Rúa de Juan Flórez (A Coruña)

Rúa de Juan Flórez
	Inicio da rúa de Juan Flórez
Tipoloxía	rúa
Dimensións
Lonxitude	0,95 km
Formato	dous carrís en cada sentido mais beiravía e beirarrúa
Localización
Inicio	Praza de Pontevedra
Fin	Avenida de Alfonso Molina
Localidade	A Coruña
Circulación
Tránsito	Peonil e rodado
	Confluencias principais Rúa de Ferrol ; Avenida de Arteixo ; Costa da Unión ; Rúa de Nicaragua ; Rúa de Federico Tapia ;

8°24′30″O / 43.365669575343, -8.4083546664655

A rúa de Juan Flórez é unha rúa da Coruña. Serviu de tradicional saída da cidade, bordeando o Primeiro Ensanche.

Está situada entre a praza de Pontevedra e a avenida de Alfonso Molina.

Historia

A rúa era coñecida como Estrada de Castela e Camiño Novo e xa nos planos do século XVIII aparecía o seu trazado. O nome actual recibiuno en 1900 como homenaxe a Juan Flórez, alcalde da cidade a mediados do século XIX.

Ata a década de 1930 conservou árbores na marxe esquerda, que viñan da época de Carlos III.^[1]

Institucións e comercios

Na rúa estivo situado ata 1968 o Leirón do Sporting Club Casino, onde se organizaban verbenas,^[2]^[3] e, entre 1920 e 1969, o Salón Doré.^[4] Tamén estivo a fábrica da importante industria téxtil La Primera Coruñesa, que tiña unha alta cheminea.^[5]^[6]

Paralelo á praza do Libro estaba o Colexio Dequidt, institución laica de ensino, que desapareceu na década de 1960^[1] e dende 1915 atópanse na rúa as Escolas Labaca.^[7]

Arquitectura

Dos chalés que houbo na rúa de Juan Flórez só perdura o Chalé Escudero. Porén, consérvanse algúns edificios destacados, algúns deles catalogados:^[8]

Edificio de esquina na rúa de Francisco Mariño, nº 1, de Eduardo Rodríguez-Losada Rebellón (1926)
Nº 37, 79-87, 91 e 95 (1923-1951)
Nº 47, de Carlos Meijide (1970-1973), edificio de formigón emparentado co veciño Edificio Pou, de Miguel Fisac, construído sobre os chalés de Fariña.^[1]^[9]
Nº 59-69 (1943-1951)
Nº 2-12 (1915-1987)
Nº 28, de Ramón Vázquez Molezún e Gerardo Salvador Molezún (1966)
Nº 36. Torre Dorada, de Milagros Rey Hombre
Nº 58. Edificio Trébol, de Carlos Meijide (1971-1975), rañaceos que foi construído sobre o Chalé Molezún.^[1]
Nº 64-66. Edificio Vázquez, de Antonio Vicéns Moltó (1946), con influencias do expresionismo arquitectónico dos anos 30.^[10]
Nº 72-78, 132-134 e 148 (1927-1972)
Torre Galicia, de Manuel Gallego Jorreto (1968-1971)^[11]
Nº 116. Escolas Labaca, de Leoncio Bescansa (1912-1915), con estilo entre o modernismo e o neogótico.^[7]