賭廳
賭廳（官稱：貴賓廳（葡文：sala VIP）；防誤會用名：賭場貴賓廳／娛樂場貴賓廳）係種澳門賭場獨有嘅部件，主要用嚟做豪客生意，多數由疊碼仔負責拉客去嗰道賭，唔多受一般街客玩。[1]家陣，賭廳入面嘅賭局種類以百家樂為主。[2]
博彩公司會喺賭場入面，劃分出唔少包含若干張賭枱[註 1]，叫做賭廳嘅空間——多數會向外出租予廳主（官稱：博彩中介人（葡文：promotor de jogo）；防誤會用名：賭廳廳主／貴賓廳廳主），收入拆賬；[3]有少量賭廳由博彩公司自己管。[4]要細分嘅話，前者叫做私人廳（防誤會用名：外包貴賓廳／中介貴賓廳），後者名為公司廳（防誤會用名：自營貴賓廳／直營貴賓廳）；[5]若果唔註明，一般指前者[註 2]。私人廳嘅弊病係黑幫活動好多，公司廳之弱點為追債本事唔夠；[7]兩者經常爭生意——博彩公司得到客人嘅個人資料之後，可能會自己聯絡，遊説對方下次幫襯公司廳；[8]部分廳主會啗客人投注落得私人廳有嘅枱底賭局，或者將唔關嗰間賭場事嘅網絡賭博平台推薦畀佢哋。[9]
廳主可以係公司亦可以係自然人商業企業主，要向政府攞牌。[10]疊碼仔[註 3]通常要喺佢哋所服務嘅賭廳道開個户口，愛嚟擺現金、泥碼、現金碼乃至借錢同收佣金等。[11][12]有啲廳主會收佣金，由賭廳道間啲位出嚟，畀冇牌嘅友仔以股東之身分，開啲叫做櫃桶嘅檔口。[13]
賭場用嚟招呼街客嘅賭錢區域，叫做中場。[14]喺中場賭檯落注時，賭客所用嘅，幾乎都係由自己啲資產[註 4]換成嘅現金碼。[15]賭廳嘅特別之處，係往往會向賭客借出泥碼，對方埋單計數時，係輸咗錢嘅話，好快就會有人向佢哋攞債，期間合法同犯罪手段都可能會使出嚟，亦經常跨境越國噉搞；[16]喺呢方面，公司廳會比私人廳審慎得多。[17]
濠博新聞報道：博彩公司喺2021年12月之貴賓廳業務規模由大至細嘅排名為：銀娛、澳博、新濠、美高梅、永利、金沙；[18]喺2021年11月，以市場佔有率嚟計，最大嘅6個廳主依次係：德晉集團、太陽城集團、廣東集團、黃金集團、恒升集團、鉅星集團；[19]喺2022年2月8號時，只得澳博依然有私人廳於其賭場內營業，喺銀娛、永利、新濠、美高梅同金沙嘅賭場裏面，名義上做生意嘅只得公司廳，縱使實際上可能有博彩中介喺入邊開工。[20]德晉喺2021年12月8號發出通告，話其部份賭廳就快摺埋。[21]太陽城喺2021年12月10號停止做貴賓廳生意。[22]黃金喺2022年3月30號執笠。[23]
害
貓姐夫婦買兇殺自己逃債
喺2006年8月18號，周若紅同林保生／林寶生[註 5]被發現雙雙死喺珠海高爾夫山莊附近。[24][25]起初珠海市公安、澳門司法警察同賭場消息人士都以為，佢哋當時去嗰道追賭債期間俾人暗算；[26][27][28]廣東省公安認為似係謀財害命，重可能涉及到澳門賭場及其外圍利益嘅糾紛，稱之為「8·18」珠海高爾夫球山莊特大兇殺案。[29][30][31][32]珠海市公安喺2006年9月13號宣布破案——查到係死者買兇殺死自己，並已經拉齊哂五個嫌疑犯。