MIRROR

2018年：成團

MIRROR成團源於2018年5月至10月間ViuTV舉辦嘅選秀節目《全民造星》。^[3][4]《全民造星》喺宣傳期間被唔少網民、傳媒質疑係抄襲韓國嘅《Produce 101》；後者由101名女練習生競逐出道，最終排名前11名嘅女孩組成9個月限定組合。^[5]ViuTV董事兼總經理魯庭暉則指節目舉辦時從來沒想過構建男團，只打算與獲得冠軍嘅參加者簽約。^[6]節目監制、後來嘅MIRROR經理人「花姐」黃慧君指該節目原本只打算作為一個呈現參賽者「追夢」過程嘅真人騷，但比賽中參賽者落敗時嘅失落令其於心不忍而開始反思，認為其公司只有喺比賽結束後提供機會畀啲參賽者繼續前行才可以幫助佢哋完成夢想，遂向公司高層提出簽下有潛質嘅參賽者，再組成男團。^[7]組合喺2018年11月3日於荷里活廣場小舞台舉行「ViuTV 全新男子組合誕生日發佈會」，正式宣佈成團，組合名為MIRROR。^[8][9]MIRROR一名由魯庭暉提出，靈感源於其中學時參選皇仁學生會時令佢印象深刻嘅12人對手內閣「Mirrors」，該名稱喺佢心目中代表著創意。^[10]隊長楊樂文喺發佈會上解釋「MIRROR」嘅寓意係鏡子可以反映成員自己最真實嘅面貌；同時，如果鏡子多於一塊，就可以反射好多或無限嘅可能性，比喻每位成員都係獨立同獨特，匯聚成團隊就有無限嘅可能性。^[11]發佈會同時宣佈MIRROR首個演唱會《2018 THE FIRST MIRROR LIVE CONCERT》將於同年12月21日於九龍灣國際展貿中心匯星舉行，^[11]創下香港歌手團體出道後最快（49日）舉辦演唱會嘅紀錄。^{[12][13][14][15]}同年12月推出真人節目《Good Night Show Mirror Go》，全團成員喺節目中到訪世界各地發掘當地特色美食與名勝，並接受各種考驗智力同膽量嘅任務。^[16]節目反應良好，被視為ViuTV王牌節目之一，其後喺2019年5月推出第二季，並計劃喺2021年推出第三季。^[17][18]年底嘅2018年度叱咤樂壇流行榜頒獎典禮票選類「我最喜愛嘅」系列獎項中，MIRROR打入「我最喜愛嘅組合」最後五強，出道作《一秒間》打入「我最喜愛嘅歌曲大獎」十強。^[19][20]

2019年–2020年：出道初期

MIRROR出道翌年即適逢香港接連經歷政治動蕩同2019冠狀病毒病疫情肆虐，因此喺佢哋出道初期嘅2019年同2020年，好多香港人因為冇心情留意本地電視節目同娛樂圈而未有注意到MIRROR。^[21]呢一段時間對於MIRROR及其公司嚟講都係最為艱難嘅時期，啲成員需要ViuTV以外嘅工作維持生計，個別成員一度無法負擔通勤嘅交通費，經理人花姐都迫於形勢走到幕前拍攝廣告來為MIRROR嘅發展籌集經費。^[22]

