Moldova atau sacaro rasmi Republik Moldova adolah sabuah nagara nan takuruang daratan di Eropa Timur.[1] Babatehan jo Rumania di sabalah barat, sarato Ukraina di sabalah utara, timur jo selatan.[2] Nagara bagian Transnistria nan indak diakui talatak di sabarang sungai Dniester di bateh timur nagara tu jo Ukraina. Ibu kota jo kota tagadangnyo adolah Chișinău.
Moldova talatak diantaro garih lintang 45° jo 49° LU, jo sabagian gadang di antaro maridian 26° jo 30° BT (sarato area ketek talatak di sabalah timur 30°). Total lawehnyo adolah 33.851 km2 (13.070 sq mi). Kadakekan nagara ko jo Lauik Hitam mambuek iklimnyo sajuak jo cerah. Iklimnyo cukuik kontinental: musim panehnyo angek jo panjang, jo suhu rato-rato sakitar 20 °C (68 °F), sarato musim dingin nan relatif ringan jo kariang, jo suhu rato-rato Januari −4 °C (25 °F). Suhu tatinggi nan pernah tacatat adolah 42,4 °C (108,3 °F) di Fălești pado 7 Agustus 2012. Sadangkan suhu tarandah −35.5 °C (−31.9 °F) pado 20 Januari 1963 di Brătuşeni.[3]
Pamarentahan Moldova barado dalam karangko republik demokrasi perwakilan parlementer kasatuan, dimano Pardana Mantari adolah kapalo pamarentahan jo sistem multipartai. Presiden sabagai kapalo nagara indak punyo kuaso nan pantiang. Legislatif dijalankan dek Parlemen. Para sarjana mancirikan Moldova sabagai nagara demokrasi nan indak stabil jo korupsi sistemik sarato papacahan nan dalam takaik identitas nasional.[4]The Economist Intelligence manilai Moldova sabagai "demokrasi nan cacaik" pado tahun 2022.[5]
Pado tahun 2023, panduduak nagara ko dipakirokan bajumlah 2.512.758,[6] manurun dari hasia sensus tahun 2014 nan bajumlah 2.804.801 dilua panduduak Transnistria.[7] Walaupun dalam sijarah, polarisasi badasarkan kriteria etnolinguistik kalompok etnis mayoritas muncua baliak jo gerakan kabangkitan nasional pado akhia 1990-an, jo sajauah ko indak ado konsensus manganai identitas utamo nagara, urang Moldova atau Rumania.[8][9]
