Dune (película de 1984)

Por orde imperial, la familia Atreides tendrá de faese cargu de la esplotación del desérticu planeta Arrakis, conocíu tamién como «Dune», que ye l'únicu planeta au s'atopa la especie melange, una potente droga que, arriendes, ye necesaria pa los vuelos espaciales. Enantes, el planeta fuera gobernáu polos Harkonen, qu'exercieren el so mandatu con puñu de fierro, dexando una buelga indeleble na población indíxena del planeta. Cuando los Harkonen ataquen el planeta col beneplácitu del Emperador pa retomar la so posición dominante sobro'l planeta, Paul, el fíu del duque Leto Atreides, tendrá de fuxir al desiertu, au lu esperen múltiples peligros y una última oportunidá de vengase y tornar al so llexítimu llugar como gobernante d'Arrakis.^[9]

• Kyle MacLachlan como Paul Atreides.
• Francesca Annis como Lady Jessica.
• José Ferrer como l'emperador Shaddam IV.
• Virginia Madsen como la princesa Irulan.
• Sean Young como Chani.
• Everett McGill como Stilgar.
• Patrick Stewart como Gurney Halleck.
• Sting como Feyd Rautha.
• Jürgen Prochnow como'l duque Leto Atreides.
• Richard Jordan como Duncan Idaho.
• Siân Phillips como la reverenda madre Gaius Helen Mohiam.
• Max von Sydow como Dr. Liet Kynes.
• Honorato Magaloni como Otheym.
• Dean Stockwell como Dr. Yueh
• Brad Dourif como Piter de Vries.
• Silvana Mangano como la reverenda Madre Ramallo.
• Jack Nance como Nefud.
• Paul Smith como Glossu Rabban.
• Alicia Witt como Alía Atreides.
• Kenneth McMillan como'l barón Vladimir Harkonnen.
• Freddie Jones como Thufir Hawat.
• Carla Rigg como estra.

Alejandro Jodorowsky

El primer intentu de llevar a la pantalla grande la novela homónima de Frank Herbert, nos años 1970, tuvo dirixíu pol chilenu Alejandro Jodorowsky, que trabayó nel proyeutu mientres más de cinco años. A lo llargo de la conceición y el procesu de rodaxe, Jodorowsky convidó a participar a los que dixo que yeren los sos «cinco samuráis». Estos yeren célebres artistes: l'actor, direutor, guionista y productor estauxunidense Orson Welles, el pintor surrealista español Salvador Dalí, l'ilustrador inglés Chris Foss, la banda inglesa de rock Pink Floyd y l'artista gráficu y escultor suizu H. R. Giger. Toos so la direición artística del dibuxante francés Moebius. En retrasando'l proyectu numberoses vegaes, la compañía productora retiróse dexando en suspensu l'adaptación fílmica de Dune.^[10]

David Lynch

En 1976 el productor italianu Dino De Laurentiis fízose colos derechos y en 1979 contrató a Ridley Scott como direutor, que quería estremar el proyeutu en dos películes. Dempués de que Scott dexara la producción por considerar que diba riquir d'un trabayu qu'entós nun podía asumir, a empiezos de la década de 1980 renegociáronse los derechos y convencióse a Universal Studios pa llevar alantre l'adaptación. Raffaella De Laurentiis, fía de Dino, escoyó como nuevu direutor y guionista a David Lynch.^[11]

La tercer película que rodó Lynch y la primera en color, nun pudo ser lo que nun principiu tenía en mente'l cineasta, a la de rodala. La película, con un metraxe inicial d'ocho hores foi amenorgáu por el mesmu Lynch a cinco pa la so exhibición cinematográfica. Sicasí, Dino de Laurentiis y la so fía obligáronlu a faer unu amenorgamientu importante de montaxe, dexándola en 137 minutos, coles consecuencies qu'ello traxo cuando foi asoleyada al públicu. Daveres previóse una duración de casi trés hores, por que'l públicu pudiera entender la trama (la novela contién complexos elementos argumentales), que a la fin amenorgóse a pocu más de dos, polo que la película nun siguió puntu per puntu a la famosa novela, pero, a pesar de delles faltes y sobrecargues, retrató con fidelidá l'universu concebíu per Herbert.^[12] Esti inconveniente con Dino de Laurentiis provocó que Lynch acabara tarreciendo la película arriendes de prometese nun volver trabayar nunca más con grandes productores.^[13]

A pesar del gran presupuestu de la película, Dune foi un verdaderu fracasu en taquilla nel momentu del so estrenu. Güei, sicasí, munches crítiques retractáronse de los sos arrebexos escontra'l filme ya inclusive anguaño ye consideráu un filme de cultu del xéneru.^[14]

En febreru de 2017, Brian Herbert confirmó que'l director canadiense Denis Villeneuve fadríase cargu d'una nueva adaptación cinematográfica del universu de Dune.^[15] El cineasta declaró que la nueva versión nun diba ser un remake de la película de 1984 sinón una adaptación fiel a la novela d'Herbert afigurada en dos películes y tardándose probablemente dos años en facese.^[16][17][18] La producción dio entamu'l 18 de marzu de 2019 en Budapest y Xordania.^[19][20]

• Páxina web oficial (n'inglés)