Matarranya

En la suya mayor parte corresponde a lo semontano de los Puertos de Beceit, macizo montanyoso que se distribuye en lo cabo sud d'esta comarca y tamién por las zonas mugants de las provincias de Tarragona (Puertos d'Horta, Puertos de Tortosa), y Castellón (Puertos de Moriella).

Mugas

Muga a lo norte con lo Baixo Aragón-Casp, a l'este con Tarragona, a lo sud con Castellón y a l'ueste con a comarca oficial dita Baixo Aragón. La forman 18 municipios y lo despoblato de Mas de Llaurador.

Fueras de Val Chunquera, que ye con las parlas de lo Guadalop-Mezquín y La Fraixneda, las parlas d'o Matarranya gosan estar prou homochenias y perteneixen a lo subdialecto tortosín chunto con lo que se charra en lo Baixo Ebro, Tierra Alta y Los Puertos de Moriella.

Bi habió una prebatina de reconquiesta con Alifonso I lo Batallero, que plegó ta Horta de Sant Joan, pero dimpués de la batalla de Fraga los cristianos rebloron y los musulmans recuperoron la comarca. La reconquiesta definitiva se produció a fins de lo sieglo XII con Alifonso II lo Casto. Dimpués de la reconquiesta gran parte de la comarca fue cedida a l'orden de Calatrava. Lo 24 de chulio de 1175, lo Casto deseparó un territorio concediu teoricament a los calatravos en 1157: Mazalión y la Penya d'Aznar Laganya. La Penya d'Aznar Laganya yera una tenencia con las localidaz de Mezquín y Foz Espalda y con capital en Val de Robres. Mazalión y la Penya d'Aznar Laganya pasan a depender de lo bispe de Zaragoza. Los templers tamién i teneban representación, pero las mugas entre las dos órdens no yeran fixas a lo prencipio, porque feban cambios de tierras y lugars.

Seguntes Carlos Laliena los musulmans fuoron acotolaus u forachitaus en la guerra de reconquiesta y la comarca yera vuida. La repoblación estió de mayoría catalana y proveniba de lo campo de Leida. Lo resultau estió que encara huei se charre catalán occidental, como en Leida, Tortosa y Castellón. Existen textos de pagos de indemnizacions a lo bispe de Leida por las decimas y primicias que los repobladors deixan de pagar. Pa atrayer a los repobladors lis daron privilechios y lis facioron pagar impuestos menors, a vida yera mas periglosa porque yera una tierra de muga: Os actuals Puertos de Moriella yeran plenos de moros fuyius de Leida, que podeban fer incursions en territorio cristiano. Entre los pobladors amás de catalans, bi heba occitans (Bretó, Gascón, Vidal) y, seguindo lo camín natural de la depresión de l'Ebro, castellanos (Molina, Soriano) y aragoneses (Robres, Fonz). Los pobladors no s'establioron con fuerza dica lo zaguer cuarto de lo sieglo XIII.

Cuan Blasco d'Alagón conquerió Moriella, reinando Chaime I, lo Matarranya dixó d'estar tierra de muga con los moros. En los repartos de la Corona d'Aragón que feba Chaime I, lo Matarranya y la Tierra Alta feguraban en Aragón; anyos dimpués de la muerte de Chaime I la muga local definitiva entre Catalunya y Aragón se fació en lo río Algars tenendo en cuenta la muga definitiva entre calatravos, en la marguin ezquierda de L'Algars y los Templers, en la marguin dreita.

• Lista de molimentos d'o Matarranya.

Comarcas d'Aragón

Alto Galligo · Andorra-Sierra d'Arcos · Aranda · Baixo Aragón · Baixo Aragón-Casp · Baixo Martín · Campo de Belchit · Campo de Borcha · Campo de Carinyena · Campo de Daroca · Chacetania · Cinca Baixa · Cinca Meya · Cinco Villas · Comarca Central · Comunidat de Calatayú · Comunidat de Teruel · Cuencas Meneras · Gúdar-Chabalambre · Litera · Mayestrato · Matarranya · Monegros · Plana de Uesca · Ribagorza · Ribera Alta d'Ebro · Ribera Baixa d'Ebro · Sierra d'Albarracín · Sobrarbe · Semontano de Balbastro · Tarazona y Moncayo · Xiloca · Val de Xalón