[33][34]喺2008年7月21號，珠海市人民檢察院向媒體透露，佢哋確實係「僱兇殺己」，廣東省珠海市中級人民法院判決周海宏、李安江犯故意殺人罪，被處以有期徒刑十二年，剝奪政治權利兩年；陳家建、潘金來、楊政林犯故意殺人罪，被處以有期徒刑十四年，剝奪政治權利兩年；亦指出，死者因為多次高息借貸賭資畀人而收唔返，所以自尋短見嚟解脱債務糾纏，並且要整個假象出嚟。[35][36]周若紅人稱「貓姐」，生前係葡京娛樂場金寶殿行政總監兼股東，並且打理法老王宮殿娛樂場顯羅皇殿以及遊艇會娛樂場嘅一個賭廳——三間都係澳門實德有限公司嘅架步；另外一個死者係「貓姐」個老公，人稱「貓公」，有消息指佢係金寶殿嘅疊馬仔，亦有親人澄清話佢唔係，撈嘅係印刷；周海宏係「貓姐」嘅次弟，幫「貓姐」打理過賭場生意，喺案件中負責請殺手；陳家建同李安江買工具及策劃；落手嘅係潘金來同楊政林。[37][38][39]綜合罪犯作供，以及賭業人士分析：貓姐原本諗過自殺，無奈根據當時嘅江湖規矩，噉樣意味「父（／母）債子（／女）還」，連累到個女；覺得走投無路，先至會出此下策，買兇謀殺自己；如果係他殺嘅話，就會被視為因公殉職，賭廳唔單止會免咗佢筆賭債，重可能交低巨額恩恤金；而佢又驚拖累到細佬，於是寫低遺書交代來龍去脈，可惜事與願違，卒之周海宏要坐監收場；至於佢老公，本來可以一走了之……睇嚟係殉情之舉。[40]不過，有專家質疑以上講法。
洪欣被追數四百一十一萬
自2012年10月起，有人喺香港同澳門街頭貼咗唔少大字報，向洪欣追債。洪欣話，係老竇同人哋做嘅賭場生意糾紛，牽連到無辜嘅佢。[41][42]《蘋果日報》喺2012年12月7號，報道熟路疊碼仔「阿光」同其他人嘅爆料，話係個大衛會同發達會嘅麥姓負責人，向佢發出江湖追數令所致——係條疊碼數，有港紙四百一十一萬左右，事緣於洪父女喺2010年2月至6月，由上述兩者轉借咗啲泥碼，畀姓高同姓周嘅兩個大陸賭客，然而一直冇人還返，經追查，懷疑係俾洪父女落咗格……[43]又話洪欣經常上賭船同入澳門賭場博殺，後嚟重兼做疊碼妹，帶大陸富豪去賭；而洪父女之所以出事，好可能係因為佢哋採用咗風險同回報都高，親自揹數嘅揾食模式，而又䑛咗嘢……[44][45]大衛會同發達會都喺澳門辦賭廳，皆為黑幫生意，揸莊者分別為水房嘅黃強同十四K嘅「阿炳」。[46]
林燕羚贏逾三千萬無錢收
喺2013年10月8號，香港高等法院判香港人林燕羚欺詐罪罪名成立。辯方喺審訊時求情，提及：林之前因為債台高築，所以挪用客户存款；喺2012年8月21號／8月中一個星期之內[註 6]，喺澳門某賭廳[註 7]賭贏咗超過三千萬港幣，準備攞嚟還債同補鑊，點不知檔嘢只係肯畀佢攞走百多萬港幣，其餘嘅用張「存款單」代替；揾咗澳門嘅司法警察同律師幫手，都係收唔到錢；[47]喺同年9月18號，走投無路之下終於喺間香港嘅警署自首；[48]佢部份犯罪，係由騎龍同收數友迫出嚟嘅。[49]後來林所屬兼受害嘅瑞士信貸銀行香港分行出馬，追到一千四百萬港幣返嚟。[50]
黃山捲走八十億至一百億
