Wikipedia:Dŏng-nièng gĭng-dáng/4 nguŏk

4 nguŏk 1 hô̤:

• 1867 nièng: Sĭng-gă-pŏ̤ biéng-siàng Ĭng-guók gì sĭk-mìng-dê.
• 1939 nièng: Să̤-băng-ngà ciŏng-gŭng Francisco Franco sŏng-buó Să̤-băng-ngà Nô̤i-ciéng giék-sók, kăi-sṳ̄ ĭ gì dŭk-cài tūng-dê.
• 1945 nièng: Mī-guók buô-dôi dĕng-lṳ̆k Nĭk-buōng tūng-dê gì Okinawa, cĭ-hâiu páh chă-bók-dŏ̤ săng-ā-nguŏk-nĭk, sĕ̤ng-huŏng dŭ-liāng sĕng--kó̤ sĕk gūi uâng nè̤ng (Okinawa Ciéng-ĭk, dù).
• 1976 nièng: Mī-guók nè̤ng Steve Jobs, Steve Wozniak găk California sìng-lĭk Bìng-guō Gŭng-sĭ.

4 nguŏk 2 hô̤:

• 1513 nièng: Să̤-băng-ngà mŏk-hiēng-gă Juan Ponce de León găk Florida siông-giâng, ĭ sê tàu ciáh gáu cŭ-uái gì Ĕu-ciŭ-nè̤ng.
• 1792 nièng: Mī-guók Cô̤-bê-guŏh sìng-lĭk. Áng Mī-guók Cô̤-bê Huák-áng gì giĕ-dêng, 1 Mī-gĭng gì huăng-cièng-giāng diē-sié diŏh ô sùng gì ngṳ̀ng 24.1 káik.
• 1976 nièng: Norodom Sihanouk sṳ̀ kó̤ Kampuchea guók-gă nguòng-siū gì cék-ô, ké̤ṳk È̤ng-sáik Khmer guŏng diŏh chió lā̤.
• 1982 nièng: Falkland Ciéng-cĕng: Argentina páh Ĭng-guók gì hāi-ngôi liāng-tū Falkland Gùng-dō̤(dù).

4 nguŏk 3 hô̤:

• 1721 nièng: Robert Walpole(dù) ké̤ṳk Ĭng-guók guók-uòng George 1-sié êng-mêng có̤ siū-sióng, ĭ sê lĭk-sṳ̄ siông tàu ciáh Ĭng-guók siū-sióng.
• 1851 nièng: Sièng-lò̤ (Tái-guók) guók-uòng Nangklao guó-sié, ĭ gì diê Mongkut gié-ôi.
• 1865 nièng: Nàng-báe̤k Ciéng-cĕng: Mī-lé-giĕng Hăk-cé̤ṳng-guók gì buô-dôi ciéng-liāng Mī-lé-giĕng Lièng-mèng-guók gì siū-dŭ Richmond.
• 1922 nièng: Joseph Stalin dŏng-sōng Sŭ-lièng Gê̤ṳng-sāng-dōng gì cūng-cṳ̆-gé.

4 nguŏk 4 hô̤:

• 1949 nièng: Báe̤k Dâi-să̤-iòng Gŭng-iók Cū-cék (NATO) ciáng-sék sìng-lĭk.
• 1968 nièng: Mī-guók ŭ-cṳ̄ng-nè̤ng mìng-guòng ông-dông-gă Martin Luther King găk Tennessee gì Memphis ké̤ṳk nè̤ng áng-sák.
• 1973 nièng: Mī-guók Niū-iók gì Sié-gái Mâiu-ĭk Dṳ̆ng-sĭng(dù) ciáng-sék kăi-sṳ̄ sāi, hī sèng-âu sê sié-gái có̤i gèng gì làu.
• 1975 nièng: Mī-guók nè̤ng Bill Gates, Paul Allen găk New Mexico gì Albuquerque sìng-lĭk Mì-niōng Gŭng-sĭ.

