain urang Minang ado pulo urang Batak jo urang Mandailing. Di daerah-daerah transmigrasi bak cando di Sitiung, Lunang Silaut, Padang Gelugur dan lainnyo ado pulo urang Jao nan mancapai 4% populasi Sumatera Barat. Sabagian di antaronyo adolah katurunan imigran badarah Jao dari Suriname nan mamiliah baliak ka Indonesia pado maso akhia taun 1950-an. Dek Presiden Soekarno wakatu itu diputuihan basonyo ditampekan di sakitaran daerah Sitiung. Hal iko indak juo lapeh dari aspek politik pamarintah pusek sasudah rekapitulasi PRRI di Provinsi Sumatera Barat nan jolong tabantuak katiko itu. Di sabagian kota di Sumatera Barat co Kota Padang, ado baragam etnis lain cando Tionghoa, Tamil, jo Nieh.

Salain itu, ado juo baragam etnis nusantara lainnyo nan masuak sasudah kamardekaan sabagai parantau jo bakarajo di babagai bidang.

Bahaso

Artikel utamo untuak bagian ko adolah: Bahaso Minangkabau dan Bahaso Mentawai

Bahaso nan digunokan dalam kasaharian iolah bahaso daerah iyolah bahaso Minangkabau nan punyo baragam dialek, sarupo dialek Bukittinggi, dialek Pariaman, dialek Pasisia Selatan, jo dialek Payakumbuh. Di daerah Pasaman jo Pasaman Barat nan babatehan jo Sumatera Utara, ditutuakan pulo bahaso Mandailing. Samantaro itu di daerah Kapulauan Mentawai dipakai bahaso Mentawai.

Agamo

Caliak pulo Islam di Sumatera Barat

Islam adolah agamo mayoritas nan dianuik dek panduduak Sumatera Barat nan kabanyakan pamaluaknyo adolah urang Minangkabau. Manuruik Sensus Panduduak 2020, pamaluak agamo Islam di Sumatera Barat mancapai 97,48%, kudian Protestan 1,36%, Katolik 0,93%, Buddha 0,22, jo Hindu 0,01%. Satu-satunyo kabupaten di Sumatera Barat nan indak mayoritas Islam adolah Kapulauan Mentawai jo mayoritas Kristen (Protestan 52,36% jo Katolik 31,13%).^[21]

Babagai tampek ibadah nan dapek tasuo di satiok kabupaten jo kota di Sumatera Barat didominasi dek musajik (5.218) jo surau (9 661). Musajik tagadang adolah Musajik Rayo Sumatera Barat di Kota Padang, sadang musajik tatuo di antaronyo adolah Musajik Rayo Gantiang di Padang jo Musajik Tuo Kayu Jao di Kabupaten Solok. Arsitektur khas Minangkabau mandominasi baiak musajik maupun surau. Musajik Rayo Sumatera Barat mampunyoi bangunan babantuak gonjong, dihiasi ukiran Minang sakaligus kaligrafi. Ado juo musajik jo atok nan tadiri dari babarapo tingkatan nan makin ka ateh makin ketek jo saketek cakuang.

Salain musajik jo surau, dapek pulo tasuo tampek-tampek ibadah agamo salain Islam nan umumnyo indak didirikan di kabupaten-kabupaten di Sumatera Barat. Khusus Kabupaten Kapulauan Mentawai, inyo mampunyoi jumlah gareja paliang banyak di Sumatera Barat, yaitu 254 dari 267 gareja protestan sarato 108 dari 131 gareja katolik nan ado di Sumatera Barat. Sumatera Barat juo mampunyoi gareja-gareja tuo paninggalan Balando nan tagak di kota-kota nan jadi pusek-pusek pamarintahan zaman kolonial. Untuak panganuik agamo Buddha, ado 8 vihara nan didirikan dek komunitas urang Cino di Padang, Bukittinggi, Payakumbuh, jo Padang Panjang. Samantaro untuak tampek ibadah agamo Hindu di Sumatera Barat, hanyo ado ciek pura di Kota Padang.^[22]

Tahun	2010	2020
Jumlah panduduak	4.845.998	5.534.472
Sajarah kependudukan Sumatera Barat Sumber:[2]

Artikel utamo untuak bagian ko adolah: Daftar Gubernur Sumatera Barat dan Daftar kabupaten jo kota di Sumatera Barat

Provinsi Sumatera Barat dipimpin dek surang gubernur nan dipiliah dalam pamiliahan sacaro langsuang basamo jo wakianyo untuak maso jabatan 5 tahun. Gubernur salain sabagai pamarintah daerah baparan pulo sabagai pawakilan atau papanjangan tangan pamarintah pusek di wilayah provinsi nan kawenangannyo diatur dalam Undang-undang nomor 32 Taun 2004 jo Peraturan pemerintah nomor 19 taun 2010.

Samantaro hubuangan pamarintah provinsi jo pamarintah kabupaten jo kota bukan subordinat, masiang-masiang pamarintahan daerah tasabuik mangatur jo mauruih surang urusan pamarintahan manuruik asas otonomi jo tugeh pembantuan.

