Seevagels
Seevagels oder Seevogels sünd Aarden mank de Vagels, de sik an de See anpasst hefft un dor ok leven doot. Alltohopen weert dor 275 Aarden to rekent. [1] Tyypsche Seevagels sünd u. a. de Stormvagels, wo ok de Albatrosse to rekent weert. Se sünd sunnerlich dor anpasst, jummerlos over de See hen to flegen. Dor bruukt se ok de Upwinnen over de Wellen bi. De geevt jem Updrift, un so könnt se länger flegen. Annere Seevagels sünd Pinguine, Alkenvagels as de Seepapagooy oder de Seekuten, Strandhecksters un Kluten
Kennteken
Seevagels leevt länger as annere Vagels, fangt eerst later an, sik to vermehren un hefft ok weniger Towass as annere Aarden. Normolerwiese befaat se sik avers ok länger mit de Lütten, as annere Vagels. De meisten Seevagels boot ehre Nester in Kolonien. Dor bröödt denn vun en poor Dutz bit hen to en poor Millionen Vagels. De wecken Aarden sünd bekannt as Treckvagels un sünd lange unnerwegens. Dor fleegt se over’n Äquater bi weg un towielen fleegt se eenmol um’e Eer rum.
Wie se sik anpasst hefft
Seevagels hefft sik up twee Aarden an dat Leven up See anpasst:[2]
- Seevagels as Kieren un Stormvagels leeft in’e Luft over de See. Se könnt bannig goot seilen un hefft lange, spitze Flunken un smalle, zorte Been.
- Seevagels, as Alken un Pinguine sünd sunnerlich up dat Water togange un swemmt dor boven up. Se beweegt sik unner Water mit ehre korten, dannigen Been un mit de Flunken. Vundeswegen weert se ok „Flunkendükers“ nömmt.
Familien
Nich all Aarden ut en Familie mütt Seevagels ween, as bi de Aantenvagels, wo de Iesaante un de Eideraante to de Seevagels torekent weert, man nich de Graue Aante. In de Wetenschop is nich akraat afgrenzt, wecke Aarden to de Seevagels tohören doot, man liekers könnt düsse Ornen un Familien dor torekent weern:
- Ornen Gösevagels (Anseriformes)
- Aantenvagels (Anatidae)
- Ornen Pelikanvagels (Pelecaniformes)
- Genten (Sulidae)
- Fregattvagels (Fregatidae)
- Ornen Stormvagels (Procellariiformes)
- Albatrosse (Diomedeidae)
- Pietermannen (Hydrobatidae)
- Echte Stormvagels (Procellariidae)
- Alkstormvagels (Pelecanoididae)
- Ornen Seedükers (Gaviiformes)
- Seedükers (Gaviidae)
- Ornen Pinguine (Sphenisciformes)
- Pinguine (Spheniscidae)
- Ornen Tüütvagels (Charadriiformes)
- Strandhecksters (Haematopodida), sunnerlich de Liewen.
- Franjenpoten (Phalaropus)
- Schietjagers (Stercorariidae)
- Möwen (Laridae)
- Kieren (Sternidae)
- Alkenvagels (Alcidae)
Kiek ok bi
- List vun Vagels, mit allerhand plattdüütsche Vagelnaams un Naams ut de Naberspraken
- Projekt: Deerternaams up Platt