2019年，香港大部分時間處於政治運動中，社會氣氛緊張，導致MIRROR推出歌曲、唱片嘅計劃推遲，全年只喺4月推出單曲《破鏡》同喺11月為慶祝出道一周年而推出單曲《Reflection》。^[23]《Reflection》喺903專業推介登上冠軍位置，係MIRROR首支流行榜冠軍歌。^[24]同年6月，隊內兩位高人氣成員陳卓賢同姜濤相隔3日先後推出個人單曲並共同進行宣傳，成為MIRROR首批單飛成員。^[25]喺2019年度樂壇頒獎禮中，陳卓賢名列「叱咤樂壇我最喜愛嘅男歌手」七強，姜濤獲得「叱咤樂壇生力軍銅獎」同「十大中文金曲最有前途新人獎 -- 金獎」。〈叱咤最新走勢】姜濤 Ian爭最喜愛男歌手獎 ERROR打入組合7強 (18:17)〉. 明報OL. 2019-11-28. 原著喺2021-09-05歸檔. 喺2021-09-05搵到.</ref>除音樂事業以外，MIRROR亦參與多方面演藝活動，包括全員參與及主持綜藝節目《MIRROR GO》^[26]、參賽《全民造星II》^[27]、主持電台節目《MIRROR頻道》^[28]、以及以個人身份參與電視劇《退休女皇》^[29]、《娛樂風雲》^[30][31][32]同《黑巿》^[33]嘅拍攝。

2019年12月開始，MIRROR全員參與拍攝ViuTV自製青春勵志電視劇《男排女將》，其中陳卓賢、盧瀚霆、呂爵安、柳應廷、邱傲然、王智德及李駿傑喺劇中擔任主演，其餘成員則客串演出。受2019冠狀病毒病疫情影響，本來預計三個月嘅拍攝工作延宕至2020年6月底才煞科，11月喺ViuTV首播。^{[34][35][36][37]}劇集播出前因為演員陣容多為年輕偶像且「追夢」主題老生常談而唔被睇好，但隨著播出引起話題同收穫口碑，並喺《觀眾喺民間電視大獎2020》中獲得包括「民選最佳劇集」同「民選最佳男配角（盧瀚霆）」在內嘅8個獎項成為大贏家。^[38][39]《明周》嘅岑傲明指《男排女將》係MIRROR喺2021年攞得人氣突破前嘅一個小高峰。此前MIRROR嘅支持者主要來自《全民造星》嘅觀眾，一般人喺MIRROR成員中只認識姜濤，而《男排女將》令陳卓賢、盧瀚霆、柳應廷、呂爵安同邱傲然乃至劇中飾演小配角嘅李駿傑同王智德都為人所認識。劇集嘅成功還促使ViuTV次年繼續開拍運動題材嘅電視劇《I SWIM》及舉辦奧運系列特備節目《力圖打排球》等。^[40]

疫情令MIRROR喺2020年嘅工作減少，原定2020年5月舉行嘅紀念演唱會數度延期。^[41]本年MIRROR全年一共推出兩首單曲，包括《IGNITED》同紀念成軍兩周年嘅《One and All》，兩首均喺流行榜登上冠軍位置。三位MIRROR成員盧瀚霆、江𤒹生及柳應廷喺2020年2月29日同日分別推出個人單曲喺樂壇出道，以唔同風格打進市場。^[42][43]三人喺2020年三度同日派歌，互相分擔宣傳。^[44][45]喺2020年度樂壇頒獎禮中，柳應廷獲得「叱咤樂壇生力軍 金獎」同「Chill Club年度新人」^[46][47]、盧瀚霆獲得「十大中文金曲新人金獎」^[48]、江𤒹生獲得「加拿大至 HIT 推崇粵語新歌手 金獎」^[49]、三人均獲得「勁爆新人」^[50]。11月MIRROR宣布推出首張音樂專輯《One and All》，其中收錄MIRROR出道以來推出嘅冚唪唥6首團隊單曲同5位成員喺2020年推出嘅每人各3首合共15首精選單曲。^[51]