Daftar Gubernur

Artikel utamo untuak bagian ko adolah: Daftar Gubernur Sumatera Barat

Namo			Mulai manjabaik	Akhia manjabaik	Status
Karesidenan Sumatra Barat (1945–1948)
	Muhammad Sjafei		1 Oktober 1945	15 November 1945[ket. 1]
	Roesad Datuk Perpatih Baringek		15 November 1945	14 Maret 1946[ket. 2]
	Mohammad Djamil		18 Maret 1946	1 Juli 1946
	Sutan Mohammad Rasjid		20 Juli 1946	29 April 1947[23]
	Mohammad Nasroen		29 April 1947	15 April 1948[23][ket. 3]
Provinsi Sumatra Tengah (1948–1956)
	Mohammad Nasroen		15 April 1948	19 Desember 1948[23][ket. 4]
	Sutan Mohammad Rasjid		2 Januari 1949	Mei 1949	Gubernur Militer Sumatra Barat
			Mei 1949	Oktober 1949[25]	Gubernur Militer Sumatra Tengah
	Mohammad Nasroen		Oktober 1949	1 Agustus 1950[26][ket. 5]
	Ruslan Muljohardjo		9 November 1950	1 Mei 1951	Penjabat Gubernur
			1 Mei 1951	20 Desember 1956[23][ket. 6]
Provinsi Sumatra Barat (1958–sekarang)
	Kaharudin Datuk Rangkayo Basa		17 Mei 1958	5 Juli 1965[27]
	Suputro Brotodihardjo		5 Juli 1965	4 Juni 1966[28]
	Harun Zain		4 Juni 1966[ket. 7]	4 Juni 1971
			4 Juni 1971	11 April 1972[ket. 8]	Penjabat Gubernur
			11 April 1972	11 April 1977
	Azwar Anas		18 Oktober 1977	18 Oktober 1982
			30 Oktober 1982	30 Oktober 1987
	Hasan Basri Durin		30 Oktober 1987	30 Oktober 1992
			29 Desember 1992	29 Desember 1997
	Muchlis Ibrahim		29 Desember 1997	27 Maret 1999[ket. 9]
	Dunidja D.		27 Maret 1999	24 Februari 2000	Penjabat Gubernur
	Zainal Bakar		24 Februari 2000	24 Februari 2005
			24 Februari 2005	14 Maret 2005[ket. 10]
	Muhammad Thamrin		14 Maret 2005	15 Agustus 2005	Penjabat Gubernur[33][34]
	Gamawan Fauzi		15 Agustus 2005	22 Oktober 2009[ket. 11]
	Marlis Rahman		22 Oktober 2009	7 Desember 2009	Pelaksana Tugas Gubernur[35]
			7 Desember 2009[36]	15 Agustus 2010
	Irwan Prayitno		15 Agustus 2010	15 Agustus 2015[37]
	Reydonnyzar Moenek		15 Agustus 2015	12 Februari 2016	Penjabat Gubernur[38]
	Irwan Prayitno		12 Februari 2016	12 Februari 2021[39]
	Alwis		12 Februari 2021	18 Februari 2021[40]	Pelaksana Harian Gubernur
	Hamdani		18 Februari 2021[41]	25 Februari 2021	Panjabat Gubernur
	Mahyeldi Ansharullah		25 Februari 2021	patahana

Dewan Perwakilan

Artikel utamo untuak bagian ko adolah: Dewan Perwakilan Rakyat Daerah Provinsi Sumatera Barat

DPRD Sumbar baranggotakan 65 urang nan dipiliah malalui pamiliahan umum satiok limo taun sakali. Pimpinan DPRD Sumbar tadiri dari 1 Ketua jo 3 Wakil Ketua nan barasa dari partai politik pamiliak jumlah kurisi jo suaro paliang banyak. Anggota DPRD Sumbar nan tangah manjabaik kini adolah hasia Pemilu 2019 nan dilewa pado 28 Agustus 2019 dek Ketua Pengadilan Tinggi Padang, Panusunan Harahap, di Gedung DPRD Provinsi Sumatera Barat.^[42] Komposisi anggota DPRD Sumbar periode 2019-2024 tadiri dari 9 partai politik dimano Partai Gerindra adolah partai politik pamiliak kurisi paliang banyak yaitu 14 kurisi, kudian disusua dek Partai Keadilan Sejahtera, Partai Demokrat, jo Partai Amanat Nasional nan masiang-masiang maraiah 10 kurisi.

Partai politik	Jumlah kurisi dalam periode
	2004–2009	2009–2014	2014–2019	2019–2024
GOLKAR	▲ 16	▼ 9	9	▼ 8
PDIP	▼ 4	▼ 3	▲ 4	▼ 3
PPP	▼ 7	▼ 4	▲ 8	▼ 4
PAN	▼ 10	▼ 6	▲ 8	▲ 10
PKS	▲ 7	▼ 5	▲ 7	▲ 10
PBB	▲ 5	▼ 3	▼ 1	▼ 0
PKB	▼ 0	0	▲ 1	▲ 3
PKPI	▼ 0	0	0	0
PBR	(baru) 3	▼ 2
DEMOKRAT	(baru) 3	▲ 14	▼ 8	▲ 10
GERINDRA		(baru) 4	▲ 8	▲ 14
HANURA		(baru) 5	5	▼ 0
NASDEM			(baru) 6	▼ 3
Jumlah anggota	55	55	▲ 65	65
Jumlah partai	▼ 8	▲ 10	▲ 11	▼ 9

