Sylvia Sidney
Sylvia Sidney (* as Sophia Kosow 8. August 1910 in de Bronx, New York City; † 1. Juli 1999 in New York City) weer en US-amerikaansche Schauspelersche.
Leven un Wark
Sylvia Sidney hett en Schauspeelschool besöcht un harr dorna toeerst en Anstellen an’t Theater. Ehr Filmdebüt harr se 1929 in dat Drama Thru Different Eyes. Na wietere Rullen an’t Theater wessel se eerst 1931 na Hollywood, nadem se en Verdrag Paramount maakt harr. De Produzent B. P. Schulberg harr na en ne’e Schauspelersche söcht, vunwegen dat sien Protegée bit dorhen, Clara Bow, Lasten mit ehr Gewicht un bito Rechtsstreit mit ehr Sekretärsche harr, so dat se bi de Tokiekers nich mehr recht ansehn weer. Sidney hett dorophen ehr Rull in City Streets övernahmen, dör de se sotoseggen över Nacht to’n Star worrn is.
Ehr Optritt dat glieke Johr in An American Tragedy, en stark körte Faten vun den Klassiker vun Theodore Dreiser, bi den Josef von Sternberg Speelbaas weer, weer vun de Kritikers loovt. Kort later harr Sidney mit den Film Ladies of the Big House mit ehrn gröttsten finanziellen Spood. Dör den Film is se denn stark op de Rull vun de ahn Schuld Verfolgte fastleggt, de ünner sadistische Mannslüüd to lieden hett un in’t Gefängnis müss för Verbreken, de se nich begahn hett.
Vun’t Studio is se dör disse Oort vun Rullen to en tranenrieke Heldin vun de Arbeiterklass opboet worrn, wat Sidney sülvst gor nich gefallen hett. Man, komische Rollen, de se to’n Afwesseln mol speelt hett, sünd bi de Tokiekers meist nicht ankamen. 1933 weer se noch mol in en Verfilmen vun en Stück vun Dreiser to sehn: In Jennie Gerhardt speel se de Titelrull. Gegen Mitt vun de 1930er Johren hett se för dree Filmen mit den Speelbaas Fritz Lang tosamen arbeit. Dorblangen weer se 1936 in den Hitchcock-Film Sabotage to sehn. Sidney weer vun de Tosamenarbeit mit Hitchcock aver nich sünnerlich andoon.
Mit Utlopen vun ehrn Verdrag över söven Johren hett se sik Enn 1939 vun’t Filmgewarf torüchtogen. Se hett dorna wedder an’n Broadway arbeit un güng mit Theaterprodukschonen op Tournee. Vun de 1960er Johren an hett se ok veel för’t Feernsehn arbeit. Af un to is se in’t Kino torüchkamen un weer 1973 ok eenmol dör den Oscar vörslahn. Jüngere Filmfrünnen is se later bekannt worrn dör Rullen in Filmen vun Tim Burton, so as Beetlejuice oder Mars Attacks!
Sidney weer dreemol verheiraat, ünner annern mit den Schauspeler Luther Adler. Doodbleven is se 1999 an Spiesröhrkrebs.
Filmografie (Utwahl)
| Johr | Titel | Synchroonsnacker |
|---|---|---|
| 1929 | Thru Different Eyes | |
| 1931 | City Streets dt:: Straßen der Großstadt | |
| 1931 | An American Tragedy dt:: Eine amerikanische Tragödie | |
| 1931 | Ladies of the Big House | |
| 1932 | The Miracle Man dt:: Spiel am Abgrund | |
| 1933 | Pick-up dt:: Flucht vor dem Gestern | |
| 1933 | Jennie Gerhardt | |
| 1934 | Good Dame | |
| 1934 | Behold My Wife | |
| 1936 | The Trail of the Lonesome Pine dt:: Kampf in den Bergen | |
| 1936 | Fury dt:: Blinde Wut | Monika Barth Barbara Schnitzler (DEFA 1985) |
| 1936 | Sabotage | Susanna Bonaséwicz |
| 1937 | You Only Live Once dt:: Gehetzt | |
| 1937 | Dead End dt:: Sackgasse | Marianne Lutz |
| 1938 | You and Me dt:: Du und ich | |
| 1945 | Blood on the Sun dt:: Spionage in Fernost | Friedel Schuster (Synchro 1950) |
| 1946 | Mr. Ace | |
| 1947 | Love from a Stranger | |
| 1952 | Les Miserables dt:: Die Legion der verdammten | Eva Eras |
| 1956 | Behind the High Wall dt:: Verdammte hinter Gittern | |
| 1973 | Summer Wishes, Winter Dreams | |
| 1977 | I Never Promised You a Rose Garden dt:: Ich hab’ dir nie einen Rosengarten versprochen | Barbara Ratthey |
| 1978 | Damien: Omen II dt:: Damien – Omen 2 | Alice Treff |
| 1985 | An Early Frost, Feernsehn dt:: Früher Frost | Tilly Lauenstein |
| 1988 | Beetlejuice | Sigrid Lagemann |
| 1996 | Mars Attacks! | Tilly Lauenstein |
Utteken
Sidney weer för ehr Filmwark ölven mol för Priesen nomineert, dorünner ok eenmol för den Oscar in de Kategorie Best Nevendorstellersche för Summer Wishes, Winter Dreams. Ehrt worrn is se mit söss priesen:
- 1960: mit ehrn Steern op’n Hollywood Walk of Fame
- 1973: mit den NBR Award in de Kategorie Best Nevendorstellersche för Summer Wishes, Winter Dreams
- 1974: mit den KCFCC Award in de Kategorie Best Nevendorstellersche för Summer Wishes, Winter Dreams
- 1974: mit den NSFC Award, 3. Platz, in de Kategorie Best Nevendorstellersche för Summer Wishes, Winter Dreams
- 1986: mit den Golden Globe in de Kategorie Best Hööftdorstellersche – Minireeg oder TV-Film för An Early Frost
- 1990: mit den Saturn-Pries in de Kategorie Best Nevendorstellersche för Beetlejuice