Polu soberanista

A principios de 2005 foi refugáu pol Congresu de los Diputaos d'España un proyeutu de nuevu estatutu políticu aprobáu pol Parllamentu Vascu. Arriendes de esti fechu y de una forma más bultable dende 2008, ante la falta d'una respuesta práutica a la prohibición per parte del Tribunal Constitucional de realizar una consulta sobre'l estatus políticu del País Vascu,^[1] les fuercies nacionalistes a la izquierda del Partíu Nacionalista Vascu (PNV) aldericaron la constitución d'un polu soberanista,^[2] que'l so fin sería impulsar la independencia d'Euskal Herria.

La propuesta englobaría a Batasuna, Eusko Alkartasuna (EA), Aralar y a les bases de la PNV, y escluyiría a la direición d'esti postreru, amosándose partidaries de la so creación la izquierda abertzale ilegalizada y EA.^[3] Sicasí, tanto EA como Aralar punxeron como condición previa l'alloñamientu de Batasuna d'ETA y el cese de l'actividá terrorista d'ésta.^[4] Coles mesmes, dende Aralar dexóse clara la so idea de nun interpretar el polu soberanista en clave de frente eleutoral.^[5] En payares de 2008, el exportavoz de Batasuna Arnaldo Otegi fixo la so primer declaración pública en defensa d'esta nueva estratexa.^[6]

Sicasí, dende dellos medios de comunicación, tamién s'apuntó la posibilidá de que Batasuna buscara llegalizase como parte d'una coalición independentista con partíos llegales al traviés del yá mentáu polu soberanista.^[7] Opción que refugaron tantu EA^[8] como la izquierda abertzale ilegalizada, que comprometíase na resolución Zutik Euskal Herria na creación d'un nuevu partíu políticu independentista y d'izquierdes.^[9] Esti nuevu partíu sería Sortu.^[10]

Pela so parte, EA decidió dar un xiru a la so política de pactos col PNV caltenida dende les eleiciones al Parllamentu Vascu de 2001, optando por presentar se en solitariu nes cites eleutorales de 2007 y 2009, y alloñar de la PNV ensin refugar la opción de xuntase al polu soberanista,^[11] lo que-y supunxo la dixebra de la so sector críticu.^[12] Darréu, nuna conferencia política celebrada en payares de 2009, EA concretó'l so apueste por un alcuerdu ente fuercies abertzales pa consiguir la independencia de Euskal Herria.

El 30 de xineru de 2010 presentóse la plataforma Adierazi EH en favor de los derechos civiles y políticos pa Euskal Herria.^[13] En marzu creóse la rede social Independentistak, qu'arrexunta a independentistes pertenecientes a la política, el sindicalismu y el mundu de la cultura y el deporte, siendo'l so primer actu importante la convocatoria d'un Aberri Eguna unitariu ente Irún y Hendaya.^[14] Per otru llau, los sindicatos ELA, LAB, ESK, Hiru, ELB, EHNE y Steilas fueron trabayando conxuntamente, concitando el sofitu ante les sos movilizaciones de tol espectru de la izquierda abertzale, incluyíos partíos como EA, Aralar y Alternatiba (dixebra soberanista d'Ezker Batua).^[15][16]

El 20 de xunu, miembros de Eusko Alkartasuna y ex cargos de Batasuna presentaron en Bilbao les Bases d'un alcuerdu estratéxicu ente fuercies polítiques independentistes, roblaes ente «EA y l'izquierda abertzale» pa collaborar por esti oxetivu, nel que ratificaben que «el diálogu multipartito tien de desenvolvese sobre la base de los Principios Mitchell», incluyendo'l compromisu con arrenunciar al usu de la violencia, y al refugu a tou intentu por otros al usu de la fuercia, o l'amenaza d'usala, pa intentar influyir nel cursu o la resultancia de les negociaciones multipartitas».^[17][18][19]

El 25 de setiembre, la izquierda abertzale ilegalizada, Eusko Alkartasuna, Aralar, Alternatiba y Abertzaleen Batasuna (AB), xunto colos sindicatos LAB, ESK, Hiru, ELB, EHNE y STEE-EILAS y otres organizaciones sociales, formalizaron en Gernika un Alcuerdu pa un escenariu de paz y soluciones democrátiques (conocíu como Alcuerdu de Gernika)^[20] nel que se pidía a ETA «un altu'l fueu permanente, unillateral y verificable pola comunidá internacional como espresión de voluntá pa un definitivu abandonu de la so actividá armada», según la derogación de la Llei de Partíos y de la llei antiterrorista, el cese de «tou tipu d'amenaces, presiones, persecuciones, detenciones y tortures contra toa persona por razón de la so actividá o ideoloxía política», l'acercamientu de presos a los sos llugares d'orixe, midíes de llibertá pa presos gravemente enfermos, la eliminación de la «doctrina Parot» y la revisión de procesos xudiciales.^[21]

El 30 d'ochobre Alternatiba celebró la so primer Asamblea Nacional, na qu'apostaron pola confluencia estratéxica de los partíos soberanistas d'izquierdes que roblaron el Alcuerdu de Gernika.^[22] Dos selmanes dempués, la izquierda abertzale ilegalizada fixo una ufierta a EA y Aralar p'allegar xuntos a les eleiciones de Navarra^[23] que, en siendo refugáu por Aralar, amplió al conxuntu d'axentes políticos ya independientes» de Nafarroa Bai.^[24] Esta ufierta non yá nun foi aceptáu sinón que finalmente favoreció la espulsión d'EA, al negase esta formación a romper el so alcuerdu estratéxicu independentista, lo que, xuníu al abandonu previu de Batzarre, supunxo la nueva coalición Nafarroa Bai 2011 integrada por Aralar, PNV y dalgunos independientes.^[25][26]

