Ralph Marvin Steinman
Ralph Marvin Steinman (* 14. Januar 1943 in Montreal; † 30. September 2011 in New York City)[1][2] weer en kanaadsch Immunoloog un Perfesser an de Rockefeller University in New York City. 2011 wurr Steinman gemeensam mit Bruce Alan Beutler un Jules Alphonse Hoffmann de Nobelpries för Physiologie oder Medizin tospraaken.
Leven
Steinman hett 1963 sien Bachelor-Afsluss an de McGill University in Montreal makt un 1968 sien Medizinstudium an de Harvard University in Cambridge, Massachusetts mit den M.D. afslooten. Dornah weer he as Dokter an dat Massachusetts General Hospital in Boston, Massachusetts tätig, bevör he en Professur (Assistant Professor 1970, Associate Professor 1976) in de Leukämie-Forschen an de Rockefeller University in New York City kreeg. Af 1988 weer he dor ordentlich Perfessoe för Zellphysiologie un Immunologie. Siet 1998 weer he dorto noch Bass vun dat Christopher Browne Center for Immunology and Immune Diseases.
2011 wurr Steinman gemeensam mit Bruce Alan Beutler un Jules Alphonse Hoffmann de Nobelpries för Physiologie oder Medizin tospraken. Würdigt wurr sien Opdecken vun de dendritisch Zellen un hör Rull in de adaptiv Immunität.[3] Steinman is dree Daag vör Bakanntgaav vun de Priesverlehen an en veer Johr tovör faststellt Krebserkrankung storven.[1] He kreeg den Pries posthum.[4] Dat is insofern wat besünners ween, dat dat nich begäng is, de Pries Dooden totospreeken. Dat hett man afschafft, nahdem Dag Hammarskjöld den Pries kregen harr. Allerdings wuss in dissen Fall dat Nobelprieskommitee nix vun den Dood vun Steinman.
Ralph Steinman weer verheiraadt un harr twee Döchter un en Söhn.[5]
Wark
Steinman hett 1973 gemeensam mit Zanvil A. Cohn de dendritische Zelle opdeckt un hett de in de Folgetiet ok beschreven, upgrund vun hör Fähigkeit to de Antigenpräsentatschoon as zentraal un faken utlösen Element vun de Immunantwoort, sünners dör dat Aktiveeren vun T-Zellen. Aber ok bi Immuntoleranz un Resistenz gegen Krankheiten speelt dendritische Zellen en wichtig Rull. In tallriek Arbeiten hett Steinman dat System vun de dendritischen Zellen utklamüüstert, hör Rull in de Immunreaktschoon un bi verscheeden Krankheiten, dorünner dat Afstööten vun Transplantaten, Autoimmunkrankheiten un Infektschonskrankheiten insluutend AIDS. Sien Arbeiten sünd de Grundlaag vun wiedergahn Forschen to Impen un Autoimmunerkrankungen, as ok de Krebsimmuntherapie.
Steinman weer Herutgever vun dat Journal of Experimental Medicine. Bi tallriek wiedere Facktietschriften (dorünner Proceedings of the National Academy of Sciences) un wetenschaplich Sellschoppen harr he Funktschonen in den wetenschaplich Biraad inne.
Utteknungen (Utwahl)
- 1996: Emil-von-Behring-Pries[6]
- 1998: Max-Planck-Forschenspriess[7]
- 1998: William B. Coley Award[8]
- 1999: Robert-Koch-Preis[9]
- 2001: Liddmaat National Academy of Sciences
- 2003: Gairdner Foundation International Award[10]
- 2005: Liddmaat Royal Society of Edinburgh
- 2006: Liddmaat New York Academy of Sciences
- 2007: Albert Lasker Award for Basic Medical Research[11]
- 2009: Albany Medical Center Prize[12]
- 2010: A.H.-Heineken-Preis für Medizin[13]
- 2011: Nobelpries för Physiologie oder Medizin (posthum)[3]
Literatur
- William Grimes: Ralph M. Steinman, a Nobel Recipient for Research on Immunology, Dies at 68. In: The New York Times, 4. Oktober 2011.
Weblenken
- Ralph M. Steinman, M.D. bei rockefeller.edu; afroopen an’ 5. Oktober 2011
- Steinman, Ralph M. bei isiknowledge.com; afroopen an’ 27. November 2010
- DNB-Katalog
- Personennaamdatei