喺2014年4月20號，黃山俾人經美好世界懸紅追尋，寫佢笠咗港紙八十億至一百億再人間蒸發；[51]佢之前以2.5厘嘅月息做誘因，吸納咗巨額存款。[52]黃可能同周濱關係密切，又識得唔少大陸高官同富商，係金麟集團嘅股東兼／或疊碼仔，而檔嘢喺澳門四間賭場經營賭廳[註 8]。消息傳咗出去之後，賭業股價紛紛急跌，又有好多投資者趕住去相關賭場攞走自己啲錢，金麟貴賓會老細何大志麻煩特別大。[53][54][55]呢單嘢通常叫做黃山事件或者黃山案。[56][57]喺2016年10月10號，自稱為「正義聯盟」嘅三個男人，喺網上宣布已經喺柬埔寨將黃生擒，再帶咗去越南，用埋影片同相佐證；部分內嵌恒升集團嘅廣告。[58]有消息話，越南差人按通嗮天嘅地址資料，喺同月14號捉咗黃並驅逐出境，至於踢咗去焉，就不得而知咯；[59][60][61]不過有行內人推測係流料，甚至懷疑成壇嘢包含個新嘅騙局。聲稱捉到黃嗰隊人嘅首領，係獎獎獎老虎機貴賓會嘅老闆張正。[62]
林積被指發窮惡亂追舊債
《壹週刊》第一三三四期報道：大約四十歲嘅丁女士向該傳媒投訴，喺十年前做女疊碼時，幫集美國際娛樂集團有限公司主席林英樂（暱稱「林積」）嘅賭廳拉客，當中有個借咗港元五十萬之後無還……件事不了了之，丁亦轉咗行；到咗2015年8月，佢同林再碰面時，對方忽然之間舊事重提，重叫職員攞張港元九千多萬嘅欠單出嚟，要佢孭飛，又用黑社會手段恐嚇。記者就此事問過林，對方答話只係追佢還港元五十萬，冇用過黑社會方法；又鬧丁黐咗線，重懷疑佢因𢱑撈唔成而誣衊自己。
陳恩鴻穿櫃桶底九千幾萬
喺2016年1月4號，有傳媒話：澳門凱旋門娛樂場貴賓廳營運副總裁陳恩鴻監守自盜，虧空公款，啱啱走咗路。[63][64][65]至於事件嘅前因後果為何，各方眾説紛云。[66][67]司法警察局指：喺2016年1月3號接到某賭場代表就此嘅報案，而單嘢涉款九千九百七十多萬港圓，正循詐騙罪方向調查；[68][69][70]有傳媒話：陳喺2015年12月30號開始聯絡唔到，並得知條數係九千六百萬港圓，其中包括價值九百萬港圓嘅籌碼……有人被走數一千萬港圓，於是向司法警察局求助……之後有一千七百萬港圓被起返出嚟，然而損失金額仍然有七千萬港圓。[71][72]有傳媒話：陳亦係該賭場內賭廳，富貴廳嘅廳主——檔嘢有做以高息為誘因吸納存款，並借出賭貸，算係非法集資嘅生意，之後遇到擠提，陳因無錢退畀人哋，而偷走該賭場交向各間賭廳嘅碼佣，然後着草……影響最少十間賭廳……揾唔返嗰啲失款用咗嚟還以上債項或者／以及俾陳帶走咗——……估計經過呢番操作，陳依然欠過億港圓街數；[73][74]博彩監察協調局指：呢單嘢唔關非法集資事，亦非其監管嘅問題……得知賭場負責人貼錢補咗被陳掠咗嗰條數。[75]呢間賭場乃澳門博彩股份有限公司嘅衛星場，而澳門凱旋門董事長梁安琪，事後被頻頻追訪，有傳媒話：陳係梁嘅得力助手。[76][77]是次風波被稱為凱旋門事件／凱旋門案。[78][79]陳喺2016年1月1號簽發咗張金額為$20,000,000.00港圓嘅支票畀某公司，由於兑現唔到，嗰間公司經法庭追討去到陳個老婆身上……最新判決出現於2021年3月11號——中級法院裁定陳個老婆有份孭嗰筆本金，以及其隨時間過去而衍生嘅利息。[80][81]
益
有好多年，賭廳為澳門賭場帶嚟大部分收入。[82]
注
拎
私
- 太陽城集團 Suncity Group︱非凡想像，引發無限可能
- 首頁 - 德晉集團
- 首頁 - 廣東集團 GuangDong Group
- 澳門黃金集團
- 首頁 - MEG STAR - 鉅星集團
- 恒升集團 Hengsheng Group--恒久鴻利 升值無限