2021年至今：人氣突破

2021年係MIRROR迎來人氣突破嘅一年。^[52][15][53]2021年1月1日嘅《2020年度叱咤樂壇流行榜頒獎典禮》係MIRROR人氣嘅分水嶺，當晚MIRROR獲得包括「叱咤樂壇組合」銅獎、「專業推介叱咤十大」第三位（《IGNITED》）、「我最喜愛嘅男歌手（姜濤）」及「我最喜愛嘅歌曲大獎（《蒙著嘴講愛你》）」在內嘅六個獎項成為全場大贏家。^[54][55]其中姜濤成為兩個「我最喜愛」獎項嘅最年輕得主，喺受到網民質疑係咪值得之餘，亦被指「或標志著《全民造星》出身嘅本土偶像即將為香港樂壇甚至娛樂圈揭開全新一頁」。^[56]姜濤獲獎時「可愛自然」嘅愕然表現以及得獎歌曲《蒙著嘴講愛你》為疫情期間嘅香港人打氣嘅意義打破咗MIRROR粉絲嘅同溫層，成為坊間話題。即使係咁，呢個時候嘅MIRROR仍被認為作為組合成績未如理想，各成員嘅星途亦尚未平穩。^[57]

2021年1月，呂爵安推出首支個人單曲《E先生 連環不幸事件》，成為MIRROR第6名發表個人音樂作品嘅成員。歌曲製作班底被指「華麗」，尤以填詞人Wyman時隔3年繼顏卓靈嘅《惡女》後再為新人填詞引起注意，並從此開始咗Wyman與MIRROR成員嘅頻繁合作。^[58][59]歌曲推出一日後MV已於YouTube攞得超過20萬點擊率，唔夠2日登上多個串流平台日榜第1位。^[60]呂爵安本人認為該歌曲之所以受歡迎係得益於《男排女將》同《2020年叱咤頒獎禮》令MIRROR得到更多人關注。^[60]歌曲先後喺903專業推介、新城勁爆流行榜及Chill Club 推介榜成為冠軍歌，係MIRROR及其成員所有單曲中首次達成三台冠軍歌。^[61]此派台成績被姜濤喺3月推出嘅個人單曲《Master Class》超越，後者成為四台冠軍歌（加上中文歌曲龍虎榜）。^[62]

MIRROR喺演唱會《MIRROR "ONE & ALL" LIVE 2021

》尾場感言（上）及演唱會結束後接受採訪（下）

}}2021年3月推出本年度第一首團體單曲《WARRIOR》，由曾為韓國女團TWICE作曲嘅義大利及韓國音樂人作曲，定位係一首具備氣勢同力量嘅作品。^[63]歌曲「戰意高昂」、「意志堅定」、「帶有推翻舊秩序之意」。因初選47人案被還押嘅前記者、立法會民主派候選人何桂藍喺獄中聞曲後向友人留低口訊表示還押一個月以來第一次哭、喊到收唔到聲，並引用曲中歌詞「大不了死，亦唔會避。」^[64]《WARRIOR》成為MIRROR團隊單曲中首支三台冠軍歌（903專業推介、中文歌曲龍虎榜同新城勁爆流行榜），其中喺商台903專業推介連續兩星期成為冠軍，係繼2006年軟硬天師嘅歌曲《好兄弟》後，相隔15年再有組合嘅歌曲喺該榜奪得雙周冠軍；此前10年間共有5首歌曲喺903專業推介奪得雙周冠軍。^[65][66]2021年5月6日至11日於九龍灣國際展貿中心匯星舉行一連六場《MIRROR "ONE & ALL" LIVE 2021》演唱會，坊間反應熱烈，立場新聞以「立場編輯部」名義借用《WARRIOR》歌詞「浩浩蕩蕩迎來另一新世紀」為題報道。^[67]係次演唱會後MIRROR再未表演過《WARRIOR》。^[68]