4 nguŏk 5 hô̤:

• 1242 nièng: Novgorod gŭng-ciók Aleksandr Nevsky găk giék-bĭng gì Chudskoe Hù gà̤-dēng páh iàng Teuton Kiè-sê̤ṳ-tuàng.
• 1722 nièng: Hò̤-làng Să̤ Éng-dô Gŭng-sĭ gì mŏk-hiēng-gă Jacob Roggeveen huák-hiêng Bô-uăk-cáik-dō̤(dù).
• 1815 nièng: Éng-nà̤ gì Tambora Săng huōi-săng báuk-huák. Cuòi sê lĭk-sṳ̄ siông gé-liŏh gáu gì có̤i duâi gì huōi-săng báuk-huák, â siŏh nièng biéng-siàng mò̤ iĕk-tiĕng gì nièng.
• 1976 nièng: Dṳ̆ng-guók Báe̤k-gĭng Tiĕng-ăng-muòng ăi-dô̤ Ciŭ Ŏng-lài gì báh-sáng ké̤ṳk buô-dôi dṳ̆k kó̤ (Sé-ngô Tiĕng-ăng-muòng Sê̤ṳ-giông).

4 nguŏk 6 hô̤:

• 1652 nièng: Hò̤-làng mŏk-hiēng-gă Jan van Riebeeck găk Hō̤-uông-gáe̤k hô-gê̤ṳng gióng-lĭk Cape Town.
• 1782 nièng: Phra Buddha Yodfa Chulaloke (Rama 1-sié) kăi-sṳ̄ có̤ Sièng-lò̤ (Tái-guók) guók-uòng, gióng-lĭk Chakri Uòng-dièu.
• 1896 nièng: Tàu siŏh gái Hâ-gié Olympic Ông-dông-huôi găk Hĭ-lé-nà̤ Ngā-diēng gṳ̄-bâing.
• 1994 nièng: Rwanda cūng-tūng Juvénal Habyarimana(dù) gâe̤ng Burundi cūng-tūng Cyprien Ntaryamira cà̤ sô̤i gì hĭ-gĭ găk Kigali ké̤ṳk nè̤ng páh giâ lì, ciā dâi-gé īng-kīng Rwanda dù-sák.

4 nguŏk 7 hô̤:

• 529 nièng: Dĕ̤ng Lò̤-mā Dá̤-guók huòng-dá̤ Justinianus 1-sié mêng-lêng ciŏng Lò̤-mā-huák huôi-cūng, ciáng-sék huák-buó Mìng-huák Dâi-ciòng (Corpus Juris Civilis) gì tàu siŏh buô-hông.
• 1767 nièng: Miēng-diêng Konbaung Uòng-dièu gì buô-dôi páh diē Ayutthaya, Tái-guók lĭk-sṳ̄ siông gì Ayutthaya Uòng-guók miĕk-uòng.
• 1938 nièng: Dṳ̆ng-guók găk Dài-ì-cŏng páh iàng Nĭk-buōng buô-dôi(dù).
• 1945 nièng: Nĭk-buōng hāi-gŭng có̤i duâi gì ciéng-kāng Yamato ké̤ṳk Mī-guók páh tèng--kó̤.

4 nguŏk 8 hô̤:

• 217 nièng: Lò̤-mā Dá̤-guók huòng-dá̤ Caracalla ké̤ṳk nè̤ng áng-sák.
• 1232 nièng: Mùng-gū Dá̤-guók kăi-sṳ̄ bău-ùi Gĭng-guók gì siū-dŭ Biêng-gĭng (gĭng-dáng gì Kăi-hŭng).
• 1820 nièng: Milo gì Venus(dù) găk Aegea Hāi gì Milos Dō̤ ké̤ṳk nè̤ng huák-hiêng.
• 1911 nièng: Hò̤-làng kuŏ-hŏk-gă Heike Kamerlingh Onnes kĕk ĭk-tā̤ gì hâi (He) lì gáung-dā̤ cūi-ngṳ̀ng ŭng-dô gì sèng-âu huák-hiêng chiĕu-dô̤ hiêng-chiông.