██ Indak turuik sato dalam pemilu

Pamarintahan Nagari

Artikel utamo untuak bagian ko adolah: Nagari

Sampai taun 1979 satuan pamarintahan taketek di Sumatera Barat adolah nagari, nan alah ado sabalun kamerdekaan Indonesia. Jo dibalakukannyo Undang-undang nomor 5 taun 1979 tantang pamarentahan desa, statuih nagari dihilangkan manjadi desa, jo babarapo jorong ditingkekkan statuihnyo manjadi desa. Kaduduakan wali nagari juo dihapuih jo administrasi pamarintahan dijalankan dek para kapalo desa. Namun sajak bagulianyo reformasi pamarintahan jo otonomi daerah, mako sajak taun 2001, istilah "Nagari" digunokan baliak di provinsi iko.^[43][44]

Pamarintahan nagari marupoan suatu struktur pamarintahan nan otonom, punyo teritorial nan jaleh jo manganuik adaik sabagai pangatua tata kahiduikan anggotanyo^[45], sistem iko kamudian disasuaikan jo konstitusi nan balaku di Indonesia, kini pamarintah provinsi Sumatera Barat manatapkan pamarintah nagari sabagai pangelola otonomi daerah tarandah untuak daerah kabupaten manggantikan istilah pamarintah desa nan dipakai sabalunnyo. Sadangkan untuak nagari nan ado pado sistem pamarintahan kota masih sabagai limbago adaik alun manjadi bagian dari struktur pamarintahan daerah.

Nagari pado mulonyo dipimpin sacaro basamo dek para pangulu atau datuak di nagari tasabuik, kamudian pado maso pamarintah Hindia-Belanda dipiliah salah surang dari para pangulu tasabuik untuak manjadi wali nagari. Kudian dalam manjalankan pamarintahannyo, wali nagari dibantu dek babarapo urang kapalo jorong atau wali jorong, namun kini dibantu dek sekretaris nagari (setnag) jo babarapo pagawai nagari sipil (PNS) bagantuang jo kabutuahan tiok nagari. Wali nagari iko dipiliah dek anak nagari (panduduak nagari) sacaro demokratis dalam pamiliahan lansuang untuak 6 taun maso jabatan.

Dalam sabuah nagari dibantuak Kerapatan Adat Nagari, yakni lambago nan baanggotakan Tungku Tigo Sajarangan. Tungku Tigo Sajarangan marupoan pawakilan anak nagari nan tadiri dari Alim Ulama, Cadiak Pandai (kaum intelektual), jo Niniak Mamak marupokan pamimpin suku dalam suatu nagari, samo jo Badan Permusyawaratan Desa (BPD) dalam sistem administrasi desa. Sagalo kaputuihan pantiang nan kak diambiak salalu dimusyawarahkan antaro wali nagari jo Tungku Tigo Sajarangan di Balai Adaik atau Balairung Sari Nagari.

Daftar kabupaten jo kota

Artikel utamo untuak bagian ko adolah: Daftar kabupaten jo kota di Sumatera Barat

No.	Kabupaten/kota	Pusek pamarintahan	Bupati/wali kota	Laweh wilayah (km2)[46]	Jumlah panduduak (2020)[47]	Kecamatan	Kelurahan/desa	Lambang	Peta lokasi
1	Kabupaten Agam	Lubuk Basung	Andri Warman	1.804,30	529.138	16	-/82
2	Kabupaten Dharmasraya	Pulau Punjung	Sutan Riska Tuanku Kerajaan	2.961,13	228.591	11	-/52
3	Kabupaten Kepulauan Mentawai	Tuapejat	Yudas Sabaggalet	6.011,35	87.623	10	-/43
4	Kabupaten Lima Puluh Kota	Sarilamak	Safaruddin Datuak Bandaro Rajo	3.571,14	383.525	13	-/79
5	Kabupaten Padang Pariaman	Parit Malintang	Suhatri Bur	1.332,51	430.626	17	-/103
6	Kabupaten Pasaman	Lubuk Sikaping	Benny Utama	3.947,63	299.851	12	-/37
7	Kabupaten Pasaman Barat	Simpang Ampek	Hamsuardi	3.887,77	431.672	11	-/19
8	Kabupaten Pesisir Selatan	Painan	Rusma Yul Anwar	5.749,89	504.418	15	-/182
9	Kabupaten Sijunjung	Muaro Sijunjung	Benny Dwifa Yuswir	3.130,40	235.045	8	-/61
10	Kabupaten Solok	Arosuka	Epyardi Asda	3.738,00	391.497	14	-/74
11	Kabupaten Solok Selatan	Padang Aro	Khairunas	3.346,20	182.027	7	-/39
12	Kabupaten Tanah Datar	Batusangkar	Eka Putra	1.336,10	371.704	14	-/75
13	Kota Bukittinggi	-	Erman Safar	25,24	121.028	3	24/-
14	Kota Padang	-	Hendri Septa	693,66	909.040	11	104/-
15	Kota Padangpanjang	-	Fadly Amran	23,00	56.311	2	16/-
16	Kota Pariaman	-	Genius Umar	66,13	94.224	4	16/55
17	Kota Payakumbuh	-	Riza Falepi	85,22	139.576	5	47/-
18	Kota Sawahlunto	-	Deri Asta	231,93	65.138	4	10/27
19	Kota Solok	-	Zul Elfian	71,29	73.438	2	13/-