2021年6月28日至7月16日，由呂爵安、盧瀚霆同邱士縉參與主演、改編自日本朝日電視台2018年同名電視劇嘅15集同性愛情喜劇《大叔的愛》喺ViuTV首播。^[69]首播周收視錄得6.4點，係自三台（TVB、ViuTV、香港開電視）收視報告公開以來ViuTV嘅最高紀錄。^[70]其後收視逐周攀升，結局周收視達7.9點，觀眾人數將近52萬，創下ViuTV開台以來嘅最高紀錄。^{[71][72][73][74]}ViuTV嘅主要競爭對手、香港最大電視台TVB喺同一時段播出嘅重頭劇《刑偵日記》則「被節節擊潰」，最終創下開台53年以來最低嘅自家劇集收視紀錄（11.4點），並導致TVB引入劇本審批制度。^[73][74]劇集喺《觀眾喺民間電視大獎2021》中獲得包括「民選最佳劇集」同「民選最佳男主角（盧瀚霆）」在內嘅8個獎項成為大贏家，但都受建制派立法會議員何君堯公開批評「違反中國國安法」。^[75][76]劇集熱播帶挈3位成員以至MIRROR「人氣急升」，其中盧瀚霆喺Instagram上嘅追蹤人數喺劇集結束時達42萬，比2個月前增加80％，超越當時MIRROR中最受歡迎嘅成員姜濤成為追蹤人數最多嘅成員。^[77][78][79]

2021年7至8月嘅暑假檔期，MIRROR推出每星期一首新歌嘅暑假企劃。^[80]充當頭炮嘅係播放中嘅《大叔的愛》嘅片尾曲、盧瀚霆主唱嘅《不可愛教主》。^[81]由於歌曲喺7月7日、盧瀚霆生日當日推出，引起粉絲「鋪天蓋地」嘅慶生加新歌應援，陣容被指為「香港娛樂圈前所未見」。^{[82][83][84][85]}第三彈、呂爵安嘅《小諧星》MV觀看次數以2日16小時嘅時間超過100萬，令呂爵安繼《E先生 連環不幸事件》後再次成為MIRROR最快MV超過100萬觀看次數嘅成員。^[86][60]第五周推出嘅係姜濤悼念亡友之作《Dear My Friend,》，MV上架唔夠1日錄得超過76萬次點擊，唔夠3個月錄得超過1000萬次點擊，並喺10個月超過1700萬次點擊而成為YouTube上觀看次數最多嘅粵語音樂影片之一。^{[87][88][89][90]}第七首作品《虎道門》由正副隊長楊樂文與江𤒹生合作演繹，楊樂文亦由此以個人身份加入樂壇。^[91][92]暑假企劃後半嘅數首歌曲喺香港電台幾乎零播放、亦均未能打入「中文歌曲龍虎榜」，但喺另外兩家電台成績唔錯，引起樂迷懷疑港台喺頻繁人事變動嘅同時基於政治因素抵制MIRROR；港台發言人否認稱「冇出現特別情況。」^[93][94][95]

2021年，MIRROR喺香港嘅廣告代言「無處不在」，凡其成員代言過用過嘅產品都即變熱賣品。^{[96][97][98][99]}2021年上半年，MIRROR及其兄弟組合ERROR喺香港10大Instagram廣告開支最高品牌中佔一半，50大品牌中佔27個。^[100]2021年前8個月，MIRROR接拍廣告數量佔香港市場7成。^[101][102]縱觀全年，MIRROR喺Instagram涉及嘅品牌宣傳超過180個，十大最高廣告開支品牌中有近一半係由MIRROR推廣。喺社交媒體品牌內容廣告開支最高嘅十大KOL中，MIRROR成員佔一半。^[103]得益於MIRROR帶動廣告收入增加，MIRROR嘅經紀公司ViuTV嘅母公司電訊盈科喺公佈2021年上半年業績時預期蝕多年嘅ViuTV有望喺不久嘅將來轉虧為盈。^[104]綜合2021年全年，ViuTV及相關業務收益升1.52倍並首度轉虧為盈﹔電訊盈科指2021年係ViuTV標誌性嘅一年，MIRROR嘅成功為ViuTV提供「未來增長機遇嘅成功方程式」。^[105][106]大量MIRROR廣告亦引來反感，有業內人士批評指MIRROR正職唔係歌手而係廣告從業員、只顧商業利益而欠缺歌手應有嘅練歌時間。^{[107][98][108]}

