Viscuvato 'e Napule

Fuje Carlo I d'Angiò a cummencià 'a fraveca d'o Viscuvato, ca cuntinuaje sotto a Carlo II d'Angiò (1285-1309) e fernette sulo ô primmo ventennio d'o Treciento 'mman' a Roberto d'Angiò. 'A Chiesia oggë s'appresenta cu' deverze suprappusizzione 'e stile: 'mparticulare, dint' 'o Seiciento, â struttura gotica ariginaria 'nce mettettero 'ncoppa decorazione barocche, e pure cierti quadre 'e Luca Giordano. 'A chiesia sta 'ncopp' 'e riest' 'e dduje vecchie basileche paleocrestiane: 'mpierno ô viscuvato 'e mo ('ngresso d''a rivata sinistra), 'a chiesia 'e Santa Restituta ca tene ancora 'a struttura ariginaria soja a tre rivate a nu livello 'e scarpesamiento cchiù vascio d''o riesto d''o viscuvato.

Baseleca Viscuvato Metrupulitano 'e Santa Maria Assunta
Facciata d''o Viscuvato.
Stato/e	Italia
Reggione	Campania
Cità	Napule
Religgione	Chiesia cattoleca
Titolare	Maria
Diocesi	Arcidiocesi 'e Napule
Architettura	Goteco, rinascementale, barocco, neogoteco
Inizio fràveche	XIII seculo
Fine fràveche	XIX seculo
Coordinate	40°51′09″N 14°15′34″E

'Nfra ll'opere d'arte prencepale d''o Viscuvato, 'nce sta 'a splendida Cappella d'o Tesoro 'e San Gennaro, cu' 'e ppitture 'e Domenichino e Giovanni Lanfranco, 'e ppale d'autaro 'e Domenichino, Massimo Stanzione, Jusepe de Ribera, 'o ricchissimo autaro maiore 'e Francesco Solimena, 'a cancellata 'e bronzo 'e Cosimo Fanzago e nu sacco 'e statue, candelabbre e rellequiare ('nfra ca chillo 'e San Gennaro, d'arefece francise d'o seculo XIV).

Ate opere: 'o succuorpo, fateca d''o lummardo Tommaso Malvito, d'impianto bramantesco, na Assunta 'e Pietro Perugino, e deverze depinte d''o XIV seculo, 'nfra ca chille d''a ricca cappella Minutolo (annommenata 'int' 'o Decameron 'e Boccaccio). Dint'a chiesia 'e Santa Restituta assaje 'mpurtante è 'a cappella 'e Santa Maria d''o Principio, cu' nu mosaico 'e Lello d'Orvieto, quacche rilievo medievale e 'o vattistero paleocrestiano, cu' nu ciclo 'e musivo d'o IV seculo.

'A cappella maiore d'o Viscuvato fuje pur'essa rifatta 'int' 'o XVIII seculo 'a ll'architetto senese (ma 'e scola rummana) Paolo Posi; 'o muro 'e funno tene nu spettaculare rilievo barocco cu' ll'Assunta, 'e Pietro Bracci (n'artista ca primma aveva fatecato a Roma â Funtana 'e Trevi).

'A facciata ca verimmo mo fuje rifatta da Enrico Alvino â fine 'e ll'Ottociento, ma cunserva 'o purtale d'o Quattuciento, d'Antonio Baboccio ca autilizzaje pure cierte sculture 'e Tino da Camaino.

'O Viscuvato è 'a sede 'e ll'Arcevescuvo 'e Napule, ca mo è 'o cardinale Crescenzio Sepe.