4 nguŏk 9 hô̤:

• 1241 nièng: Mùng-gū Dá̤-guók găk Liegnitz páh iàng Pŏ̤-làng buô-dôi(dù).
• 1288 nièng: Dâi-uŏk (Uŏk-nàng) găk Bạch Đằng páh iàng Nguòng-dièu buô-dôi.
• 1783 nièng: Ĭng-guók guók-uòng George 3-sié piĕ-cūng Bă-là̤ Dèu-iók, Mī-guók Dŭk-lĭk Ciéng-cĕng giék-sók.
• 1865 nièng: Mī-lé-giĕng Lièng-mèng-guók gì ciŏng-gŭng Robert E. Lee hióng Hăk-cé̤ṳng-guók dàu-hòng, Nàng-báe̤k Ciéng-cĕng giék-sók.

4 nguŏk 10 hô̤:

• 1858 nièng: Ĭng-guók Lùng-dŭng Westminster Siŭ-dô̤-iêng gì Big Ben(dù) gì cṳ̆ng-méng có̤ hō̤.
• 1864 nièng: Maximiliano 1-sié kăi-sṳ̄ có̤ Mĕ̤k-să̤-gŏ̤ huòng-dá̤.
• 1919 nièng: Mĕ̤k-să̤-gŏ̤ Gáik-mêng gì liāng-dô̤-ìng Emiliano Zapata găk Morelos gì Ciudad Ayala hô-gê̤ṳng ké̤ṳk nè̤ng áng-sák.
• 2010 nièng: Pŏ̤-làng cūng-tūng Lech Kaczyński sô̤i gì Tu-154 hĭ-gĭ găk Ngò̤-lò̤-sṳ̆ Smolensk sék-sê̤ṳ.

4 nguŏk 11 hô̤:

• 1241 nièng: Batu Khan gì Kipchak Khan Guók buô-dôi găk Mohi páh iàng Béla 4-sié gì Hṳ̆ng-ngà-lé buô-dôi.
• 1713 nièng: Să̤-băng-ngà, Ĭng-guók, Huák-guók, Buò-dò̤-ngà, Savoy Gŭng-guók gâe̤ng Hò̤-làng găk Utrecht chiĕng-dêng Utrecht Dèu-iók, Să̤-băng-ngà Uòng-ôi Gié-sìng Ciéng-cĕng giék-sók.
• 1921 nièng: Abdullah 1-sié(dù) gióng-lĭk Transjordan Emir Guók.
• 2001 nièng: Diŏh FIFA Sié-gái-buŏi gì ê̤ṳ-sōng-suói diē-sié, Ó̤-ciŭ ī 31:0 gì hŭng-só ték iàng Mī-guók liāng Samoa kă-giù-dôi.

4 nguŏk 12 hô̤:

• 240 nièng: Shapur 1-sié dĕng-gĭ có̤ Sasan Dá̤-guók gì huòng-dá̤.
• 1606 nièng: Ĭng-guók kăi-sṳ̄ kĕk "Lièng-hăk Jack"(dù) có̤ guók-uòng gì biĕu-cé, gáu-muōi huák-diēng siàng gĭng-dáng gì Ĭng-guók guók-gì.
• 1927 nièng: Ciōng Gái-sĭk mêng-lêng găk Siông-hāi duâi niăh Dṳ̆ng-guók Gê̤ṳng-sāng-dōng dōng-uòng (Sé-ék-nê Sê̤ṳ-giông).
• 1961 nièng: Sŭ-lièng tái-kŭng-ìng Yuri Gagarin sô̤i Vostok 1 kó̤ tái-kŭng lā̤, ĭ sê sié-gái siông tàu ciáh diē tái-kŭng gì nè̤ng.

4 nguŏk 13 hô̤:

• 1204 nièng: Dâ̤ 4 huòi Sĕk-cê-gŭng ciéng-liāng Constantinopolis (gĭng-dáng Istanbul, dù), Dĕ̤ng Lò̤-mā Dá̤-guók câng-sì miĕk-uòng.
• 1909 nièng: Osman Dá̤-guók huák-sĕng céng-biéng, sultan Abdul Hamid 2-sié ké̤ṳk dṳ̆k lŏ̤h-dài.
• 1943 nièng: Nazi Dáik-guók sŏng-buó găk Ngò̤-lò̤-sṳ̆ Smolensk Ciŭ gì Katyń Sĕng-lìng huák-hiêng iā sâ̤ Pŏ̤-làng-nè̤ng gì sĭ-tā̤, ĭ-gáuk-nè̤ng kō̤-nèng dŭ sê ké̤ṳk Sŭ-lièng tài sī gì.
• 1988 nièng: Dṳ̆ng-guók dâ̤ 7 gái Ciòng-guók Ìng Dâi dâ̤ 1 ché̤ṳ Huôi-ngiê dùng-é găk Hāi-nàng-dō̤ sĭng-siék Hāi-nàng-sēng.