Indeks Pambangunan Manusia

Barikuik iko Indeks Pambangunan Manusia (IPM) di kabupaten jo kota di Sumatera Barat. Laporan ko didapek dari Laporan Pambangunan Manusia Indonesia 2020 nan dipublikasikan dek Badan Pusat Statistik.^[48]

Paringkek	Kabupaten / Kota	Nilai IPM (2020)	Nagara Pambandiang (UNDP 2019)
Sangaik tinggi
1	Kota Padang	0.828	Romania
2	Kota Bukittinggi	0.805	Kuwait,  Mauritius,  Serbia
Tinggi
3	Kota Payakumbuh	0.789	Albania,  Cuba
4	Kota Solok	0.782	Sri Lanka
5	Kota Padang Panjang	0.779	Grenada,  Mexico,  Saint Kitts and Nevis,  Ukraine
6	Kota Pariaman	0.769	Colombia
7	Kota Sawahlunto	0.726	Tonga
8	Kabupaten Agam	0.724	Libya
–	Sumatera Barat	0.723	Libya
9	Kabupaten Tanah Datar	0.723	Libya
10	Kabupaten Dharmasraya	0.715	Samoa,  Turkmenistan
11	Kabupaten Padang Pariaman	0.706	Egypt
Manangah
12	Kabupaten Pesisir Selatan	0.699	Kyrgyzstan
13	Kabupaten Lima Puluh Kota	0.694	Kyrgyzstan
14	Kabupaten Solok	0.690	Maroko
14	Kabupaten Solok Selatan	0.690	Maroko
16	Kabupaten Pasaman Barat	0.684	Guyana,  Maroko
17	Kabupaten Sijunjung	0.677	Iraq
18	Kabupaten Pasaman	0.666	Cape Verde
19	Kabupaten Kepulauan Mentawai	0.610	Eswatini,  Ghana,  Vanuatu

Sabagai kabupaten baru, Dharmasraya mandapek nilai tatinggi di antaro kabupaten-kabupaten baru lainnyo.^[49]

Sumatera Barat panah manjadi pusek pandidikan di Pulau Sumatera, utamonyo dalam pandidikan Islam jo surau sabagai basis utamo tampek pandidikan.^[50] Pado maso kolonial panjajahan Balando, pandidikan Islam dikatapikan dibandiangan jo pandidikan model Hindia Balando nan dianggap labiah modern.^[51]

• 
  Diniyyah Puteri, Padang Panjang
• 
  Rektorat Universitas Negeri Padang
• 
  Gaduang-gaduang kuliah Universitas Andalas

Salapeh pangakuan kamardekaan Indonesia, di provinsi iko mulai banyak bamunculan lambago pandidikan utamonyo di taun 1950-an.^[52] Ampia di satiok kabupaten jo kota dalam provinsi iko alah punyo perguruan tinggi, dan sabagian gadang ado di Padang, salah satu nan tanamo iyolah Universitas Andalas subagai kampus nan paliang tuo di Indonesia nan di lua Jao.

Sacaro batahap parekonomian Sumatra Barat mulai bagerak positif salapeh mangalami takanan akibaik dampak gampo bumi tahun 2009 nan malando kawasan tasabuik. Dampak bancano ko nampak pado triwulan IV-2009, di mano patumbuahan ekonomi anyo mancapai 0,90%. Namun kini parekonomian Sumatra Barat alah mulai elok, jo tingkek patumbuahan di ateh rato-rato nasional. Pado taun 2012 ekonomi Sumatra Barat tumbuah sagadang 6,35%, labiah ancak dibandiangan taun sabalunnyo nan anyo sagadang 6,25%. Dan pado triwulan I-2013 parekonomian Sumatra Barat alah tumbuah mancapai 7,3%. Tingginyo patumbuahan ekonomi Sumatra Barat dalam tigo taun tarakhia, alah manurunkan tingkek kamiskinan di provinsi ko dari 8,99% (2011) manjadi 8% (2012). Untuak Pendapatan Domestik Regional Bruto (PDRB), pado taun 2012 provinsi ko mampunyoi PDRB mancapai Rp 110,104 triliun, jo PDRB per kapita sagadang Rp 22,41 juta.

Industri Pangolahan

Industri Sumatra Barat didominasi dek industri skala kaciak atau rumah tanggo. Jumlah unit industri sabanyak 47.819 unit, tadiri dari 47.58 unit industri kaciak jo 234 industri gadang manangah, jo pabandiangan 203: 1. Pado taun 2001, investasi industri gadang manangah mancapai Rp 3.052 miliar, atau 95,60% dari total investasi, sadang industri kaciak investasinyo anyo Rp 1.412 miliar atau 4,40% sajo dari total investasi. Nilai produksi industri gadang manangah taun 2001 mancapai Rp 1.623 miliar, iyolah 60% dari toal nilai produksi, jo nilai produksi industri kaciak anyo mancapai Rp 1.090 miliar, atau 40% dari total nilai produksi.^[53]

Untuak industri pangolahan simin, pado taun 2012 Sumatra Barat alah mamproduksi sabanyak 6.522.006 ton, labiah tinggi dibandiangan taun lalu nan anyo 6.151.636 ton. Samantaro volumen panjualan pado taun 2012 sabanyak 6.845.070 ton, maningkek 10,20% dibandiangan taun lalu nan sabnyak 6.211.603 ton.

