Punticielle

A ll'epoca d’’e Rommani, int'â zona 'e Punticielle ce steva na pupulazione ca viveva fora d'â cità. A via Bartolo Longo, aropp’’o terremoto 'e ll'Irpinia d'ô 1980, truvajeno ddoje ville rustiche. Na 'e cheste era 'e nu discendente 'e nu veterano 'e Silla, Caius Olius Ampliatus, ca faceva e venneva cereali e vvino. Sta villa vennette atterrata pe ll'eruzione d'ô Vesuvio d'ô 79 D.C.

Dint'ô XI seculo accumparettero 'e primme scritture ncopp'â "Ponticello", ca era nu gruppo piccerello 'e case 'e campagna c'ê funde pe cultivà.^[1]

'O paese crescette 'int'â primma parte d'ô XIII seculo c'â freveca d'â cchiù ntica basileca-santuario vesuviana: 'a Basilica santuario 'e Santa Maria d'â Neve.

Pe tramente stevano dduje paesi: "Ponticello grande" e "Ponticello piccolo", c'addeventarono aroppo no sulamente c'ô nomme plurale 'e "Ponticelli", comme sta scritto int'â nnumerazione de' Villaggi 'e Napoli d'ô 1497.^[2]

Int'a rivoluzione napoletana d'ô 1799, a Punticielle accirettero 'e trirece uommene fedeli a Ferdinando IV.^[3]

Anfì 'o 1860, Punticielle fuje nu casale ca steva a sott’’a cità. Cu ll'annessione 'o regno d'Italia, addeventaje nu comune fì 'o 1925^[4], cuanno fuje aunito n'ata vota a Napule.

Punticielle è 'o secunno cchiù gruosso rione 'e Napule, cu 75 097 crestiane, aroppo Forerotta. A nord tene 'e comun’’e Casoria e Volla, a llevante Cercola e San Sebastiano ô Vesuvio, a sud 'o rion’’e Varra e 'o comune 'e San Giorgio a Cremano, a ponente 'o rion’’e Puciuriale.

• Purtale Napule: Trase ê vvoce 'e Wikipedia ca parlano 'e Napule