Vagelsang (Gemeen Buxthu)

De Oort höört to Oolland un liggt an’n Noordrand von Neeland an de Grenz na Eestbrügg. Dichtbi flütt de Eest langs.

De Naveröörd sünd Eestbrügg un Moorenn in’n Noordoosten, Rübk in’n Oosten, Neeland in’n Süden, Dammhusen in’n Süüdwesten un Ooster-Loodkup in’n Noordwesten.

Vagelsang is as Vörwark grünnt worrn.

In de Franzosentied von 1810 bet 1814 hett de Oort to de Mairie Buxthu in’n Kanton Buxthu höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör’n 1. Juli 1823 to dat Amt Oold- un Neeklooster tohöört un denn bet 1852 to dat Amt Harsfeld. In dat Johr is de Oort in dat Amt Hornborg wesselt. Dat Amt Hornborg is aber blots bet 1859 bestahn bleven un Vagelsang hett denn wedder to dat Amt Harsfeld höört. Mit’n 1. April 1885 is dat Amt oplööst worrn un de Oort is mit Neeland in’n Kreis Jörk wesselt. Neeland is tohoop mit Vagelsang 1931 Deel von de Gemeen Buxthu worrn un dorbi von’n Kreis Jörk na’n Landkreis Stood wesselt.

Vagelsang is evangeelsch-luthersch präägt un höört to dat Kaspel von de St.-Petri-Kark in Buxthu. För de Kathoolschen is de St.-Maria-Kark in Buxthu tostännig.

Dör Vagelsang löppt de Kreisstraat 39, de in’n Noorden na Eestbrügg geiht un in’n Süden na Buxthu.

De nächste Autobahn is de Autobahn 26 (Afsnidd Stood–Hamborg). De Opfohrt 6 Jörk liggt so söven Kilometer in’n Westen von Vagelsang. Wenn de A 26 in Tokumst wiederboot warrt, denn kummt de Opfohrt 7 Buxthu so fiev Kilometer in’n Süüdoosten to liggen.

De nächste Bahnhoff is so bi veer Kilometer wied weg in’n Süüdwesten de Bahnhoff Buxthu an de Nedderelvbahn.