4 nguŏk 14 hô̤:

• 1619 nièng: Nū-ī-hăk-cà̤ gì Hâiu-gĭng găk Sarhū páh iàng Mìng-dièu buô-dôi.
• 1865 nièng: Mī-guók cūng-tūng Abraham Lincoln ké̤ṳk nè̤ng áng-sák, dâ̤ nê gĕ̤ng sĕng--kó̤.
• 1912 nièng: Titanic găk Dâi-să̤-iòng pâung diŏh bĭng-săng tèng--kó̤(dù).
• 1931 nièng: Să̤-băng-ngà Guók-huôi hié lâi guók-uòng Alfonso 13-sié, ciŏng Să̤-băng-ngà gāi siàng siŏh ciáh gê̤ṳng-huò-guók.

4 nguŏk 15 hô̤:

• 1638 nièng: Nĭk-buōng Edo Mŭk-hū déng-ák tiĕng-ciō-gáu-dù huák-dông gì Shimabara cĭ luâng.
• 1927 nièng: Bô̤-ū īng-kī Mī-guók Mississippi Ò̤ gì ò̤-gièng huák-kă̤-cūi, iā sâ̤ dê-huŏng tì-bá báuk--kó̤, sê Mī-guók lĭk-sṳ̄ siông có̤i ngièng-dáe̤ng gì cūi-căi.
• 1955 nièng: Mī-guók nè̤ng Ray Kroc găk Illinois gì Des Plaines sìng-lĭk McDonald's.
• 2019 nièng: Huák-guók gì Bă-là̤ Séng-mū-iêng huák-sĕng huōi-căi(dù), táh-dīng ké̤ṳk huōi siĕu ták--kó̤.

4 nguŏk 16 hô̤:

• 73 nièng: Lò̤-mā Dá̤-guók páh giâ Iù-tái-nè̤ng gì siàng-bō̤ Masada, Iù-tái Ciéng-cĕng giék-sók.
• 1847 nièng: Siŏh ciáh giàng-sùng gì Ĭng-guók nè̤ng kĕk chiŏng kó̤ páh Sĭng-să̤-làng gì Māori nè̤ng, īng-kī Whanganui Ciéng-ciĕng.
• 1917 nièng: Ngò̤-lò̤-sṳ̆ Gáik-mêng: Vladimir Lenin(dù) téng Sôi-sê̤ṳ diōng gáu Ngò̤-lò̤-sṳ̆ Petrograd (gĭng-dáng Sankt-Peterburg).
• 1947 nièng: Mī-guók cūng-tūng gó-ông Bernard Baruch tàu huòi ciŏng Mī-guók gâe̤ng Sŭ-lièng gì gīng-diŏng guăng-hiê hô̤ lā̤ "Lēng-ciéng".

4 nguŏk 17 hô̤:

• 1895 nièng: Muāng-chĭng gâe̤ng Nĭk-buōng chiĕng-dêng Mā-guăng Dèu-iók(dù), Gák-ngū Ciéng-cĕng giék-sók.
• 1941 nièng: Dâ̤-nê-ché̤ṳ Sié-gái Dâi-ciéng: Nàng Sṳ̆-lá-hŭ Uòng-guók hióng Nazi Dáik-guók dàu-hòng.
• 1961 nièng: Mī-guók Dṳ̆ng-iŏng Cìng-bó̤-guŏh (CIA) dó̤i-chiū Cuba Mìng-ciō Gáik-mêng Dêng-siáng gì ciĕ-tì-ciā găk Cochinos-uăng dĕng-lṳ̆k, gié-hĕk tŭi-huăng Fidel Castro gì Cuba gê̤ṳng-sāng-ciō-ngiê céng-guòng, dáng-sê sék-bâi.
• 1975 nièng: È̤ng-sáik Khmer ciéng-liāng Phnom Penh, Kampuchea Nô̤i-ciéng giék-sók.

