Laura Gallego García

Entamó a escribir Zodiaccía, un mundu distintu a la edá de 11. Tardó trés años en terminalo y, anque nunca s'espublizó, guarda un ciñu especial a esi rellato. Entós yá tuvo nidio que quería ser escritora y mientres años unvió los sos escritos a diversos concursos lliterarios.^[6]

A los 21 años, n'acabando'l bachilleratu, decidió estudiar Filoloxía Hispánica na Universidá de Valencia. Siguía unviando los sos testos a editoriales y concursos pero nun llogró publicar un res hasta qu'escribió Finis Mundi. Enantes, escribiera 13 llibros, pero nengún d'ellos vio la lluz. Con Finis Mundi l'autora, tres dellos años de participación, ganó nel añu 1998 el Premiu Barcu de Vapor, celebráu pola Editorial SM.^[6]

A Finis Mundi siguiéron-y títulos como Mandrágora (Pearson Alhambra), o la tetraloxía Crónicas de la Torre. Sicasí, anque la so fama débese principalmente a les noveles xuveniles, espublizó tamién obres empobinaes a un públicu infantil.^[8]

En 2002, foi gallardoniada de nuevu nesti concursu, esta vegada pola so novela La leyenda del Rey errante. Tamién publicó en SM El coleicionista de relojes extraordinarios, la triloxía Memorias de Idhún, Donde los árboles cantan, Dos velas para el Diablo, la saga Crónicas de la Torre y Las hijas de Tara.

En 2004 empezó a espublizar la so segunda triloxía, titulada Memorias de Idhún (Memorias de Idhún I: La Resistencia, Memorias de Idhún II: Tríada, Memorias de Idhún III: Panteón) cola que collechó'l so mayor ésitu a fecha de 2017, con más de 1.000.000 d'exemplares vendíos. Memorias de idhún cunta con una adautación a novela gráfica.

Ye fundadora de la revista universitaria Náyade, que distribúi la Facultá de Filoloxía de la Universidá de Valencia y de la que foi codireutora dende 1997 hasta 2010.^[8]

Dempués espublizó dellos llibros independientes, la mayoría de temática fantástica, amás de la segunda parte d'Alas de fuego, titulada Alas negras. Tamién s'enfusó na lliteratura realista cola serie Sara y las goleadoras, qu'inclúi títulos como: Creando equipo, Las chicas somos guerreras, Goleadoras en la liga, El fútbol y el amor son incompatibles, Las Goleadoras no se rinden y El último gol. La so novela Donde los árboles cantas, publicada n'ochobre de 2011, ganó'l Premiu Nacional de Lliteratura Infantil y Xuvenil correspondiente al añu 2012. Coles mesmes, la so trayectoria viose compensada col Premiu Cervantes Mozu. Esi mesmu añu 2012 volvió a la lliteratura infantil con Magu per casualidá.

En marzu de 2017, publicó Por una rosa, un llibru que contién trés rellatos escritos por trés autores distintos: Laura Gallego, Javier Ruescas y Benito Taibo. Trata de trés histories ambientaes nel universu del cuentu clásicu La bella y la bestia.^[9]

En 2018 espublizó: El bestiario de Axlin el primer llibru de la triloxía Guardianes de la ciudadela y El secretu de Xein segundu llibru d'esta saga y la tercera y última parte d'esta saga salió'l 29 de marzu de 2019 col so titulo La misión de Rox.

Laura Gallego esploró gran parte de los temes lliterarios: entama escribiendo lliteratura históricu-fantástica, cola so novela Finis Mundi; pero prueba tamién cola ciencia ficción, con Las hijas de Tara; y más tarde la fantasía épica con Memorias de Idhún; ensin escaecer tampoco la so lliteratura infantil.

Na so narrativa fantástica, y particularmente en Memorias de Idhún, el tema amorosu ye tantu o más importante que'l fantásticu, fechu que la diferencia netamente del modelu de Tolkien: los personaxes espresen darréu los sos sentimientos, duldes, celos, deceiciones, etc., y empónense por ellos, xeneralmente más que por otros conceutos como l'honor o'l deber. Asina, la reflexón sobre'l mesmu sentimientu ocupa muncho espaciu nos diálogos y la reproducción del pensamientu, fechu favorecíu pola decisión d'emplegar un apasionáu triángulu amorosu na so obra Memorias de Idhún. La so obra toma dellos elementos como inspiración de les noveles de Margaret Weis y Tracy Hickman, como El Ciclo de la Puerta de la Muerte, La espada de Joram y Dragonlance.