MIRROR熱潮使2021年被香港媒體稱為「MIRROR年」。^{[109][110][111][112][113][114][115]}多家媒體包括香港Yahoo新聞、時尚雜誌Tatler（英文：Tatler）、經濟通等將MIRROR熱潮列為2021年度香港大事之一。^{[55][53][113]}「MIRROR」、「姜濤」同「盧瀚霆/Anson Lo」均位列Google「2021熱搜本地娛樂名人」同2021年Yahoo搜尋「十大熱搜娛樂圈風雲人物」排行榜嘅前三名。^[116][117]串流平台KKBOX、JOOX、Spotify同YouTube嘅2021年度歌曲榜前10中，MIRROR團隊及成員歌曲分別佔8、6、2同7首，其中呂爵安嘅《E先生連環不幸事件》喺四個榜上均名列第一。^{[118][119][120][121]}喺《2021年度叱咤樂壇流行榜頒獎典禮》嘅票選項目「我最喜愛嘅男歌手」中，MIRROR成員佔據咗最後5強嘅4個席位。^[122]另一票選項目「我最喜愛嘅歌曲」中，MIRROR及其成員嘅歌曲佔據10強嘅6個席位、5強嘅3個席位。^[123][124]2022年1月1日頒獎典禮當晚，商台主持林海峰主理咗一個專為MIRROR而設嘅「MIRROR樂壇流行榜頒獎典禮」環節，以該年流行歌曲改詞惡搞過去一年MIRROR喺香港引起嘅熱潮，成為全晚亮點。^{[125][126][127][128]}最終MIRROR及其成員合共獲得8個獎項，包括「專業推介叱咤十大」中嘅3席、首獲「我最喜愛嘅組合」、及姜濤再獲「我最喜愛嘅男歌手」同「我最喜愛嘅歌曲大獎」。^[129]部分成員開始獲得國際榮譽，如姜濤獲英文《Tatler》評為2021年300位「亞洲最具影響力人物」（Asia's Most Influential）之一、雜誌《Variety》評為「2021年國際突破之星」（International Breakout Stars），盧瀚霆喺韓國頒獎禮「Mnet亞洲音樂大獎」（MAMA）上成為「最佳亞洲新晉藝人（大中華區）」（Best New Asian Artist (Mandarin)）得主；後者被視為「MIRROR成功踩出香港嘅第一步」。^{[130][131][132]}

2022年2月，MIRROR以「四個驚喜」為主題連續推出4首成員單曲。^[133]其中頭炮、陳卓賢嘅《留一天與你喘息》MV喺情人節於YouTube上架後35日錄得千萬點擊，速度創下MIRROR成員新紀錄。^[134][135]第二彈係李駿傑首支個人派台單曲《半》，李駿傑都由此成為MIRROR第7名單飛成員。^[136]最後登場嘅《Rebound》由江𤒹生與王智德合唱，係王智德第一次以個人名義推出派台歌。^[137]

2022年4月底舉行嘅Chill Club 推介榜年度推介21/22上，MIRROR第2次獲得「Chill Club年度組合（金獎）」，連同成員歌曲共獲得包括「Chill Club年度之歌」在內嘅「Chill Club年度十大歌曲」中嘅5首，以及成員盧瀚霆同姜濤獲「「Chill Club年度男歌手」嘅前2位。^[138]緊接推出團體單曲《Innerspace》，為首個紅館演唱會造勢^[139]，並舉行記者會宣布於7月尾起舉行一連10場演唱會《MIRROR.WE.ARE LIVE CONCERT 2022》（後加至12場）。^[140]次日以「MakerVille旗下第一偶像團隊MIRROR」身份為所屬新公司MakerVille嘅成立發布會作壓軸表演。^[141]7月嘅第40屆香港電影金像獎上，MIRROR為頒獎禮做開場表演，跳唱原創主題歌曲《金人》。^[142]《MIRROR.WE.ARE LIVE CONCERT 2022》期間意外頻生，當中7月28日嘅第4場時懸空屏幕突然墮下，導致2名舞蹈員受傷。最後該場演唱會腰斬^[143]，主辦單位亦取消餘下場次^[144]。MIRROR全員停止公開活動兩個月，MIRROR及其成員參演嘅部分影視作品延期播出，現場表演需要延期或取消。^{[145][146][147][148]}