4 nguŏk 18 hô̤:

• 1025 nièng: Bolesław 1-sié(dù) găk Gniezno ciáng-sék dĕng-gĭ có̤ tàu ciáh Pŏ̤-làng guók-uòng.
• 1906 nièng: Mī-guók San Francisco huák-sĕng dê-cīng, sĕng--kó̤ 3000 nè̤ng.
• 1943 nièng: Nĭk-buōng hāi-gŭng sṳ̆-lêng Yamamoto Isoroku sô̤i gì hĭ-gĭ găk Bougainville ké̤ṳk Mī-guók nè̤ng páh giâ lì.
• 1955 nièng: 29 ciáh Ā-ciŭ gâe̤ng Hĭ-ciŭ guók-gă gì dâi-biēu găk Éng-nà̤ Bandung kŭi-huôi (Bandung Huôi-ngiê).

4 nguŏk 19 hô̤:

• 1775 nièng: Sĕk-săng Sĭk-mìng-dê gì mìng-bĭng găk Massachusetts gì Lexington gâe̤ng Ĭng-guók buô-dôi dó̤i-páh(dù), Mī-guók Dŭk-lĭk Ciéng-cĕng kăi-sṳ̄.
• 1839 nièng: Bī-lé-sì gâe̤ng Ó̤-dê-lé, Huák-guók, Dáik-guók, Hò̤-làng, Ngò̤-lò̤-sṳ̆, Ĭng-guók chiĕng-dêng Lùng-dŭng Dèu-iók, Bī-lé-sì gì dŭk-lĭk ciáng-sék sêu gáu sìng-nêng.
• 1960 nièng: Hàng-guók huák-sĕng huāng-dó̤i cūng-tūng Lī Sìng-uāng gì gáik-mêng.
• 1971 nièng: Sierra Leone téng Ĭng-guók dŭk-lĭk.

4 nguŏk 20 hô̤:

• 1653 nièng: Oliver Cromwell(dù) giòng-cié gāi-sáng Ĭng-guók gì Gū-chiŏng Ngiê-huôi (Rump Parliament).
• 1862 nièng: Huák-guók huá-hŏk-gă Louis Pasteur, sĕng-lī-hŏk-gă Claude Bernard uòng-sìng dă̤-ŭng sák-kṳ̄ng-huák gì cháik-ngiêng.
• 1946 nièng: Guók-cié Lièng-mèng ciáng-sék gāi-sáng.
• 1948 nièng: Dṳ̆ng-huà Mìng-guók cūng-tūng sōng-gṳ̄, Ciōng Gái-sĭk dŏng-sōng cūng-tūng, Lī Cŭng-ìng dŏng-sōng hó-cūng-tūng.

4 nguŏk 21 hô̤:

• Sèng 753 nièng: Gŏng-gé̤ṳ Gū Lò̤-mā hŏk-ciā Varro Reatinus gì gōng-huák, Romulus gâe̤ng Remus găk cī siŏh gĕ̤ng gióng-lĭk Lò̤-mā.
• 1836 nièng: Sam Houston dái-liāng gì Texas Gê̤ṳng-huò-guók buô-dôi găk San Jacinto páh iàng Mĕ̤k-să̤-gŏ̤ cūng-tūng Antonio López de Santa Anna gì buô-dôi, ciŏng López de Santa Anna niăh diŏh(dù).
• 1918 nièng: Dâ̤-ék-ché̤ṳ Sié-gái Dâi-ciéng: Dáik-guók có̤i bá gì hĭ-hèng-uòng Manfred von Richthofen găk Somme Ò̤ hô-gê̤ṳng ké̤ṳk Ĭng-guók kŭng-gŭng tài sī.
• 1960 nièng: Bă-să̤ ciŏng siū-dŭ téng Rio de Janeiro buăng gáu iù Lúcio Costa siék-gié gì siàng-chê Brasília.

