Favesarache

Celtis australis L.

Gl Favesarache, /favəsaˈraːkə/, è n'álbere spegliand e la famiglia e le Ulmaceae (e le Cannabaceae pe la classefecazione APG) ávete affin'a 25 m; la scòrza, liscia, è e chelore grigg-cénnere; la ciuffa è tonna che gl ramitt nghianate o, cavvòta, appise. Le rámera gione suo pelose.

Pò cambà 500-600 ann prò crésc chiane chiane; pebbía e la bòna reseštènza a la sécca, a gl jèle, a le petature, a gl nguinamiénd é a gl fatt che fa assá mbréa, vè addeprata a l'alberature štradale.

Frunn

Suo altèrn é tiéve la part e sott rechepèrta da na pelama mòlla. La forma è langiolata che na ponda lònga é appezzetata. Tiéve gl diénd a gl late. Suo ròss da 5 a 15 cm é suo du vòte cchiù lòngh che larie.

Sciuore

Suo peccerigl, e chelore verdaštr é tiéve ne pernucc luongh. Sceríscene a abbrile - maje.

Frutt

È na drupa e chelore marrone-neraštr quann è fatta. Tè n'uoss ébbía é jušt ne ccon'e carn tòrn tòrn. Gl diámmetre sié è de 8-12 mm.

È na spèce eurimedeterranea ch'arriva affin'a gl Kashmir attraviérz l'Anatòlia. A l'Etalia se tròva dappettutt. Ce piace gl sole é gl terrine frisch che scòlene buone. Crésc affin'a 800 m, anziém'a gl ulm, gl cárpene, la vellana, gl uorn, la cèrcua e gl ácere. Da 0 a 800 m. n.l.m.

Cucina

Se chenzúmane gl frutt frisch o sicch. Se ne recaccia n'uogl é se ne fave ciért resòlie.

Ate use

Gl legname (ch'ard buone) ghiangh-verdaštr o greggiaštr, tuošt é flessíbbele, venéva addeprate pe fà rème, cerchiune e le ròte, pale, frušt... L'òssa e gl frutt venévane becate é nfelate p'avé cullan'e crone da resarie (nfatt ss'álbere, a parecchie víe, vè chiamate "gl álbere e gl resarie"). Le frunn tiéve ne muar'e preteíne é suo ne buone magnà pe gl agnemale. Che la scòrza se tegnévane le pèll é che la rádeca la lana de ne chelore giall.