MIRROR嘅歌曲常以面對逆境嘅堅韌同新嘅開始為主題。^[149]MIRROR歌曲嘅歌詞堅守愛嘅宣言同自己無所唔可以嘅信念，而編排緊湊嘅音樂錄影帶同高度風格化嘅頭飾被指有K-pop嘅影子。^[150]MIRROR本身則公開表示唔希望有「韓風」嘅感覺，即使表演韓文歌曲亦希望以自己方法演繹。^[151]

MIRROR成員從比賽出道到逐步走紅嘅經歷為佢哋建立咗勵志嘅形象。葉劉淑儀喺對比MIRROR與韓星同中國大陸嘅明星後，指出MIRROR嘅唔同在於「成員各有背景，唔係全員小鮮肉，都唔係自幼受訓」，但相同點係足夠努力。佢認為MIRROR為香港年輕人提供咗一個香港自家製、通過努力獲得成功嘅例子。^[152]《經濟通》嘅Yan Law喺《MIRROR ONE & ALL LIVE 2021》演唱會後總結MIRROR受喜愛嘅原因包括對夢想有熱情、有志氣、同伴之間互相扶持、了解並改善自己嘅不足之處、以及真性情唔做作。^[153]前工商科技局長王永平認爲MIRROR嘅12子從《全民造星》以來喺淚汗交集中努力成長嘅經歷「係個令青少年產生共鳴嘅勵志古仔」，而MIRROR「係個為港人，尤其係青年人帶來積極意義嘅時代標誌」。^[154]

MIRROR從通過選秀節目出道嘅方式、組合嘅團徽、應援物到團隊綜藝節目嘅名稱都被指充滿韓國色彩。文化評論人李照興喺《香港經濟日報》將MIRROR與中國內地男團作比較，認為比起後者嘅全盤韓風，MIRROR嘅外形「較有辨識度及獨特型格，更時髦」。^[155]MIRROR喺公眾場合活動以長袖衫造型為主，即使酷熱天氣烈日當空亦唔例外，被指「冇夏天」。成員Alton解釋呢個係為咗營造莊重嘅感覺。^{[156][157][158]}

MIRROR政治色彩淡薄，具有中性嘅政治形象。^[159]MIRROR從未表達其政治立場，其所屬公司ViuTV積極避免其涉及政治，各成員喺日常生活中亦刻意避開政治話題。^[160]聯合早報嘅戴慶成指，MIRROR因爲作爲泛民主派嘅敵人（TVB）嘅敵人（ViuTV）嘅旗下藝人而能獲得香港泛民主派支持者嘅支持，而親政府陣營亦因爲形象中性嘅MIRROR能吸引泛民主派年輕人遠離政治而樂見其成，MIRROR都係因為咁受到向來忌諱喺政治話題表態而苦惱無明星代言可用嘅香港廣告商嘅歡迎。^[159]