4 nguŏk 22 hô̤:

• 1500 nièng: Buò-dò̤-ngà mŏk-hiēng-gă Pedro Álvares Cabral gáu Bă-să̤, sŏng-buó cŭ-uái sṳ̆k Buò-dò̤-ngà guāng.
• 1519 nièng: Să̤-băng-ngà nè̤ng Hernán Cortés(dù) găk Mĕ̤k-să̤-gŏ̤ gióng-lĭk siàng-chê Veracruz.
• 1906 nièng: Hĭ-lé-nà̤ Ngā-diēng gṳ̄-bâing Olympic Ông-dông-huôi. Cī huòi Olympic Ông-dông-huôi mò̤ sêu Olympic Ūi-uòng-huôi sìng-nêng.
• 1917 nièng: Dâ̤-ék-ché̤ṳ Sié-gái Dâi-ciéng: Dáik-guók găk Ypres kĕk Lṳ̆k-ké kó̤ gŭng-gék Hiĕk-iók-guók gì buô-dôi, tài sī gūi chiĕng bĭng-giāng. Cuòi sê tàu huòi duâi-liông sāi huá-hŏk ū-ké.

4 nguŏk 23 hô̤:

• 1348 nièng: Ĭng-gáik-làng guók-uòng Edward 3-sié sŏng-buó siék Garter Hṳ̆ng-ciŏng.
• 1895 nièng: Ĭng-ôi sêu gáu Ngò̤-lò̤-sṳ̆, Dáik-guók gâe̤ng Huák-guók gì ák-lĭk, Nĭk-buōng ciŏng Lièu-dĕ̤ng Buáng-dō̤ dèng ké̤ṳk Muāng-chĭng.
• 1920 nièng: Tū-ī-gì Duâi Guók-mìng Ngiê-huôi găk Ankara kŭi-huôi, sōng-gṳ̄ Mustafa Kemal Atatürk có̤ Tū-ī-gì cūng-tūng.
• 1949 nièng: Dṳ̆ng-guók Ìng-mìng Gāi-huóng-gŭng ciéng-liāng Dṳ̆ng-huà Mìng-guók gì siū-dŭ Nàng-gĭng(dù).

4 nguŏk 24 hô̤:

• Sèng 1479 nièng: Thutmose 3-sié dĕng-gĭ có̤ Ăi-gĭk pharaoh, ĭ gū-gū Hatshepsut niék-céng.
• 1800 nièng: Mī-guók găk Washington, D.C. siék-lĭk Guók-huôi Dù-cṳ̆-guāng(dù).
• 1970 nièng: Dṳ̆ng-guók tàu lăk ìng-cô̤ ôi-sĭng Dĕ̤ng-huŏng-è̤ng 1 hô̤ huák-siâ sĭng-tiĕng.
• 1970 nièng: Gambia téng Ĭng-guók dŭk-lĭk.

4 nguŏk 25 hô̤:

• 1644 nièng: Lī Cê̤ṳ-sìng gì buô-dôi páh gáu Báe̤k-gĭng siàng, Sùng-dĭng Huòng-dá̤ diéu-sī cê-gă, Mìng-dièu miĕk-uòng.
• 1792 nièng: Huák-guók cáuk-ké̤ṳk-gă Claude Joseph Rouget de Lisle siā siŏh dà̤ hô̤ lā̤ La Marseillaise gì kuóh, ciā kuóh ī-hâiu ké̤ṳk diâng có̤ Huák-guók guók-gŏ̤.
• 1882 nièng: Henri Rivière dái-liāng Huák-guók buô-dôi ciéng-liāng Uŏk-nàng gì Hà Nội, cūng-dók Hoàng Diệu cê̤ṳ-sák.
• 1953 nièng: Mī-guók sĕng-ŭk-hŏk-gă James Watson, Francis Crick tàu huòi tì-chók DNA sĕ̤ng-lòi-siòng giék-gáiu(dù).

4 nguŏk 26 hô̤:

• 1478 nièng: Pazzi gă-cŭk găk Firenze Ciō-gáu cô̤-dòng áng-sák Lorenzo de' Medici mò̤ sìng-gŭng, dáng-sê tài sī ĭ gì diê Giuliano(dù).
• 1933 nièng: Hermann Göring gióng-lĭk Nazi Dáik-guók gì bé-mĭk gīng-chák cū-cék Gestapo.
• 1964 nièng: Tanganyika gâe̤ng Zanzibar hăk siàng siŏh ciáh hô̤ lā̤ Tanzania gì guók-gă.
• 1986 nièng: Sŭ-lièng gì Ukraine huák-sĕng Chernobyl sê̤ṳ-gó, huóng-siâ-séng gì ŭk-cék ŭ-niēng gáu gò̤-lòng ciáh Ĕu-ciŭ.

