Estáu satélite
Estáu satélite ye unu de los axetivos peyorativos que se-y da en política internacional a cualesquier Estáu que, magar ye nominalmente independiente y ye reconocíu por otros, na práutica atópase supuestamente suxetu al dominiu políticu o ideolóxicu de dalguna potencia. Al igual qu'asocede con términos similares como gobiernu títere, la catalogación d'un Estáu como satélite ye considerada partidista y mesma de los detractores de los gobiernos en cuestión.
El términu, analoxía de los cuerpos celestes qu'orbiten alredor d'unu mayor, foi primeramente utilizáu pola prensa capitalista pa referise a los países del Pactu de Varsovia y la so estrecha rellación cola Xunión Soviética mientres la Guerra Fría. Otros Estaos socialistes, como Corea del Norte (particularmente nes décades posteriores a la Guerra de Corea) o Cuba (especialmente dempués d'integrase nel CAME) tamién fueron nel so momentu catalogaos como «satélites soviéticos». Pela so parte, la prensa del campu socialista solía usar definiciones de similar calibre pa referise a Estaos capitalistes periféricos y los aliaos d'Estaos Xuníos na OTAN, contracara del Pactu de Varsovia. Asina, tantu la prensa de la República Democrática Alemana como la d'otros países socialistes, referíase frecuentemente a l'Alemaña Occidental como un gobiernu títere de la OTAN y los Estaos Xuníos.
Acusaciones d'Estaos de ser satélites soviéticos
A la fin de la Segunda Guerra Mundial, diversos países d'Europa Oriental y Central pasaron a tar influyíos, política y militarmente, pola Xunión Soviética.[1] Tropes soviétiques permanecieron nesos países dempués del fin de la guerra,[2] anque de dalgunos retiráronse.[3]
Los Estaos acusaos de ser satélites de la Xunión Soviética fueron:[2][4][5][6] Albania (en 1960 rompería cola Xunión Soviética), Alemaña Oriental, Bulgaria, Checoslovaquia, Hungría, Polonia y Rumanía n'Europa y Mongolia n'Asia.
Yugoslavia, dacuando tamién foi calificada como un satélite soviéticu»,[2][4] anque s'alloñó de la URSS tres la ruptura Tito-Stalin y darréu ayudó a formar el Movimientu de Países Ensin Alliniar. La República Popular d'Albania, sol lideralgu del estalinista Enver Hoxha, rompió les rellaciones cola Xunión Soviética en 1960, dempués de la desestalinización soviética.[7] Estos países fueron toos miembros del llamáu Bloque del Este.
Usu del términu tres el final de la Guerra Fría
Dellos observadores espresaron la so esmolición por que les intervenciones militares y diplomátiques d'Estaos Xuníos n'Oriente Mediu podríen derivar nel equivalente d'un Estáu satélite. William Pfaff alvirtió de qu'una presencia norteamericana permanente n'Iraq sería «convertir a Iraq nun Estáu satélite d'Estaos Xuníos».[8] El términu tamién s'utilizó pa describir la rellación ente El Líbanu y Siria, que foi acusáu d'intervenir nos asuntos políticos d'El Líbanu.[9]
Ver tamién
- Gobiernu títere
- Estáu vasallu
- Suzeranía
Referencies
Datos: Q325261
