კეიტ უინსლეტი

კეიტ ელიზაბეთ უინსლეტი (ინგლ. Kate Elizabeth Winslet; დ. 5 გიმათუთა 1975) — ბრიტანეთიშ იმპერიაშ ორდენიშ მაღვენჯი ინგლისარი არტისტი. შხვადოშხვა ბორჯის 6-შა რდჷ ნომინირაფილი ოსკარიშ პრემიას. გიმორძგჷ ხვალე ართშა ნომინაციას საუჯგუშო არტისტი ოსურიშ რსულებური როლიშო ფილმის „მაკითხერი“. დოჯილდაფირი რე კინოარტისტეფიშ გილდიაშ, ბრიტანული კინოაკადემიაშ, ჰოლივუდიშ გალენ ქიანაშ პრესაშ ასოციაციაშ პრემიეფით; ხოლო 2-შა რდჷ ნომინირაფილი ემიშ პრემიას დო 3-შა ორქოშ გლობუსის.

კეიტ უინსლეტი
დაბადებაშ ჯოხო	კეიტ ელიზაბეთ უინსლეტი
დაბადებაშ აბანი	რედინგი, დიდი ბრიტანეთი
დებადჷ	5 გჷმათუთა, 1975 (1975-10-05) (48 წანერი)
საქვარუა	არტისტი
აკოქიმინჯალაშ წანეფი	1991–ასეშა
ალმასქუ(ეფი)	ჯიმ თრიპლტონი (1998–2001) სემ მენდესი (2003–2010)

კარიერა დიჭყჷ 1991 წანას ართ-ართ ბრიტანულ ტელესერიალს. კინოდებიუტიქ აჸუ 1994 წანას ფილმის „ცალური სქილედეფი“, მუშ უკულით კინოკრიტიკოსეფქ უინსლეტიშ მოქიმინჯალა დადებითო აფასეს. უკული რდჷ ფილმეფი „გინაფა დო გონება“ დო „ტიტანიკი“. ათე ეკონიაქ იჸუ უინსლეტიშ კარიერას არძაშე ხვემიშმალუანი კინოთ.

2000 წანაშე მოჸუნელი უინსლეტიშ კინომოქიმინჯალას კინოკრიტიკოსეფი მაღალ ფასებას არზენა. ათე პერიოდის ოშინალი რე რსულებური როლეფი ფილმეფს: „მარკიზ დე სადიშ კალამი“ (2000), „აირისი“ (2001), „ერებამი გონებაშ ირიათოიანი სინთელუა“ (2004), „ჯადური ქიანა“ (2004), „ჭიჭე ბაღანეფი“ (2006), „მაკითხერი“ (2008), „რევოლუციური შარა“ (2008). ეკონია ფილმის რსულებური როლიშ უკული New York Magazine-იშ ამერიკალი კინოკრიტიკოსიქ დევიდ ედელშტეინქ შინუ:

	„კეიტ უინსლეტი რე მუში მოითირიშ ინგლისურ ნინას მორაგადე საუჯგუშო არტისტი.“

კომერციული თოლწონუათ უინსლეტიშ წჷმოძინელი ნამუშერეფი რე რომანტიკული კომედია „შვებულება გინოთირუათ“ დო ანიმაციური ფილმი „ინორჩხილი“ (ჟირხოლო 2006). ათე ეკონიას ახონარენს ართ-ართ პერსონაჟის.