Patambangan

Sumatra Barat mampunyoi potensi bahan tambang golongan A, B, C. Bahan tambang golongan A, iyolah batu baro ado di kota Sawahlunto. Samantaro bahan tambang golongan B nan tadiri dari aia raksa, balerang, pasia basi, timbago, timah itam, jo perak taseba di Sijunjung, Dharmasraya, Solok, Solok Selatan, Lima Puluh Kota, Pasaman, jo Tanah Datar. Bahan tambang golongan C manyeba di saluruah kabupaten jo kota, nan banyaknyo tadiri dari pasia, batu, jo karekel.^[53]

Transportasi

Transportasi darek di Sumatera Barat pado Statistik Transportasi Provinsi Sumatera Barat taun 2020 alah ditunjang jo adonyo jalan nan totalnyo mancapai 22.351, 41 km. Manuruik kawenangan pambinaannyo, jalan kabupaten/kota masih manjadi bagian tapanjangnyo yaitu 19.377,40 km atau 86,70% dari total panjang jalan di Sumatera Barat. Samantaro jalan nagara mancapai 1.448,81 km (6,48%) jo jalan provinsi mancapai 1.525,20 km (6,82%).^[54]

Manuruik kondisi jalannyo, sabagian gadang jalan alah dalam kondisi rancak (dapek dipakai jo kalajuan 60km/jam dan indak paralu dipelokan dalam 2 taun kamuko) mancapai 891,43 kilometer. Samantaro jalan jo kondisi rusak ado sapanjang 153,03 km sarato rusak barek ado sapanjang 244,76 km. Kabupaten/kota jo kondisi jalan nan paliang rusak barek ado di Kabupaten Kepulauan Mentawai mancapai total 24 km.^[54]

Banyak jalan pangubuang sarupo Jalan Linteh Sumatra nan mambantang sapanjang provinsi, ujuang barat daya manuju ka Medan jo ujuang tenggara manuju ka Jakarta, jalan antaro Padang jo Bukittinggi, sarato jalan antaro Bukittinggi jo Pekanbaru. Pamarintah provinsi barencana maningkekan kaduo jalan nan tarakhia disabuik salamo babarapo taun ka muko untuak malancaran jalan nan acok tasandek.^[55]

Pado Januari 2012, Kelok Sambilan sapanjang 970 meter alah siap untuak dipakai dan rasmi dibukak untuak lalu linteh pado April 2012. Kelok Sambilan nan aratinyo sambilan tikungan tajam marupokan area nan malalui jalan nan taapik bukik jo tabiang nan rapek di tangah lambah jo panorama nan rancak.^[56] Sasudah jalan layang dibukak, jalan Kelok Sambilan lamo masih tatap dibukak basamo jo jalan baru untuak tujuan palancongan.

Transportasi darek di Sumatera Barat ditunjang juo dek adonyo terminal nan malayani transportasi antar kota ataupun provinsi. Ado limo terminal tipe A (nan utamonyo malayani AKAP) di provinsi iko, antaro lain:^[57]

• Terminal Anak Air (Padang)
• Terminal Jati (Pariaman)
• Terminal Simpang Aur (Bukittinggi)
• Terminal Bareh Solok (Solok)
• Terminal Kiliran Jao (Sijunjung)

Transportasi darek lainnyo, kareta api masih digunoan untuak jalua dari Padang ka Sawahlunto, nan malalui Padang Panjang jo Solok. Pado jalua ko, kareta api anyo dipagunokan sabagai sarana paangkuik batubaro. Sadang dari Padang manuju Pariaman, kini masih digunoan untuak angkutan panumpang. Transportasi darek lainnyo nan masih digunoan, di antaronyo taksi, oplet, jo bendi.

• Transportasi di Sumatera Barat
• 
  Palabuahan Taluak Bayua
• 
  Kareta api di tapian Danau Singkarak
• 
  Kelok 9
• 
  Terminal Simpang Aur, Bukittinggi
• 
  Palabuahan udaro Internasional Minangkabau

Transportasi dari dan ka Sumatra Barat kini dihubuangkan dek Palabuahan Udaro Internasional Minangkabau jo Palabuahan lauik Taluak Bayua. Palabuahan Udaro Minangkabau mulai aktif baoperasi pado akhia taun 2005 manggantikan Palabuahan Udaro Tabiang. Palabuahan udaro ko tahubuang jo babagai kota utamo di Indonesia, sarupo Jakarta, Medan, Batam, Bandung, sarato Kuala Lumpur di Malaysia. Untuak maningkekan aksebilitas Palabuahan Udaro Minangkabau, kini pamarintah manyadiokan kareta palabuahan udaro dari dan manuju pusek kota Padang.

