Beta Doradus
Beta Doradus (β Dor / HD 37350 / HR 1922)[9] ye la segunda estrella más brillosa de la constelación de Doráu dempués de α Doradus.Ye una variable cefeida que'l so rellumu varia ente magnitú +3,46 y +4,08 nun periodu de 9,8426 díes.[10]Dicha variación ye perceptible a simple vista, al igual qu'asocede n'otres cefeides como Eta Aquilae, Mekbuda (ζ Geminorum), W Sagittarii o X Sagittarii.
5h 33m 37.516s, -62° 29′ 23.376″
Como toles demás cefeides, Beta Doradus ye una superxigante mariella que'l so tipu espectral camuda de F6 a G5 col subsiguiente cambéu en temperatura, siendo la so temperatura efectivo media d'unos 6000 K.[11]De gran tamañu, el so radiu ye ente 50 y 65 vegaes más grande que'l radiu solar y xira sobre sigo mesma con una velocidá de rotación proyeutada —llende inferior de la mesma— de 6 km/s.[12]Relluma con una lluminosidá averada 3000 vegaes mayor que la lluminosidá solar y tien una masa 6,5 vegaes mayor que la del Sol. Les estrelles tan masives tienen una vida curtia; la edá de Beta Doradus envalórase en namái 60 millones d'años y yá s'atopa nuna fase avanzada de la so evolución estelar.[11]
Beta Doradus presenta un conteníu metálico comparable a la solar, siendo'l so índiz de metalicidá [Fe/H] = -0,01.[13]Tocantes a otros elementos evaluaos, carbonu y magnesiu son la metá d'abondoses que nel Sol, ente que el gadolinio (Z = 64) ye un 60% más abondosu.[14]
La midida de la so paralax col Telescopiu Espacial Hubble (3,14 ± 0,16 milisegundos d'arcu)[13] axudica a Beta Doradus una distancia de 1040 años lluz respectu al Sistema Solar.