Formacion de l'Empèri Timurida e extension en 1405.
Tamburlan o Barlan (nommat ansin en occitan; en persan:تیمور Timūr ; "fèrre" o تيمور لنگ, Timūr-e Lang, "Timur la Lama"; en chagatai: Temür; en turc: Demir; conegut dins d'autras lengas coma Timur, Tamerlane, Tamerlan; 8 d'abril de 1336 – 18 de febrièr de 1405), foguèt un emperaire mongòl e conquistaire de l'oèst, del sud e del centre d'Asia, e lo fondador de la dinastia tamburlanida (1370–1405) en Asia Centrala, e rèiregrand de Babur, lo fondador de la dinastia Mogòl, que subrevisquèt amb l'Empèri Mogòl en Índia entrò en 1857.[1][2][3][4][5]
Tamburlan èra a son epòca un personatge contravertit, e o demòra encara uèi. Ensagèt de restaurar l'Empèri Mongòl,[6][7] pasmens son accion pus pesuga foguèt contra l'Òrda d'Aur tatara e islamizada. Èra mai sovent en çò sieu dins un environament urban que non pas per l'estèpa. Sas guèrras e sas ràzias afectèron grèvament mantun estat musulman, en particular lo Soudanat de Delhi. Grand amator d'arts, sas campanhas causèron tanben de vastas destruccions.
