胖猫跳江事体

“胖猫”跳江事体^[1]，官方称“胖猫”事体^[2]，指个是勒拉2024年4月11号凌晨4点43分^[3]，一個网名叫“胖猫”（真实姓名刘杰，2003年5月18号出生）个20歲男小倌勒拉重庆石板坡长江大桥高头跳江自杀个事体。

“胖猫”生前拉壗游戏王者荣耀里向碰着一個叫谭竹个女人。箇個女人多次用各式各样个理由要求“胖猫”转钞票，“胖猫”每趟侪会得满足伊，甚至一家头搬到重庆哉。“胖猫”一家头勒拉出租屋里向憕仔近半年个辰光，主要收入是游戏代打，每天只靠点便宜个外卖来维持温饱。根据聊天记录，谭竹跟“胖猫”约定仔今年5月左右结婚。结果到2024年4月份，谭竹向“胖猫”提出分手，理由是“弗能为我提供情绪价值”。^[4]阿末，“胖猫”拿自家仅剩个6.6万块转畀谭竹以後就跳江哉。根据“胖猫”屋里人个讲法，两年里向“胖猫”通过线上一拢总畀箇個女人转仔51万个人民币，而谈下来个赔偿只有13万。“胖猫”尸体已经勒拉5月3号火化脱哉^[5]。

5月19号，重庆警方发布通报，对“胖猫”姐姐指控个诈骗弗立案，对谭竹隐私个泄漏扗调查处理，也乘枪势里介绍仔一些网络“蹭热度”个事体，比方讲装成“胖猫”、虚构内容、违规曝光谭竹个個人信息咾啥个处理情况。^[2]