Jürgen Prochnow
Jürgen Prochnow (* 10. Juni 1941 in Berlin) is en düütschen Theater-, Film- un Feernsehschauspeler. He is een vun de wenigen düütschen Schauspelers, de ok jümmer wedder mol in Hollywood-Filmen mispeelt hett. Siet 2003 hett he ook de US-amerikaansche Staatsbörgerschop.
Leven un Wark
Utbilln un Theater
Prochnow is de Söhn vun en Feernmell-Ingenieur. Opwassen is he in Düsseldörp, woneem sien Familie 1952 hentogen is. He hett dor dat Jacobi-Gymnasium besöcht un al wiel sien Schooltiet in Laientheater-Gruppen mitmaakt. As sien Öllern dat wullen, hett Prochnow toeerst en Utbilln to’n Bankkoopmann maakt. Blangento hett he as Statist un as Belüchter an Düsseldörper Schauspeelhuus arbeit. Na’n Afsluss vun sien Lehr is he vun 1963 bit 1966 an de Folkwang Hoochschool wesen, woneem he Schauspeleree studeert hett.
Sien eerst Engagement harr Prochnow an de Stäädtschen Bühnen Ossenbrügge. Dorna speel he vun 1968 bit 1970 an’t Theater Aaken, 1971 an’t Theater vun de Stadt Heidelberg un dorna bit 1976 an’t Schauspeelhuus Baukem, as Peter Zadek dor Intendant weer. In de Johren dorna weer he as free arbeiten Künstler ünnerwegens un harr Gastoptreden an verschedene Bühnen.
Film un Feernsehn
Siet de 1970er Johren weer Prochnow fakener in’t Feernsehn to sehn. Sien eerste Rull harr he in Der Unternehmer. Een Johr later harr he in Zoff vun Eberhard Pieper sien eerste Filmrull. 1973 harr he en Optritt in en Tatort-Episood, bi de Wolfgang Petersen Speelbaas weer. Dat lieke Johr speel he ok in Petersen sien Kinofilm Einer von uns beiden mit. En wietere Tosamenarbeit mit Petersen keem 1977, as Prochnow in den Schandaalfilm Die Konsequenz en Schwulen speelt hett.
Sien internatschonalen Dörbrook harr Prochnow 1981 mit sien Hööftrull in Petersen sien Film Das Boot, in den he den Kummandant vun en U-Boot in’n Tweeten Weltkrieg speelt hett. Wietere Hollywood-Rullen hebbt sik anslaten, as to’n Bispeel 1984 in David Lynch sien Dune oder 1987 in Beverly Hills Cop II. 1993 speel he blangen Madonna in den Erotik-Thriller Body of Evidence. In den Film Air Force One hett he noch mol wedder ünner Wolfgang Petersen sien Regie arbeit.
Butendem hett Prochnow 1996 in Filmsequenzen vun dat Science-Fiction-Reeknerspeel Wing Commander Privateer 2 – The Darkening speelt un weer af un to ok Synchroonsnacker för Sylvester Stallone. Prochnow bedeeligt sik ok an’t Rilke-Projekt. In de achten Staffel vun de Feernsehreeg 24 hett he de Rull as Baas vun en oosteuropääsche Verbrekerbande.
Privatleven
Anfang vun de 1980er Johren weer Prochnow mit de öösterriekschen Schauspelersche Antonia Reininghaus tosamen. Mit ehr harr he sien Dochter Johanna, de 1987 vun Reininghaus vergift worrn is.[1][2] Vun 1982 bit 1997 weer Prochnow mit Isabel Goslar verheiraat. Se hebbt tohoop twee Kinner. 2004 hett he noch mol freet, dat was de Schauspelersche un Speelbaas’sche Birgit Stein.
Prochnow leevt in Los Angeles un München. Sien Brorder Dieter Prochnow arbeit ok as Schauspeler.
Filmografie (Utwahl)
Johr | Titel |
---|---|
1970 | Unternehmer, Feernsehn |
1972 | Zoff |
1974 | Die Verrohung des Franz Blum |
1974 | Einer von uns beiden |
1975 | Die verlorene Ehre der Katharina Blum |
1977 | Die Konsequenz |
1977 | Operation Ganymed |
1980 | So weit das Auge reicht |
1981 | Das Boot |
1983 | The Keep dt.: Die unheimliche Macht |
1984 | Dune dt.: Der Wüstenplanet |
1985 | Der Bulle & das Mädchen |
1987 | Des Teufels Paradies |
1987 | Beverly Hills Cop II |
1988 | The Seventh Sign dt.: Das Siebte Zeichen |
1990 | The Fourth War dt.: Powerplay |
1990 | Der Skipper |
1992 | Hurricane Smith |
1993 | Interceptor dt.: F-117 – A Stealth-War |
1993 | Die Wildnis |
1994 | Trigger Fast |
1994 | In the Mouth of Madness dt.: Die Mächte des Wahnsinns |
1995 | Judge Dredd |
1996 | The English Patient dt.: Der englische Patient |
1997 | Air Force One |
1998 | The Replacement Killers dt.: The Replacement Killers – Die Ersatzkiller |
1999 | Wing Commander |
2000 | Gunblast Vodka dt.: Gunblast Vodka – Der unheimliche Killer |
2000 | The Last Stop |
2001 | Dark Asylum |
2001 | The Elite dt.: Codename – Elite |
2002 | Heart of America |
2003 | Baltic Storm |
2006 | The Da Vinci Code dt.: The Da Vinci Code – Sakrileg |
2006 | Beerfest dt.: Bierfest |
2007 | Primeval dt.: Die Fährte des Grauens |
2008 | La conjura de El Escorial |
2010 | 24, Feernsehreeg |
2010 | Sinners and Saints |
2010 | Amigo – Bei Ankunft Tod, Feernsehn |
2012 | Die Schuld der Erben, Feernsehn |
2013 | Ein schmaler Grat |
2013 | Die Kinder meiner Tochter, Feernsehn |
2010-14 | NCIS: Los Angeles, Feernsehfolgen dt.: Navy CIS: L.A. |
2015 | Die dunkle Seite des Mondes |
2017 | Kundschafter des Friedens |
2017 | Leanders letzte Reise |
2018 | Damascus Cover |
Utteken
Prochnow hett für sien Schauspeleree mehrere Priesen kregen, dormang ok internatschonal Filmpriesen:
- 1978: den Düütschen Dorstellerpries
- 1986: den Bayerische Filmpries in de Kategorie Best Dorsteller för Der Bulle und das Mädchen
- 1986: de Goldene Kamera in de Kategorie Best Dorsteller – Film internatschonal för Das Boot
- 1988: den Bambi
- 1996: den DIVA in de Kategorie European Video Award
Literatur
- Helmut Sorge: Ab nach Amerika! – Ausgewanderte erzählen. Collection Rolf Heyne 2009, ISBN 978-3-89910-438-7.
Borns
Weblenken
- Jürgen Prochnow in de Internet Movie Database (engelsch)
- Literatur vun un över Jürgen Prochnow in’n Katalog vun de Düütschen Natschonalbökeree
- Agentursiet vun Jürgen Prochnow