Palabuahan lauik Taluak Bayua marupokan palabuahan kapa utamo di Sumatera Barat nan dikalola dek PT. Pelindo II. Palabuahan Taluak Bayua malayani padok bongka muek barang dari dan manuju dalam atau lua nagari. Manuruik BPS Sumatera Barat, ado 1.624 unit kapa nan balabuah di palabuahan salamo taun 2020. Sakitar 20,38% adolah kunjuang kapa lua nagari. Sampai akia 2020, padok bongka barang di Taluak Bayua sabanyak 2.903.151 ton, maningkek dibandiangkan taun 2019 sagadang 1,66 %. Namun pado padok muek barang nan tacataik sagadang 7.026.388 ton mangalami panurunan sagadang 4,57% dibandiangkan jo taun 2019.^[54] Dalam parekonomian daerah Sumatera Barat, lapangan usaho transportasi lauik bakontribusi sagadang 0,28% kapado PDRB taun 2020.^[54]

Salain Taluak Bayua, transportasi lauik untuak jarak dakek bapusek di Palabuahan Muaro. Palabuahan ko antaro lain juo malayani transportasi manuju Kapulauan Mentawai jo manggunokan kapa feri atau speed boat. Palabuahan Muaro juo manjadi tampek basanda kapa-kapa pesiar (yacht) dan kapa-kapa nalayan.

Pariwisata

Badasarkan data dari Badan Pusat Statistik, Sumatera Barat tacatek sabagai salah satu provinsi jo jumlah kunjungan wisatawan tabanyak.^[58] Sumatera Barat punyo ampiang sado jinih objek wisata alam sarupo lauik, pantai, danau, gunuang jo ngarai, salain objek wisata budayo. Akomodasi hotel alah banyak mulai dari kelas melati sampai bintang ampek. Agen tour jo travel di bawah kaanggotaan ASITA Sumatera Barat alah labiah dari 100 buah. Untuak malangkoki fasilitas panunjang pariwisata, pamarintah juo manyadiokan kareta api wisata nan baoperasi pado jam-jam tatantu.

Objek-objek wisata nan dikunjuangi para wisatawan di antaronyo, Titian Aka di kecamatan Bayang; Rumah Gadang Mande Rubiah di Lunang; Istano Karajaan Inderapura di kecamatan Pancung Soal; Pulau Cingkuak jo paninggalan Benteng Balando jo Puncak Langkisau di Painan, kabupaten Pesisir Selatan, Danau Maninjau jo Puncak Lawang Ambun Pagi di kabupaten Agam, Lambah Anai; Istano Basa Pagaruyung, Danau Singkarak di kabupaten Tanah Datar, Danau Talang; Danau Diateh jo Danau Dibawah dikana juo jo sabutan Danau kembar di kabupaten Solok, Panorama Ngarai Sianok; Benteng Fort de Kock; Jam Gadang di kota Bukittinggi, Pantai Aia Manih; Pantai Muaro; Pantai Caroline; Pulau Sikuai di kota Padang, Tampek wisata Harau di kabupaten Lima Puluh Kota, Tampek wisata Ngalau di kota Payakumbuh, Candi Padang; Batu basurek Padang Roco di Kabupaten Dharmasraya, Pantai Kata; Pantai Gandoriah di kota Pariaman, Pantai Arta; Malibo Anai di kabupaten Padang Pariaman.

Samantaro itu babagai informasi jo literatur sijarah manganai Sumatera Barat jo kabudayoan Minangkabau sacaro umum dapek dijumpai di Pusek Dokumentasi jo Informasi Kabudayoan Minangkabau (PDIKM), nan talatak di tangah-tangah objek wisata Pakampuangan Minangkabau (Minangkabau Village) di kota Padang Panjang. Di PDIKM tadapek barupo dokumentasi foto mikrograf surek kaba, pakaian tradisional, kaset rekaman lagu daerah, dokumentasi surek-surek kapamarintahan jo alua sijarah masyarakaik Minangkabau sacaro taparinci khususnyo samanjak abaik 18 (periode panjajahan Balando) hinggo era 1980'an. Salain itu sumber literatur lain dapek ditalusuri di Perpustakaan KITLV (Koninklijk Instituut voor Taal-, Land- en Volkenkunde) jo di Perpustakaan Universitas Leiden, duo-duonyo di Leiden, Balando.

Olahraga

Provinsi Sumatera Barat punyo babarapo event olahraga nan baskala lokal, nasional maupun internasional dalam maningkekan pariwisatanyo, di antaronyo lomba pacu kudo. Palombaan pacu kudo iko alah manjadi tradisi jo manjadi bagian dari budayo masyarakaik Minangkabau khususnyo, kini alah manjadi rangkaian palombaan jo babarapo kota/kabupaten lain di Sumatera Barat nan mandapek kasampatan manjadi tuan rumah satu kali tiok tahunnyo, samantaro pesertanyo juo ado dari lua Sumatera Barat.^[59] Babarapo lapangan pacuan kudo tasabuik taseba di kota jo kabupaten nan ado dalam provinsi iko.

Samantaro Tour de Singkarak pado taun 2014, alah mamasuaki taun kaampeknya. Kajuaroan iko sacaro rasmi alah manjadi agenda paalekan tahunan Union Cycliste Internationale (UCI). Babarapo kawasan wisata manjadi bagian dari jalur lintasan lomba tamasuk Lambah Harau, Danau Maninjau, Kelok 44, jo danau kamba Diateh jo Dibawah.^[60] Di sisi lain, cabang ulahrago parahu naga (dragon boat) juo rutin diadokan di Sumatera Barat, sarupo kajuaroan Parahu Naga Internasional di Padang nan mandatangkan paserta dari mancanegara jo lua provinsi, sarato kajuaroan Dayuang Tradisional di Pantai Carocok, Painan jo Dharmasraya.