4 nguŏk 27 hô̤:

• 1521 nièng: Buò-dò̤-ngà mŏk-hiēng-gă Fernão de Magalhães găk Hĭ-lĭ-pĭng gì Mactan ké̤ṳk nguòng-cê̤ṳ-mìng tài sī(dù).
• 1565 nièng: Să̤-băng-ngà sĭk-mìng-ciā Miguel López de Legazpi gióng-lĭk Hĭ-lĭ-pĭng gì tàu ciáh siàng-chê Cebu.
• 1906 nièng: Ngò̤-lò̤-sṳ̆ Dá̤-guók gì Guók-gă Duma tàu huòi kŭi-huôi.
• 1992 nièng: Nàng Sṳ̆-lá-hŭ Siâ-huôi-ciō-ngiê Lièng-băng Gê̤ṳng-huò-guók ciáng-sék gāi-tā̤, cĭ-hâiu iù Serbia gâe̤ng Montenegro lièng-hăk gióng-lĭk Nàng Sṳ̆-lá-hŭ Lièng-mèng Gê̤ṳng-huò-guók.

4 nguŏk 28 hô̤:

• 1788 nièng: Maryland gă diē Mī-guók.
• 1927 nièng: Dṳ̆ng-guók Gê̤ṳng-sāng-dōng cháung-sṳ̄-ìng cĭ ék Lī Dâi-chiĕu(dù) ké̤ṳk Báe̤k-iòng Céng-hū diéu-sī.
• 1945 nièng: É-dâi-lé siū-sióng Benito Mussolini găk Mezzegra ké̤ṳk É-dâi-lé Gê̤ṳng-sāng-dōng tài sī.
• 1952 nièng: San Francisco Hò-bìng Dèu-iók ciáng-sék sĕng-háiu. Gŏng-gé̤ṳ ciā dèu-iók, Nĭk-buōng sìng-nêng Dièu-siēng dŭk-lĭk, huóng-ké dó̤i Dài-uăng, Kuril, Sakhalin dēng-dēng dê-huŏng gì ciō-guòng iĕu-giù.

4 nguŏk 29 hô̤:

• 1624 nièng: Huák-guók guók-uòng Louis 13-sié êng-mêng Armand Jean du Plessis de Richelieu(dù) có̤ siū-sĭk dâi-sìng.
• 1770 nièng: James Cook gì sùng găk Sydney hô-gê̤ṳng dĕng-lṳ̆k, ĭ sê tàu ciáh gáu Ó̤-ciŭ dĕ̤ng-buô hāi-gièng gì Ĕu-ciŭ-nè̤ng.
• 1882 nièng: Dáik-guók huák-mìng-gă Werner von Siemens găk Báik-lìng diēng-sê ĭ huák-mìng gì ù-gūi diêng-chiă.
• 1911 nièng: Chĭng-huà Dâi-hŏk sìng-lĭk.

4 nguŏk 30 hô̤:

• 1789 nièng: George Washington(dù) găk Niū-iók ciáng-sék cêu-êng Mī-guók tàu siŏh ciáh cūng-tūng.
• 1897 nièng: Ĭng-guók ŭk-lī-hŏk-gă Joseph John Thomson sŏng-buó huák-hiêng diêng-cṳ̄.
• 1945 nièng: Nazi Dáik-guók nguòng-siū Adolf Hitler găk Báik-lìng cê̤ṳ-sák.
• 1975 nièng: Uŏk-nàng Ciéng-cĕng: Uŏk-nàng Gê̤ṳng-sāng-dōng gì buô-dôi ciéng-liāng Uŏk-nàng Gê̤ṳng-huò-guók (Nàng-uŏk) gì siū-dŭ Sài Gòn (gĭng-dáng Hồ Chí Minh Chê), có̤i hâiu siŏh ciáh cūng-tūng Dương Văn Minh dàu-hòng.