Us der alemannische Wikipedia, der freie Dialäkt-Enzyklopedy
In dr Füsik bezäichnet dr Begriff Kwant (vo latiin. quantum ‚wie grooss‘, ‚wie vil‘) en Objekt, wo dur e Zuestandswäggsel im ene Süsteem mit diskrete Wärt von ere füsikalische Gröössi, mäistens Energii, erzügt wird.
Kwante chönne immer nume in bestimmte Porzione vo dere füsikalische Gröössi ufdräte, si sin also d Kwantlig vo deene Gröössene.
S Foton as Kwant vom elektromagnetische Fäld. Fotone chönne zwar underschidligi diskreti Energiiniwoo haa, aber nume as Ganzes erzügt oder vernichdet wärde.
S Fonon as Kwant vo mechanische Verzerrigswälle im Festkörper.
S Plasmon as Kwant von ere Aaregig im Festkörper, wo d Laadigsdrääger bin ere gegenenander schwinge.
S Magnon as Kwant vo magnetische Aaregige.
S Kwant vom Dräiimpuls, wo nit as Däili interpretiert wird.
Vilmol wird mit em füsikalische Begriff Kwant e Däilicharakter von ere füsikalische Gröössi assoziiert. Das isch aber nume äi Däil vo dr äigetlige Bedütig vom Begriff. E Bischbil für e Kwant, wo nid dr Charakter vom ene Däili het, isch s Dräiimpulskwant.
As füsikalische Terminus wird Kwant nit brucht, zum die atomari Struktur vo dr Materie z bezäichne, au wenn s doo au e chliinsti Mängiäihäit (Quantelig) git.