MIRROR被認為引起咗香港出現久違、甚至係前所未有嘅追星熱潮。^{[161][162][56][163][164][165][166][167]}傳媒人蕭若元認為MIRROR「傾城」嘅紅喺香港史上從未見過，此前唯一可比嘅係譚詠麟同張國榮。^[168]日本NHK電視台喺國際報道中稱MIRROR為香港「空前嘅本地偶像（空前の地元アイドル）」。^[169]2021年4月，成員姜濤嘅粉絲為畀姜濤慶祝生日而合力買下銅鑼灣（姜濤所居住地區）大量當眼嘅廣告板及電車車身同車站廣告，使銅鑼灣變成「姜濤灣」；事件被認為係MIRROR所引起嘅追星行動嘅「一次質變」。^{[170][171][172]}由於MIRROR成員人氣過盛，喺公開場合出現常會影響附近商戶做生意，有關方面曾被投訴，所以好多商場訂立咗條例管制邀請MIRROR出席活動嘅主辦單位。^[173]一眾女「鏡粉」（MIRROR樂迷嘅暱稱^[174]）對MIRROR成員嘅追捧令佢哋嘅男朋友同老公們感到備受冷落，一「苦主」老公遂邀請身邊二十多名朋友加入其成立嘅一個Facebook群組「我老婆嫁左比Mirror導致婚姻破裂關注組（我老婆嫁咗畀Mirror導致婚姻破裂關注組）」以「圍爐取暖」，點知群組會員迅速以幾何級數上升，兩日已增至15.9萬，唔夠一周增至26.5萬，每日超過千條貼文，而每條貼文一般有二三千讚好及踰百留言，成為城中熱話，群組主要會員亦受到報紙及電視台採訪。^{[175][176][177]}事件被多家海外媒體報道，其中韓國傳媒《首爾新聞》以「陷入香港12人男團『MIRROR』嘅老婆，絕望嘅老公們」為題喺國際版作出深入報道。^{[178][179][150][180][181]}

MIRROR走紅嘅原因引起各界討論。行政會議成員葉劉淑儀指香港娛樂圈真空已久，MIRROR帶來嘅「盛況」多年未見，反映香港需要「本土偶像」，而MIRROR填補咗空缺。^[182]美國《紐約時報》2021年專文剖析指香港喺過去兩年多經歷2019年示威、武肺疫情同港區國安法等，政治上兩極分化，經濟上飽受摧殘，「急需一個振奮人心嘅源泉」，而呢個時候MIRROR嘅出現「似乎喺一夜之間佔領咗呢座城市——亦都喺征服城市嘅同時為佢注入咗歡樂」。^[150][183]香港中文大學研究流行文化嘅新聞與傳播學院教授馮應謙講，「突然之間，佢哋（MIRROR粉絲）意識到佢哋可以放下所有呢啲所謂嘅社會大事，有一啲更快樂、更有趣嘅嘢，吸引佢哋遠離年輕時嘅政治僵局」。^[183]端傳媒嘅陳子雲進一步分析指當政權以「限聚令」扼殺任何帶有政治意識嘅群眾聚集，群眾就以追星作為情感上嘅共同連結重奪公眾場域，以娛樂之名延續香港嘅獨特娛樂文化，同時搵到新嘅心靈寄託。^[170]

MIRROR嘅廣泛接受度被認爲能「統一一個分裂嘅城市」。^[150]香港政治光譜兩端嘅人士都對MIRROR有正面評價。民主派立法會參選人何桂藍喺獄中拜託泛民主派歌手黃耀明請求商台多播放MIRROR成員嘅歌曲，藉此透過大氣電波獲得精神支持及寄託。^[184]泛民主派前任區議員林兆彬喺眾新聞攢文稱MIRROR為「帶有政治符號嘅精神食糧」，支撐香港人喺情緒絕望壓抑時撐落去。^[21]學聯前副秘書岑敖暉以「獄中書簡」為Jer嘅叱咤入圍歌拉票。^[185]新民黨主席葉劉淑儀喺《經濟通》譔文指MIRROR嘅熱潮應該係社會「喜聞樂見」，並喺立法會提議政府爭取 MIRROR北上開拓中國大陸市場。^[182]商務及經濟發展局局長邱騰華表示會吸納葉劉嘅意見，並稱贊香港電視製作喺激烈競爭下仍能推陳出新成功造新星。^[186]香港最大政黨民建聯喺人才選掹考核設有關於MIRROR嘅通識問答。^[187]MIRROR唔對政治表態仍引來基於政治嘅批評。六四天安門事件32周年嘅維園燭光晚會未能舉行，但香港演藝界仍有人喺網上悼念，MIRROR則因爲冇表態而受到網民批評。^[188]新民黨成員李梓敬喺個人YouTube節目中解讀姜濤喺MIRROR嘅2021年演唱會尾場完結時高呼嘅一句「香港加油！」認為MIRROR明顯係「黃」（支持泛民主派），並引述一冇提供証據嘅網絡論壇帖子稱姜濤曾於2019年參與示威者佔領立會等活動。該節目上架9小時觀睇次數已踰12萬，其Facebook頁獲唔少留言支持。^[189]

