Atomradius

De Atomradius is in de Atomphysik en towiest Maat, wat to’n Vörutseggen vun de Binnenproportschonen deent. Dat sünd Radien, de op verscheeden Oorden bestimmt warrt. Man, de afsluut Radius btw. en aflsuut Grööt vun en Atom kann gor nich fastleggt warrn, wiel dat Atom na de bülgenmechaanschen Vörstellen vun de Quantenmechanik gor keen defineerte Grenz opwiesen deit.

Dorüm warrt de Atomradien na de verscheeden cheemsch Binnen un Binnentypen opdeelt. Dorut warrt en effektiv Grött vun Atomen bestimmt, de dat verlööft, den Afstand vun de Atomkarns in en sünnere cheemsch Verbinnen uttoreken:

• In Systemen, de vör allen ionisch opboot sünd, warrt de Atomen so nöömte Ionenradien towiest.
• För Atomen de över kovalent Binnen in Molekülen bunnen sünd, warrt Kovalenzradien angeven.
• Metallen warrt Metallradien toordent.
• Twüschen de Molekülen mit kovalente Binnen wirkt butendem Van-der-Wals-Kräft, woto dat entsprekend ok Van-der-Wals-Radien gifft.

Atomradien leegt in de Gröttenorden üm un bi 10^-10m (Kovalenzradius in’t Waterstoffmolekül ~37 pm, Metallradius vun 12-fach koordineerend Cäsium ~272 pm).

In en Grupp in’t Periodensystem nehmt de Atomradien vun baven na ünnen to, in en Periood nehmt se vun links na rechts af.