Musik

Nuansa Minangkabau nan ado di dalam satiok musik Sumatera Barat nan dicampua jo jinih musik apopun kini pasti ka nampak dari satiok karya lagu nan baredar di masyarakaik. Hal iko dek musik Minang dapek diracik jo aliran musik jinih apopun sahinggo lamak didanga jo dapek ditarimo dek masyarakaik. Unsur musik pambari nuansa tadiri dari instrumen alek musik tradisional saluang, bansi, talempong, rabab, pupuik, sarunai, jo gandang tabuik.

Ado pulo saluang jo dendang, yakni panyampaian dendang (carito balagu) nan diiriangi saluang nan dikana juo jo namo sijobang.^[61]

Musik Minangkabau barupo instrumentalia jo lagu-lagu dari daerah iko pado umumnyo basipaik melankolis. Hal iko bakaitan arek jo struktur masyarakaiknyo nan punyo raso pasudaroan, hubuangan kakaluargoan jo kacintoan ka kampuang laman nan tinggi ditunjang jo kabiasoan pai marantau.

Industri musik di Sumatera Barat samakin bakambang jo muncuanyo seniman-seniman Minang nan dapek mambaurkan musik modern ka dalam musik tradisional Minangkabau. Pakambangan musik Minang modern di Sumatera Barat alah dimulai sajak taun 1950-an ditandoi jo lahianyo Orkes Gumarang.

Elly Kasim, Tiar Ramon jo Yan Juned adolah panyanyi daerah Sumatera Barat nan tanamo di era 1970-an hinggo kini.

Parusahoan-parusahoan rekaman di Sumatera Barat antaro lain: Tanama Record, Planet Record, Pitunang Record, Sinar Padang Record, Caroline Record nan talatak di kota Padang jo Minang Record, Gita Virma Record nan talatak di kota Bukittinggi.

Kini para panyanyi, pancipta lagu, jo panata musik di Sumatera Barat banauang di bawah organisasi PAPPRI (Pasatuan Artis Panyanyi Pancipta lagu Panata musik Rekaman Indonesia) jo PARMI (Pasatuan Artis Minang Indonesia).

Tarian tradisional

Sacaro garih gadang seni tari dari Sumatera Barat adolah dari adaik budayo etnis Minangkabau jo etnis Mentawai. Kakhasan seni tari Minangkabau umumnyo dipangaruahi dek agamo Islam, kaunikan adaik matrilineal jo kabiasoan marantau masyarakaiknyo juo maagiah pangaruah gadang dalam jiwa sabuah tari tradisi nan basipaik klasik, di antaronyo Tari Pasambahan, Tari Piriang, Tari Payuang jo Tari Indang. Samantaro itu tadapek pulo suatu patunjuakan khas etnis Minangkabau lainnyo barupo papaduan unik antaro seni bela diri nan disabuik silek jo tarian, nyanyian jo seni paran (acting) nan dikana jo namo Randai.^[62]

Sadangkan untuak tarian khas etnis Mentawai disabuik Turuk Laggai. Tarian Turuk Langai iko umumnyo bacarito tantang tingkah laku hewan, sahinggo judulnyo pun disasuaikan jo namo-namo hewan tasabuik, misalnyo tari buruang, tari cigak, tari ayam, tari ula jo sabagainyo.^[63]

Rumah Adaik

Artikel utamo untuak bagian ko adolah: Rumah Gadang dan Uma

Rumah adaik Sumatera Barat khususnyo dari etnis Minangkabau disabuik Rumah Gadang. Rumah Gadang biasonyo dibangun di ateh sabidang tanah miliak suku/kaum tasabuik sacaro turun tamurun.^[64] Indak jauah dari komplek rumah gadang tasabuik biasonyo juo dibangun sabuah surau kaum nan bafungsi sabagai tampek ibadah jo tampek tingga lalaki dewasa kaum tasabuik namun alun manikah.

Rumah Gadang iko dibuek babantuak ampek pasagi panjang jo dibagi ateh duo bahagian muko jo balakang,^[65] umumnyo babahan kayu, jo sapinteh nampak co bantuak rumah pangguang jo atok nan khas, manonjol sarupo tanduak kabau, masyarakaik satampek manyabuiknyo Gonjong jo dahulunyo atok iko babahan ijuak sabalun baganti jo atok seng. Rumah Bagonjong^[66] iko manuruik masyarakaik satampek diilhami dari tambo, nan mangisahkan kadatangan nenek moyang mareka jo kapa dari lauik. Ciri khas lain rumah adaik iko adolah indak mamakai paku basi tapi manggunokan pasak dari kayu, namun cukuik kuek sabagai pangikek.^[67]

Samantaro etnis Mentawai juo punyo rumah adaik nan babantuak rumah panggung gadang jo tinggi lantai dari tanah mancapai satu meter nan disabuik jo uma.^[68] Uma iko dihuni sacaro basamo dek limo sampai sapuluah kaluargo. Sacaro umum konstruksi uma iko dibangun jo indak manggunokan paku, tatapi dipasak jo kayu sarato sistem sambungan silang batakik.

