Grand Slam (Tennis)

De Begreep „Grand Slam“ is in’t Johr 1933 dör den US-amerikaanschen Journalisten John Kieran opbröcht worrn. He söch na en Woort, wat den Plaan vun den Tennisspeler Jack Crawford beschrieven de, de bedüdnesten Turneren op de Welt in een un dat sülve Johr winnen to wullen. Afkeken hett he sik dat Woort vun’t britische Koortenspeel Bridge, woneem dat för’t Winnen vun all Steken för een Partei bruukt warrt. As de bedüdensten Turnere hett Kieran de Turneren vun all de Länner defineert, de bit dorhen den Daviscup wunnen harrn un dorüm ut sien Sicht de wichtigsten Natschonen in’n Tennis-Sport weern. Dat harrn to de Tiet veer Natschonen, neemlich England, de USA, Australien un Frankriek, so dat de Tall vun Grand-Slam-Turneren op veer fastleggt worrn is. So keem dat, dat annere Turneren mit lange Traditschoon, as in Düütschland to’n Bispeel de Internatschonalen Düütschen Meesterschoppen nich den Status vun en Grand-Slam-Turneer kregen hebbt.

De Grand Slam warrt as de gröttste Spood ansehn, den en Tennisspeler in sien Loopbahn hebben kann. In de Enkeltwettstrieden hebbt dat bit hüüt eerst fief Spelers henkregen. In’n Dubbelt-Wettsriet is dat noch rorer: dat gifft eerst twee Dubbel-Pooren un een Mixed-Poor, de den Grand-Slam wunnen hebbt. Bi’t Dubbelt is denn ok de Fraag, wat dat noch as Grand Slam gellen deit, wenn en Speler mit verschedene Partners winnt. Bit hüüt is disse Form regelmatig aflehnt worrn. Dor is to’n Bispeel Martina Hingis vun bedrapen, de 1998 all veer Turneren vun’t Frons-Dubbel wunnen hett, aver mit twee verschedene Mitspelers op’n Platz weer.

Dat so en Spood vundaag jümmer weniger vörkummt, liggt an de Spezialiseeren, de ok in’t Tennis to sehn is, sünners aver ok an de verschedenen Boddenbelääg vun de Turneerplätz, de dat bannig swoor maakt. To’n Bispeel hett de Grand-Slam-Winner Rod Laver blots op twee ünnerscheedliche Boddenbelääg wunnen, vun wegen dat dat dormols blots Rasenplätz geev, afsehn vun dat traditschonelle French Open in Paris, woneem op Aschen speelt warrt. De US Open weern 1978 to’n eersten mol in Flushing Medaow op’n Hardplatz utdragen. Dorför weer dat Turneer in Forest Hill op Rasen utspeelt un de letzten dree Johren op Sand. De Australien Open sünd 1988 vun de Rasen-Anlaag in Kooyong na’n Flinders Park ümtogen, woneem nu ok op Hardplatz speelt warrt.

Vunwegen dat de Grand Slam en teemlich roor Begeevnis is, warrt mitünner ok dat Winnen vun de veer Grand-Slam-Turneren in de Reeg – aver nich in’t glieke Johr – as en „unechten“ Grand Slam betekent. To de Winners vun en unechten Grand Slam höört to’n Bispeel ok Martina Navrátilová, de 1983/84 söss Turneren na’nanner wunnen hett. Dat is dat meiste, wat een an Turneren winnen kann, ahn dorbi en echten Grand Slam to winnen.

Wenn en Speler all veer Grand-Slam-Turneren winnt un tosätzlich noch dat Tennisturneer vun de Olympschen Spelen, warrt inoffiziell vun’n Golden Slam snackt. En Golden Slam is bit hüüt eerst eenmol vörkamen, neemlich 1988 dör de düütsche Spelersche Steffi Graf.

En Loopbahn-Grand-Slam betekent, wenn en Speler all veer Turneren tomindst eenmol in sien Loopbahn wunnen hett.

Mannslüüd-Enkel

De nafolgen Spelers hebbt in jemehr Loopbahn all veer Grand-Slam-turneren wunnen, man nich nödigerwies in een Johr oder in direkte Reeg.

• 1935: Fred Perry
• 1938: Don Budge
• 1962: Rod Laver
• 1964: Roy Emerson
• 1999: Andre Agassi
• 2009: Roger Federer
• 2010: Rafael Nadal
  

De Johrestallen staht för dat Johr, as de Spelers dat letzte vun de veer Turneren wunnen hebbt
Blots Andre Agassi, Roger Federer un Rafael Nadal hebbt jemehrn Loopbahn-Grand-Slam op dree ünnerscheedliche Belägen (Rasen-, Sand- un Hardplatz) maakt. Fröher weer blots op Sand- un Rasenplätz speelt.

Fronslüüd-Enkel

De nafolgen Spelersches hebbt in jemehr Loopbahn all veer Grand-Slam-turneren wunnen, man nich nödigerwies in een Johr oder in direkte Reeg.

• 1953: Maureen Connolly
• 1954: Doris Hart
• 1957: Shirley Fry
• 1963: Margaret Smith Court
• 1972: Billie Jean King
• 1982: Chris Evert
• 1983: Martina Navrátilová
• 1988: Steffi Graf
• 2003: Serena Williams
  

De Johrestallen staht för dat Johr, as de Spelersches dat letzte vun de veer Turneren wunnen hebbt