Metapedia
Metapedia, c' est ene eciclopedeye éndjolike al môde di Wikipedia. Metapedia a stî askepyî e 2007 på djonneas suwedwès.[1]
Idintité
Logo
Li logo do pordjet est veyåve so l' imådje a droete di l' årtike. On-z î pout vir ene tiesse d' ome. Metapedia a rprindou, pus u moens, ene sculteure da Arno Breker. Cist ome la, c' esteut on sculteu almand k' esteut dins l' NSDAP, dj' ô bén l' pårti politike d' Adolf Hitler. El no del sculteure, c' est « Jugend ».[2]
Spot
Sol foto di droete, ådzo do no « Metapedia », gn a ene fråze. C' est l' spot del waibe. « Den alternativa encyklopedin » vout dire « L' eciclopedeye ôtruminte ».
Lingaedjes
Ciste eciclopedeye la est, al fén do moes di djun 2023, disponibe e saze lingaedjes.
Rilomêye
Foite droete
Metapedia a puvite ene mwaijhe erlomêye, veyånmint k' c' est rwaitî télcôp, å mî, come ene waibe di foite droete.[1] Houte di çoula, il est, afeye, rwaitî tot-z estant ene eciclopedeye recsisse.[3]
Antidjudayisse
Les varyistés inglès-cåzante eyet hongrwès-cåzante stantchnut bråmint di contnou conte les Djwifs k' el varyisté e suwedwès.[4] Avou ça ki mwints mediyas, come CNN, rwaite cisse waibe la tot-z estant antidjudayisse.[5]
Pî-notes
- On n' sait nén mete el waibe tot scrijhant cist årtike ci, pask' ele est dins el lisse des waibes blokêyes pa Wikipedia. Totfeye, ele dmeure co disponibe dins les ricwirreces.[6]
- « Ôtruminte », c' est on noûmot po ratourner l' idêye dirî l' mot « alternativa ».