Sanjato Tradisional

Sanjata tradisional Sumatera Barat adolah Karih jo Kurambiak. Karih biasonyo dipakai dek kaum laki-laki nan dilatakkan di sabalah muko, jo umumnyo dipakai dek para pangulu tarutamo dalam satiok acaro rasmi ado tarutamo dalam acaro malewa gala, salain itu juo biaso dipakai dek para marapulai dalam acaro majlis pakawinan nan masyarakaik satampek manyabuiknyo baralek. Sadangkan kurambiak marupoan sanjato tajam ketek nan bantuaknyo malangkuang co kuku harimau, dek memang tainspirasi dari kuku binatang lia tasabuik. Sanjato iko dipakai dek para pandeka silek Minang dalam pataruangan jarak pendek, tarutamo nan manggunokan jurus silek harimau. Babagai jinih sanjato lainnyo juo pernah digunokan sarupo tombak, pedang panjang, panah, sumpik jo sabagainyo.

Masakan khas

Artikel utamo untuak bagian ko adolah: Masakan Padang dan Masakan Sumatera Barat

Dalam dunia kuliner, Sumatera Barat tanamo jo masakan Padang jo restoran Padang, jo citaraso nan padeh, dapek ditamukan ampiang di sadoalah panjuru Nusantara, bahkan sampai ka lua nagari.^[69] Babarapo contoh makanan dari Sumatera Barat nan cukuik populer adolah Randang, Sate Padang, Dendeng Balado, Itiak Lado Mudo, Soto Padang, jo Bubua Kampiun.

Satiok kawasan di Sumatera Barat, punyo makanan sabagai ciri khas daerah, nan biaso dijadikan sabagai buah tangan (oleh-oleh) misalnyo: kota Padang tanamo jo bingkuang, kota Padangpanjang tanamo jo paragede jaguang, kota Bukittinggi jo karupuak sanjai, kota Payakumbuh jo galamai. Salain itu, Sumatera Barat juo punyo ratusan resep, sarupo kipang kacang, bareh randang, dakak-dakak, rakik maco, pinyaram, karupuak balado, jo tamasuak juo maasiakan kopi luwak (Kopi siso Musang).

Ampia sadoalah saluran satasiun televisi nasional alah dapek manjangkau kawasan Sumatera Barat. Salain itu provinsi iko punyo juo babarapo satasiun televisi lokal, sarupo TVRI Sumatera Barat, Padang TV, Minang TV, TV E, Favorit TV jo Bukittinggi Televisi (BiTV).

Rato-rato di satiok kabupaten jo kota di provinsi iko alah punyo pamancar radio salain miliak pamarintah juo swasta, sarupo RRI Padang, Radio Classy FM, Radio Jelita FM, Radio SK FM, Radio Fanesa 5 FM jo sabagainyo.

Sumatera Barat juo banyak punyo media cetak jinih surek di antaronyo ANTARA (Kantor Berita Indonesia) Biro Sumbar,^[70] Harian Padang Ekspres, Harian Haluan, Harian Singgalang jo lain-lain. Media cetak tasabuik juo tasadio jo dapek diakses sacaro online malalui internet.

Pado awalnyo Sumatera Courant marupoan koran partamo nan tabik di Sumatera Barat dek pamarintah Hindia-Balando pado taun 1862. Salanjuiknyo taun 1877 tabik Padangsche Handelsblad miliak swasta. Kaduo surek kaba iko manggunokan bahaso Balando, jo baru pado taun 1890 tabik surek kaba bulanan Pelita Kecil nan alah manggunokan bahaso Melayu.^[71]

• Daftar tokoh Sumatera Barat
• Uda Uni Sumbar

• (Indonesia) Rusli Amran, (1981), Sumatra Barat hingga Plakat Panjang, Jakarta: Sinar Harapan.
• (Indonesia) Audrey R. Kahin, (2005), Dari pemberontakan ke integrasi: Sumatra Barat dan politik Indonesia, 1926-1998, Yayasan Obor Indonesia, ISBN 979-461-519-6
• (Indonesia) A.A. Navis, (1984), Alam Takambang jadi Guru. Jakarta: PT. Grafiti Pers.
• (Indonesia) M.D. Mansoer, (1970), Sedjarah Minangkabau, Jakarta: Bhratara.

• (Indonesia) Situs web resmi provinsi Sumbar Archived 2012-01-15 di Wayback Machine.
• Profil demografi Sumbar
• Profil ekonomi Sumbar
• Profil wisata Sumbar
• Ekonomi regional Sumbar
• Statistik regional Sumbar
• (Indonesia) Informasi seputar Sumatra Barat
• (Indonesia) Situs Antara Sumbar Portal Berita Sumatra Barat.
• (Indonesia) Situs Cimbuak.com Portal Komunitas Minang.
• (Indonesia) Situs West-Sumatra.com Archived 2019-03-09 di Wayback Machine. Portal Parawisata Independen Komunitas Minang bertajuk fotografi.
• (Indonesia) Sablon Sumatera Barat Archived 2022-12-05 di Wayback Machine.

100°21′38.3″E