Beata Heuer-Christen

D Beata Heuer-Christen isch d Dochter vum Gyger un Mitglid vum Bärner Berner Sinfonyorcheschter, Cäsar Christen,^[1][2] un dr Greti Christen-Schiffmann,^[1] wu au Gygeri im Bärner Sinfonyorchester un Primaria^[2] vum Schiffmann-Quartett gsii isch.

D Beata Heuer-Christen het z Bärn bi dr Maria Helbling,^[1] z Fryburg bi dr Margarethe von Winterfeldt^[1] un z Züri bi dr Dorothea Ammann-Goesch^[3] Gsang studiert un isch Brysdregeri vu internationale Wettbewärb gsii. Ni ire Studium het si aafangs as klassischi Kunzärtsängeri^[1] in Oratorie, Liederrezital, Funk- un Färnsehufname in verschidene Länder gschafft. Ire Schwärpunkt isch do im Beryich Neii Musik gläge. Si isch Interpreti in Uruffierige u. a. unter em Arturo Tamayo, em Hans Zender un em Wolfgang Fortner gsii.

Syt 1962 het si ne Lehrufdrag an dr Musikhochschuel Fryburg ghaa un vu 1980 bis 2005 isch si dert Brofässeri fir Gsang gsii.^[2] Dernäbe het si Maischterkirs gee^[4] in dr Fachberaich Oratorium, Opere un Lied.

Unter ire Schueler*ne findet mer Brysedreger*ne vu nazionale un internazionale Wettbewärb un Kunzärtsänger*ne bzw. Sänger*ne mit Engaschmänt an Operehyser z Paris, z München, z Hamburg, z Wien, z Dresden, z Leipzig, z Bärn, z Gämf un z Baasel. Dodrunter u. a. d Maria Bengtsson,^[5] d Rachel Harnisch, dr Bernhard Richter, dr Clemens Morgenthaler, dr Benoît Haller un dr Markus Flaig. E Dail vu ire Schueler*ne unterrichte hite as Brofässer*ne an dr Musikhochschuele Bärn un Fryburg.

D Heuer-Christen isch mit em Pianischt un Gimnasiallehrer Friedrich Heuer^[1] (1935–2009) ghyrote gsii un het zwoo Dechtere. Si läbt in dr Nechi vu Fryburg.

• Heuer-Christen, Beata. In: Kürschners Musiker-Handbuch 2006. K. G. Saur Verlag, München 2006, ISBN 978-3-59824-212-0, S. 183.