დრამა (ჟანრი)

დრამა (ჯვ.-ბერძენ. δρᾶμα რჯება, ქიმინუა) — ლიტერატურული, (დრამატული), სასცენე დო კინემატოგრაფიული ჟანრი. გიშაკერზაფილო გოფაჩუა დიჭყჷ ლიტერატურას XVIII−XXI ოშწანურეფს, ნამუქჷთ ჭიე-ჭიეთ გეგშაჸათჷ დრამატურგიაშ მაჟირა ჟანრი — ტრაგედია^[1], ნამუსჷთ აწურინუ უმენტაშო ოჸოფარინე სიუჟეტი დო ირდღარწჷკმა უმოსო მეხოლებურ რეალისტური სტილი^[2]. კინემატოგრაფიაშ გოჭყაფაშე დრამაშ ჟანრიქ ხელუანობაშ თე გვარობაშათ გეგნორთჷ, დო ართ-ართ არძაშე გოფაჩილ ჟანრო გჷნირთჷ (ქძ. ომანგე კატეგორია).

ლირიკაშე გინორთი დო ეპოსიშ მოგვენო, დრამა გჷმოხანტჷნს უმოსო გალენურ ორენს — ადამიერეფს შქას ურთიართქიმინუეფს, თინეფიშ რჯებეფს, გოჭყაფილ კონფლიქტეფს. ეპოსიშე გინორთი, დრამას თხობელურ ვარინ, დიალოგური ფორმა უღჷ. დრამაშ ესთეტიკური მეკონი — ადამიერიშ ემოციურ-ნებაჸოფური რეაქციეფი, ნამუთ გჷმიხანტჷ ზიტყვიერ-ფიზიკურ ქიმინუეფს. დრამატული ნაწარმეფშე დჷმახასიათაფალი რე კონწარ-კონფლიქტური სიტუაციეფი, ნამუთ პერსონაჟის გინოჭყვიდირელო მაკორინუანს ზიტყვიერ-ფიზიკურ ქიმინუეფს. მუჭოთ წესი, დრამეფს სპეციფიკურო ოძირანა, მუჭოთ ადამიერიშ პიჯურ რინას დო თიშ სოციალურ კონფლიქტეფს. თეწკჷმა შხირას აქცენტი იკეთებუაფჷ ოართე ადამიერულ აწორინაფეფშა, ნამუთ გჷმიხანტჷ კონკრეტული პერსონაჟიშ მეჯინეფს დო რჯებეფს.