La culapa[2] (Cinclus cinclus) ye una especie d'avepaseriforme de la familia Cinclidae. El so hábitat inclúi redolaes acuátiques n'América, Europa, y Asia.[3]. Tien, amás de culapa, los nomes de llavaculos, llavandera, páxara aguadera, páxara d'agua y tordu d'agua[4]
Davezu viven nes veres de ríos rápidos de monte, anque pueden atopase individuos erráticos en llagunes de monte. La so preferencia poles agües non contaminaes conviértelu nun bioindicador de la pureza d'un ríu. El so plumaxe ye pardo escuro con pechu blancu. Párpagu blancu bien visible cuando ceguña. Tamañu: unos 18 cm d'altor y 30 de valumbu. Nun hai diferenciación sexual.
Somorguiar nun permediu de 3 segundos. La so sangre puede portar más osíxenu que la d'otros passeriformes, lo que-yos dexa permanecer so l'agua hasta 30 segundos, anque por norma xeneral nun entepasa de los 10 ó 20 segundos. Les sos adautaciones déxa-y somorguiase y caminar pol fondu del ríu p'alimentase d'inseutos, ayudar con un pequeñu aletéu si la corriente ye fuerte. Atopa los inseutos voltiando los quixarros del llechu del ríu.
Añera cerca de l'agua, nunca a grandes altores, n'árboles, pontes y resquiebros. El periodu de cría tien llugar de febreru a xunetu con puestes que varien ente los 4 y los 6 güevos,[5] blancos y de unos 26x18 milímetros, que son guaraos namái pola fema. Los pollos eclosionen a los quince díes de la puesta, y son cebaos por dambos adultos mientres aproximao un mes, hasta qu'abandonen el nial. Ye habitual que la mesma pareya realice dos puestes na mesma primavera,[5] anque la segunda con namái 3 o 4 güevos.