El 10 de xineru de 2011, cuatro meses dempués d'anunciar un cese d'aiciones armaes ofensives», ETA anunció nun nuevu comunicáu la so decisión de declarar un alto'l fueu permanente, xeneral y verificable»^[27] que foi acoyíu con escepticismu pol gobiernu español y la mayoría de les fuercies polítiques, pero que los firmantes del Alcuerdu de Gernika consideraron un pasu positivu» y «d'induldable valor» nel procesu de paz y de soluciones democrátiques pa la normalización política.^[28]

El 16 de xineru, Alternatiba, EA y l'izquierda abertzale ilegalizada roblaron l'alcuerdu estratéxicu políticu-social Euskal Herria ezkerretik (Euskal Herria dende la izquierda) pa trabayar «de manera conxunta y prioritaria» na defensa de la soberanía de Euskal Herria» dende'l refugu a les estratexes y espresiones violentes», pero dende una perspeutiva d'izquierdes «que busque un tresformamientu fondu del modelu socioeconómico». L'alcuerdu quedaba circuscrito a Navarra, Vizcaya, Guipúzcoa y Álava, y recoyía la intención de «confrontar a la derecha en tolos ámbitos» y xenerar «alternatives que superen y tesciendan los actuales sistemes de dominación».^[29][30] Los trés grupos firmantes convidaron a Aralar por que collaborara con ellos, respetando'l calter estremáu de cada fuercia político.^[31]

A finales de marzu, EA anunció qu'en Navarra se presentaría a les eleiciones foral y municipal nuna nueva coalición formada cola plataforma ciudadana Herritarron Garaia,^[32][33] ente que nel País Vascu llegó a un alcuerdu eleutoral con Alternatiba.^[34] Esta nueva coalición finalmente concretóse en Bildu.^[35]

Nes eleiciones municipales, forales y autonómiques de mayu d'esi añu, Bildu quedó como segunda fuercia político nel País Vascu (por detrás de la PNV) y cuarta en Navarra (por detrás de NaBai 2011). Pa les eleiciones xenerales de payares, propunxeron la creación d'un frente soberanista xunto a la PNV y Aralar.^[36] Aralar alcordó allegar xunto coles fuercies de Bildu, ente que la PNV refugó confluyir nesta alianza eleutoral, quedando asina constituyida la mayor coalición soberanista d'izquierdes de la democracia: Amaiur.^[37]

El 20 d'ochobre de 2011, trés díes depués de la celebración de la Conferencia Internacional de Paz de San Sebastián, ETA anunció «el cese definitivu de la so actividá armada» nun comunicáu nel que fizo «un llamamientu a los gobiernos d'España y Francia p'abrir un procesu de diálogu direutu» destináu a solucionar «les consecuencies del conflictu».

Mientres l'añu 2012, Sortu foi, a la fin, llegalizáu, y xunto con EA, Aralar, AB y Alternatiba establecieron una unidá d'aición estratéxica y nacional basada na defensa de Euskal Herria y la so construcción, el llogru de la paz, la oficialidá del euskera y l'impulsu a un modelu económicu soberanu, xustu y ecolóxicu.^[38] Estes fuercies tamién suscribieron un alcuerdu estratéxicu de llargu plazu qu'ufiertara a la ciudadanía vasca un proyeutu de soberanía nacional y de tresformamientu social, apostando pola construcción d'alternatives vidables» que punxeren la economía «al serviciu de la ciudadanía». Esta alianza política viose remozada cola coalición Euskal Herria Bildu (EH Bildu) de cara a les eleiciones al Parllamentu Vascu de 2012.^[39]

El 29 de mayu de 2014, el Parllamentu Vascu ratificó'l derechu a l'autodeterminación de Euskal Herria,^[40] nuna declaración ensin efeutos xurídicos,^[41] impulsada por EH Bildu y sofitada pol PNV, que yá foi aprobada en 1990 colos votos a favor de PNV, EA y EE.^[42]

El 8 de xunu, la plataforma Gure Esku Dago, que trabaya pola socialización del derechu d'autodeterminación, llevó a cabu una cadena humana pol derechu a decidir de Euskal Herria que xunió Durango y Pamplona y que tuvo una participación d'unes 150.000 persones, ente les que s'atopaben persones del mundu de la cultura, del deporte o de la política.^[43]

El 20 d'avientu, Euskal Herria Bai (EH Bai) aprobó n'asamblea la so converxencia como movimientu unitariu de la izquierda abertzale del País Vascu francés, apostrando a los partíos integrantes de les decisiones polítiques de la formación.^[44]

El 24 de xineru de 2015, EH Bildu y EH Bai presentaron una propuesta conxunta de procesu constituyente pa la creación d'un Estáu vascu pa Euskal Herria, por aciu un modelu empobináu a buscar consensos que dexaren exercer el derechu a decidir, almitiendo que Navarra y Iparralde lleven los sos propios ritmos, al atopase nuna situación de partida distinta.^[45]

A principios de setiembre de 2017, los sindicatos ELA y LAB propunxeron conxuntamente poner en marcha un procesu soberanista unillateral y social» nel País Vascu y Navarra dende la izquierda política y el movimientu sindical p'algamar un «nuevu estatus políticu con plenes competencies llexislatives nel ámbitu sociolaboral y socioeconómico».^[46]