MIRROR多名成員代言嘅品牌中包括大量被泛民主派人士標籤為「藍」（支持建制派）嘅品牌如美心、Deliveroo、麥當勞、茶木、滙豐等，《文匯報》認爲呢啲舉動令MIRROR嘅泛民主派粉絲處境尷尬。^[190]針對呢類對MIRROR等唔表態啲藝人「鬥黃鬥藍」嘅「批鬥」，喺台流亡港人彼岸喺中央廣播電臺譔文批評指「唔只係對人哋嘅唔尊重、對自己嘅唔信任，亦係對極權嚟講分散民眾凝聚力嘅最佳助力」。^[191]

唱碟

歌

派台歌曲成績

註：個人名義嘅派台歌，請參閱成員個人頁。

• （*）上榜中
• （-）未能上榜
• （×）冇派往該台
• （(1)）兩週冠軍
• 註 a: 包括2020年後嘅冠軍歌曲
• 註 b: 2020年起

綜藝節目（ViuTV）

• 2018年：《Good Night Show Mirror Go》
• 2018年：《香港除夕倒數》
• 2019年：《Mirror 成軍一週年》
• 2021年：《ViuTV 5周年：繼續向前》
• 2021年：《考有Feel》
• 2021年：《調教你MIRROR》
• 2021年：《MIRROR EURO 鬥Goal Fun》
• 2021年：《奧運有得揀》（2020東京奧運開幕禮）嘉賓
• 2023年：《MIRROR+》
• 2023年：《MIRROR Time》

劇集（ViuTV）

• 2018年：《做演藝嘅》（李駿傑、邱士縉、邱傲然）
• 2019年：《退休女皇》（姜濤、江𤒹生）
• 2019年︰《娛樂風雲》（李駿傑、邱士縉、呂爵安、邱傲然）
• 2019年：《信任的遊戲》（楊樂文、姜濤、陳卓賢、盧瀚霆、江𤒹生）
• 2019年：《黑市》（邱士縉、李駿傑、呂爵安、邱傲然、柳應廷）
• 2020年：《打天下》（江𤒹生）
• 2020年：《地產仔》（邱士縉）
• 2020年：《男排女將》（所有人）
• 2021年︰《太平紋身店》（姜濤、楊樂文、邱傲然）
• 2021年︰《無限斜棟有限公司》（陳卓賢）
• 2021年︰《大叔的愛》（呂爵安、盧瀚霆、邱士縉）
• 2021年：《超感應學園》（姜濤、盧瀚霆）
• 2022年：《IT狗》（楊樂文、邱士縉、陳瑞輝）
• 2022年：《I SWIM（呂爵安、邱士縉、王智德）
• 2022年：《野人老師》（邱士縉、陳瑞輝）
• 2022年：《季前賽》（姜濤、陳卓賢、呂爵安、邱士縉、盧瀚霆）
• 2022年：《繩角》（江𤒹生、楊樂文、王智德、邱傲然）
• 2022年：《百萬同居計劃》（盧瀚霆、柳應廷）
• 2023年：《大誠實家》（王智德）
• 2023年：《冰上火花》（陳卓賢、江𤒹生、楊樂文）
• 2023年：《社內相親》（呂爵安、盧瀚霆）

• 香港組合

• MIRROR嘅Instagram頁
• MIRROR喺Facebook嘅專頁
• MIRROR嘅Twitter
• YouTube上面嘅MIRROR官方嘅頻道
• MakerVille - MIRROR