Golden Globe

De Golden Globe Awards sünd en Koppel vun Filmpriesen, de jed’ Johr för Kinofilmen un Feernsehserien vergeven warrt.

De Golden Globe-Verlehen gifft dat siet 1944. Se warrt vun de Hollywood Foreign Press Association utricht un organiseert. Över de Vergaav warrt vun ungefähr 100 internatschonale Journalisten bestimmt, de in Hollywood arbeiden doot. In de eersten Johren weer blots Kinoprodukschonen uttekent, man mit de Johren hebbt sik de Verantwoortlichen dacht, dat dat Feernsehn jümmer mehr an Bedüden winnt un bi de Kiekers düchtig populär warrn de. 1956 hett man dorophen beslaten, ok Feernsehfilmen uttoteken. De Golden Globe gellt in de amerikanschen Filmindustrie as de jeweils tweetbedüdenste Filmpries in de beiden Twiegen, glieks na den Oscar för den Kinosekter un den Emmy in’t Rebeet Feernsehn.

De Verlehen warrt in’n Rahmen vun en Galadinner dörföhrt, wo jeder inladt warrt, de in Hollywood beropen is un en groten Namen hett. De Afstimmen för de Oscars fangt faken blots en poor Daag later an. De Bedeligten hapt dorüm fakenmols, dat jem en goot Afsnieden bi de Golden Globe-Verlehen ok bi de Vergaav vun de Oscars to Spood verhelpen deit.